काठमाडौं– चालु आर्थिक वर्ष २०८०/८१ को ११औं महिना अर्थात् जेठमा वैदेशिक रोजगारीका लागि ७२ हजारभन्दा बढी नेपाली युवा विदेसिएका छन् । वैदेशिक रोजगार विभागले सार्वजनिक गरेको तथ्यांकअनुसार जेठ महिनामा ७२ हजार ८६१ जना नयाँ तथा पुनः श्रम स्वीकृति लिएर रोजगारीका लागि विभिन्न मुलुकमा पुगेका हुन् ।
विभागको तथ्यांकअनुसार नेपाली युवाहरु १०० वटा मुलुकमा श्रम स्वीकृति लिएर रोजगारीका लागि गएका छन् । वैशाखमा भन्दा जेठमा विदेसिने नेपालीको संख्या केही बढेको छ । वैशाखमा ७० हजार ६३७ जना विदेसिएका थिए । यसअघि चैत महिनामा झण्डै ७१ हजार जनाले वैदेशिक रोजगारीका लागि श्रम स्वकिृति लिएका थिए ।
चालु आवको सुरुआती महिनादेखि (वैशाखबाहेक) संयुक्त अरब इमिरेट्स (युएई) नेपालीहरुको पहिलो गन्तव्य बनेको छ । जेठ महिनामा युएई जान २० हजार ४२४ जनाले श्रम स्वीकृति लिएका छन् । गत वैशाखमा युएई जान १६ हजार ५१२ जनाले मात्रै श्रम स्वीकृति लिएका थिए । त्यस्तै साउदी अरब दोस्रो स्थानमा परेको छ । जेठमा साउदी जान १३ हजार ३६६ जनाले श्रम स्वीकृति लिएका छन् । यसैगरी जेठमा कतार जान ११ हजार ९७३ जनाले श्रम स्वीकृति लिएका छन् ।
गत वर्ष नेपालीहरुको पहिलो गन्तव्य रहेको मलेसिया चौथो स्थानमा परेको छ । जेठ महिनामा मलेसिया जान आठ हजार ७५२ जनाले श्रम स्वीकृति लिएका छन् । यसैगरी पाँचांै स्थानमा परेको कुवेतमा तीन हजार ४३२ जना नेपाली श्रमिक रोजगारीका लागि पुगेका छन् । कुवेत जाने श्रमिकको संख्यामा धेरै उतारचढाव देखिएको छैन । चालु आव सुरू भएयता कतार र साउदी जाने नेपालीको संख्या बराबरजस्तो देखिए पनि युएई जाने संख्यामा भने उल्लेख्य वृद्धि भएको विभागको तथ्यांकले देखाएको छ । उल्लिखित पाँच मुलुकले नै नेपालको वैदेशिक रोजगारीको ठूलो हिस्सा (झण्डै ८० प्रतिशतभन्दा बढी) ओगटेको देखिन्छ ।
यसैगरी क्रोएसिया जान दुई हजार ९२२, रोमानिया एक हजार ९४६, बहराइन एक हजार १२१, जापान एक हजार ९३, साइप्रस ८९९, मोरिसस ८६८, माल्दिभ्स जान ७९०, र ओमानका लागि ६१८ जनाले श्रम स्वीकृति लिएका छन् । यो जेठ महिनामा श्रम स्वीकृति लिनेको संख्या हो । त्यस्तै जेठ महिनामा इपिएस प्रणालीबाट दक्षिण कोरिया जाने नेपालीको संख्या ८५० कायम भएको छ ।
विभागबाट श्रम स्वीकृति लिनेमध्ये पुनः श्रम स्वीकृति लिने २४ हजार ८१२ जना छन् । पहिलोपटक विदेश जान श्रम स्वीकृति लिनेको संख्या ४८ हजार ४९ जना रहेको छ । चालु आवको ११औं महिनामा श्रम स्वीकृति लिनेमध्ये सात हजार ९७५ जना महिला श्रमिक रहेको विभागले उल्लेख गरेको छ । पछिल्लो समय वैदेशिक रोजगारीका लागि युरोपेली मुलुकमा जान श्रम स्वीकृति लिने नेपालीको संख्या क्रमिकरुपमा बढ्दै गएकोसमेत विभागको तथ्यांकले देखाएको छ ।
यसरी श्रम स्वीकृति लिएर जानेहरुमा उच्च दक्षता भएकादेखि अदक्ष श्रमिक रहेको विभागले सार्वजनिक गरेको विवरणमा उल्लेख छ । वैशाख महिनामा उच्च दक्षता हासिल गरेका ९४ जना र पेसागत दक्षता भएका ४९० जना नेपालीहरु श्रम स्वीकृति लिएर विदेसिएका छन् । वैदेशिक रोजगारीको क्रममा सबैभन्दा बढी दक्ष कामदार गएको विभागले जनाएको छ । यो संख्या ५१ हजार ६२० रहेको छ । यस्तै अर्धदक्ष कामदारको रुपमा छ हजार २६ जना बाहिरिएका छन् । जेठ महिनामा १४ हजार ६३१ अदक्ष कामदार विदेसिएका छन् ।
