काठमाडौं– श्रम, रोजगार तथा सामाजिक सुरक्षामन्त्री डोलप्रसाद अर्यालले रोजगारीमा रहेका नेपाली श्रमिकलाई २४ घण्टे बिमा सुविधाको व्यवस्था गर्न मलेसिया सरकारलाई आग्रह गरेका छन् ।
मन्त्री अर्यालले स्वीट्जरल्याण्डको जेनेभामा जारी अन्तर्राष्ट्रिय श्रम संगठन (आइएलओ) को ११२औं अन्तर्राष्ट्रिय श्रम सम्मेलन (आइएलसी) मा सहभागी हुने क्रममा मलेसियाका मानव संसाधनमन्त्री स्टीभन सिम ची केओङसँगको भेटवार्तामा उक्त आग्रह गरेका हुन् ।
मन्त्री अर्यालले नेपाल सरकारले श्रमिकको सीप विकासलाई प्राथमिकतामा राखेको बताउँदै सीप विकासका लागि सहकार्य गर्नसमेत मलेसियन समकक्षीसँग आग्रह गरे । ‘हामी नेपाली श्रमिकलाई सीप सिकाएर पठाउन चाहन्छौं, तपाईंहरुले चाहेको सीपसहितको श्रमिक पठाउन हामी इच्छुक छौं, नेपाली श्रमिकको सीप विकासमा सहकार्य गरौं,’ उनले भने ।
मन्त्री अर्यालले मलेसियासँगको श्रम सम्झौताका लागि नेपाल सरकारले अन्तिम तयारी गरेको जानकारी गराए । परराष्ट्र र कानुन मन्त्रालयको राय प्राप्त भएपश्चात् श्रम सम्झौता नवीकरण गरिने उनले बताए । भेटमा मन्त्री अर्यालले मलेसियन मन्त्रीलाई नेपाल भ्रमणका लागि निम्तोसमेत दिए ।
भेटमा मलेसियाका मानव संसाधनमन्त्री केओङले नेपालसँगको श्रम सम्झौता चाँडो नवीकरण होस् भन्ने मलेसियन सरकारले चाहेको बताए । त्यस्तै, मलेसियन सरकारले आप्रवासी श्रमिक र स्थानीय श्रमिकलाई समान खालको समाजिक सुरक्षा सुविधा प्रदान गरेको जिकिर गर्दै २४ घण्टे बिमा सुविधा पनि छलफल गरिरहेको बताए । नेपाल भ्रमणका लागि आफू इच्छुक रहेकोसमेत उनले बताए ।
-1787143572.jpg)
