काठमाडौं– श्रम, रोजगार तथा सामाजिक सुरक्षा मन्त्रालयले गण्डकी प्रदेशमा सञ्चालन गरेको दुईदिने श्रमाधान रोजगार मेलाको पाँच हजारभन्दा बढीले अवलोकन गरेका छन् । सोमबार र मंगलबार पोखराको पोखरा इभेन्ट सेन्टरमा मेला आयोजना गरिएको थियो ।
श्रम, रोजगार तथा सामाजिक सुरक्षा मन्त्रालय, सामाजिक तथा स्वास्थ्य मन्त्रालय गण्डकी प्रदेश र पोखरा महानगरले आयोजना गरेको मेलामा सरकारी, गैरसरकारी तथा निजी क्षेत्रका सरोकावालाहरुको सहभागीता रहेको थियो ।
श्रम तथा रोजगार कार्यालय पोखराका प्रमुख वरिष्ठ श्रम अधिकृत सुरेश ढकालले रोजगारदाता र रोजगारी खोजीमा रहेकाहरुबीच पुलको काम गर्न मेला सफल भएको बताए । मेलामा सहभागी विभिन्न कम्पनीहरूले ३५० भन्दा बढी क्षेत्रमा कर्मचारी माग गरेका थिए । जसमा एक हजार ३०० भन्दा बढीले आवेदन दिएको बताइएको छ ।
मेलालाई होटल संघ नेपाल (हान) ले संयोजन गरेको थियो । सहआयोजकमा नेपाल उद्योग वाणिज्य महासंघ, नेपाल चेम्बर अफ कमर्स, नेपाल घरेलु तथा साना उद्योग महासंघ, नेपाल तालिम तथा रोजगार व्यवसायी महासंघलगायतका सरोकारवाला संस्थाहरु रहेका थिए ।
