काठमाडौं– मलेसियास्थित नेपाली राजदूतावासले लामो समयदेखि गैरकानुनीरुपमा त्यहाँ बसेका र अलपत्र परेका नेपालीहरुको उद्धार गरेको छ । दूतावासले घर फिर्ती कार्यक्रममार्फत चार जनालाई उद्धार गरी स्वदेश फर्काउन पहल गरेको हो । मंगलबारमात्रै दूतावासले उद्धार गरेका सप्तरीका सरोजकुमार यादव, कालिकोटका पवनबहादुर शाहीलगायत चार जनालाई उद्धार गरी नेपाल फर्काएको छ ।
सप्तरीका यादव रोजगारीका लागि मलेसिया पुगेर १२ वर्ष बिताए । तर उनी रोजगारदाता (कम्पनी)को लापरबाहीका कारण गैरकानुनी कामदार बन्न पुगे । न उनी घर फर्कन सके, न वैधानिकरुपमा नै काम गर्न पाए । अवैधरुपमा बस्दै आएका उनी भागेर दूतावासको सम्पर्कमा पुगे । त्यसपछि दूतावासले आवश्यक विवरण लिएर उद्धार गरी सबै प्रक्रिया पूरा गरेर घर फर्काएको छ । अवैधरुपमा बसेका यादव घर फर्किन पाएपछि खुसी देखिएका छन् । ‘मलेसिया आएको १२ वर्ष भयो, यहाँ बस्ने खर्च पनि छैन, अब घर जान पाइने भइयो, सजिलो भयो, सरहरुले (दूतावासका कर्मचारी) छिट्टै मिलाइदिनु भयो,’ उनले भने ।
त्यस्तै मलेसिया पुगेको एक वर्षमै सिकिस्त बिरामी परेका पवनबहादुर शाही कम्पनीले बेवास्ता गरेपछि अलपत्र परे । कालिकोट तिलागुफा नगरपालिकाका शाही बिरामीका कारण काम गर्न नसक्ने भएपछि घर फर्किन खोजे पनि कम्पनीले साथ दिएन । ‘मलेसियामा उपचार नहुने डाक्टरको सल्लाहअनुसार नेपाल फर्किनुपर्ने भयो,’ उनले भने, ‘कम्पनीले कुनै मतलब नै गरेन, उद्धारका लागि दूतावासमा सम्पर्क गरेपछि धेरै सहयोग पाइयो, घर फर्किन पाउँदा खुसी लागेको छ ।’
यादव र शाही मलेसिया पुगेर अवैध हुने र बिचल्लीमा पर्ने प्रतिनिधि पात्रमात्र भएको दूतावासले जनाएको छ । मलेसियामा गैरकानुनीरुपमा बसेका र काम गरिरहेका थुप्रै नेपाली रहेको दूतावासका श्रम काउन्सिलर भोलानाथ गुरागाईंले बताए । अहिले मलेसियाले आप्रवासी कामदारलाई घर फिर्ती कार्यक्रम सञ्चालन गरिरहेकाले त्यसको फाइदा नेपालीहरुले लिनसक्ने भन्दै समयमै स्वदेश फर्किने प्रक्रिया थाल्न पनि उनले आग्रह गरे ।‘हामीले घर फिर्ती कार्यक्रमअन्तर्गत नै सम्पर्कमा आएका नेपालीहरुको उद्धार गर्ने र स्वदेश पठाउन सघाउने गरिरहेका छौं,’ गुरागाईंले भने, ‘मलेसिया सरकारले ल्याएको कार्यक्रम अवैधरुपमा बसेका कामदारहरुलाई घर फर्किन पाउने सुनौलो अवसर पनि हो ।’ मलेसियाले अवैधरुपमा बसेका आप्रवासी कामदारहरुलाई स्वदेश फर्किन गत मार्च १ देखि २०२४ डिसेम्बर अन्तिमसम्मको समयसीमा तोकेको छ ।
