काठमाडौं– राष्ट्रपति रामचन्द्र पौडेलले जेनेभामा भइरहेको अन्तर्राष्ट्रिय श्रम संगठन (आइएलओ) को ११२औं अन्तर्राष्ट्रिय श्रम सम्मेलन (आइएलसी)लाई सम्बोधन गर्ने भएका छन् । ‘सामाजिक न्यायका लागि विश्वव्यापी गठबन्धन’को उद्घाटन सत्रको समारोहमा सहभागी हुन राष्ट्रपति पौडेल मंगलबार अपराह्न स्वीट्जरल्याण्डको जेनेभा जाँदै छन् ।
राष्ट्रपति पौडेलबाट उद्घाटन सत्रलाई बिहीबार सम्बोधन हुने कार्यतालिका रहेको परराष्ट्र मन्त्रालयले जनाएको छ । सम्बोधनका क्रममा पौडेलले विश्वको साझा चुनौती, दिगो समावेशी आर्थिक विकास, गरिबी निवारण, रोजगारी सिर्जना र वातावरण परिवर्तनबाट परेको असरको न्यूनीकरण आदिमा जोड दिने बताइएको छ ।
सम्मेलनमा सहभागी भएपश्चात् जेठ ३० गते पौडेलले आफ्नो समकक्षी स्वीट्जरल्याण्डका राष्ट्रपति भायोला एमहेर्डसँग भेटवार्ता गर्ने कार्यक्रम तय भएको पराराष्ट्रले जनाएको छ । जेनेभाबाट राष्ट्रपति पौडेल असार १ गते बर्लिन जाने र ३ गते जर्मनीका राष्ट्रपति फ्रयांक वाल्टर स्टिनमियरसँग द्विपक्षीय भेटवार्ता गर्ने कार्यक्रम छ । राष्ट्रपति पौडेल असार ५ गते स्वदेश फर्किने कार्यक्रम रहेको मन्त्रालयले जनाएको छ ।
त्यसैगरी अन्तर्राष्ट्रिय श्रम सम्मेलनमा भाग लिन श्रम रोजगार तथा सामाजिक सुरक्षामन्त्री डोलप्रसाद अर्याल आइतबार नै जेनेभा प्रस्थान गरेका छन् । मन्त्री अर्यालले जेठ ३० गते अर्थात् जुन १२ मा आइएलसीको पूर्ण बैठकलाई सम्बोधन गर्ने बताइएको छ । मन्त्री अर्यालले मंगलबार मलेसियाका मानव संसाधनमन्त्री ची क्योङ सिम र कतारका श्रममन्त्री अलि समिख अल मारीसँग दुईपक्षीय भेट गर्ने कार्यक्रम रहेको छ । त्यस्तै १४ जुनमा कोरियाका रोजगार तथा श्रममन्त्री जङ सिक लीसँग दुईपक्षीय भेट गर्ने श्रम मन्त्रालयले जनाएको छ ।
अन्तर्राष्ट्रिय श्रम सम्मेलनमा आइएलओका १८७ सदस्य राष्ट्रका प्रतिनिधिले सहभागिता जनाएका छन् । सरकार, रोजगारदाता र श्रमिकका प्रतिनिधिले सम्मेलनमा सहभागिता जनाउने छन् । सम्मेलनमा अन्तर्राष्ट्रिय श्रम बजारमा देखिएको समस्या र समाधानको प्रयास, दीर्घकालीन रुपमा श्रमले प्रभाव पार्नेसम्बन्धी अन्तर्राष्ट्रिय श्रमको मापदण्ड, जैविक खतराविरुद्ध सुरक्षा, कार्यस्थलमा मौलिक सिद्धान्त र मानवअधिकारको रणनीति, विश्वव्यापीरुपमा मर्यादित र सुरक्षित श्रम तथा हेरचाह, र बढ्दो आप्रवसन श्रमसम्बन्धी छलफल भइरहेको बताइन्छ । यही जुन ३ बाट सुरु भएको सम्मेलन जुन १४ मा समापन हुने छ ।
