वर्तमान सरकारका प्रधानमन्त्री पुष्पकमल दाहाल अचेल हरेक भाषणमा भन्छन् – यो पाला सुशासनमा कीर्तिमान कायम भयो । देशको अर्थतन्त्रमा धेरै सुधार आयो । तर बादशाहको नयाँ लुगाको कथा झैं प्रधानमन्त्री दाहालले आसेपासेको रिपोर्ट सुन्दै यस्तो भाषण छाँटेको प्रष्ट हुन्छ ।
अहिले सहकारीको रकम दुरुपयोगको विषय जटिल बन्दै गएको छ । सरकारकै अक्षमताका कारण यो विषय जटिल बन्दै आएको हो । एकातर्फ सरकारले सहकारीलाई पेल्दै जाने अर्कोतर्फ यसमा सर्वसाधारणको फसेको रकम नउठ्ने । यही कारणले अहिले सदनभन्दा सहकारी बन्धक बनेको अवस्था छ ।
अहिले सरकारको हचुवा नीतिका कारण घरजग्गा व्यवसाय ठप्प छ । सहकारी तथा वित्तिय संस्थाको रकम घरजग्गामा फसेको छ । सोही कारण सहकारीको रकम फर्किन नपाउँदा सर्वसाधारण समस्यामा परेका छन् । उनीहरुले चाहेको बेला आफैले बचत गरेको रकम पाउन सकेका छैनन् ।
सरकारको कमजोर आर्थिक नीतिका कारण अहिले सहकारीहरु क्रमश समस्यग्रस्त बन्न थालेका छन् । यो विषय वार कि पार गर्न सरकारले उच्चस्तरीय संसदीय समिति बनाएर मात्र हुन्न । सहकारीको रकम अपचलन गरेकाहरुलाई नामै कीटेर कारबाही गर्नुपर्छ ।कानुनी प्रक्रिया मिलाएर रकम लिनेहरुको कानुनी प्रक्रियाअनुसार नै कारबाही गर्नुपर्छ । तर कीर्ते जालसाजी गरेर रकम लिएकाहरुलाई कडाभन्दा कडा कारबाही गर्नुपर्छ । अहिले राप्रपाकी सांसद गीता बस्नेत यस्तै प्रकरणमा छिन् । सरकारले पक्राउ पूर्जी जारी गरेपछि बस्नेत फरार छिन् । तर सरकारकै उपप्रधान तथा गृहमन्त्री भने ढुक्कका साथ सरकारमा छन् ।
सबैलाई जगजाहेर भइसकेको विषय हो, गोर्खा मिडिया सञ्चालनका लागि गृहमन्त्री लामिछानेले ऋण लिएका छन् । त्यतिमात्र हैन उनी गोर्खा मिडियाको सञ्चालक पनि भएका हुन् । यो मिडियाले सर्वसाधारणको करोडौं ऋण अपचलन गरेको छ । यो मिडियाका मुख्य सञ्चालक जीबी राई फरार छन् भने अर्का सञ्चालक सरकारमा छन् । सहकारीको रकम अपचलनमा प्रष्ट संलग्न रहेको देखिँदा पनि लामिछानेले आफू चोखो रहेको दाबी गर्दै आएका छन् । लामिछानेले आफू कुनै हालतमा दोषी नरहेको दाबीमात्र गरेनन्, नेपाली मिडियामाथि पटकपटक रोष प्रकट पोख्दै आएका छन् । गृहमन्त्री लामिछानेले आफ्नो गल्ती छोप्न चौतर्फी विषवमन गरिरहेका छन् ।
यस प्रकारले गृहमन्त्री अघि बढ्दा प्रधानमन्त्री पुष्पकमल दाहाल र सत्तासहयात्री दल नेकपा एमालेका अध्यक्ष केपी ओली पनि उनकै बचाउमा लागेका छन् । सुशासनमा सुधार हुँदै आएको दाबी गर्दै आएका प्रधानमन्त्री दाहालका लागि गृहमन्त्रीको यो प्रकरण लज्जाको विषय हो ।सरकार जोगाउन प्रधानमन्त्री दाहालले यस किसिमको लाजमर्दो चरण कतिसम्म पार गर्ने हो ? के यही हो प्रधानमन्त्रीज्यू तपाईंको सुशासन ?
