काठमाडौं– रोजगार अनुमति प्रणाली (इपिएस)मार्फत दक्षिण कोरियामा उत्पादनमूलक क्षेत्रमा जान भाषा परीक्षा पास गरी दोस्रो चरणको सीप परीक्षणमा सहभागी भएका परीक्षार्थीको नतिजा सार्वजनिक भएको छ । वैदेशिक रोजगार विभागअन्तर्गतको इपिएस कोरिया शाखाले गत वैशाख ९ गतेदेखि १५ गतेसम्म सञ्चालित दोस्रो चरणको सीप परीक्षण (स्किल टेस्ट)मा सहभागीहरुको नतिजा सार्वजनिक गरेको हो ।
शाखाले सार्वजनिक गरेको नतिजाअनुसार दोस्रो चरणको सीप परीक्षणमा पाँच हजार ७५३ जना उत्तीर्ण भएका छन् । सीप परीक्षणका लागि भाषा परीक्षा पास गरेका छ हजार ३२१ जनाले आवेदन दिएका थिए । जसमा ४९८ जना अनुत्तीर्ण भएका छन् भने ७० जना परीक्षामै सहभागी नभएको इपिएस शाखाले जनाएको छ । सीप परीक्षण उत्तीर्ण गरेका व्यक्तिहरूको दक्षिण कोरियामा इपिएसअन्तर्गत रोजगारीका लागि रोस्टरमा सूचीकृत प्रक्रियाका लागि स्वास्थ्य परीक्षण र रोजगार आवेदन फाराम (जब एप्लिकेसन फाराम) दर्ता प्रक्रिया बढाउन सकिने शाखाले जनाएको छ ।
स्वास्थ्य परीक्षण भोलि वैशाख ३१ देखि जेठ २ गतेसम्म सञ्चालन हुने बताइएको छ । शाखाले सम्बन्धित व्यक्तिहरुलाई स्वास्थ्य परीक्षणका लागि तोकिएको अस्पतालमा समयभित्रै जान आग्रह गरेको छ । स्वास्थ्य परीक्षणका लागि पाटन अस्पताल लगनखेल, शुक्रराज ट्रपिकल अस्पताल टेकु, नेपाल–कोरिया मैत्री अस्पताल भक्तपुर र निजामती अस्पताल मिनभवनलाई तोकिएको छ । त्यस्तै स्वास्थ्य परीक्षणबाट निरोगिता भएको प्रमाणित भएसँगै जेठ ५ देखि ८ गतेसम्म अनलाइनमार्फत रोजगार आवेदन फाराम दर्ता गर्न सकिने शाखाले उल्लेख गरेको छ ।
त्यसैगरी कोरिया रोजगारीका लागि जान रोस्टरमा रहेकाहरुले सेवा क्षेत्र परिवर्तनका लागि दिएको आवेदनअनुसार ६९१ जना छनोट भएका छन् । सेवा क्षेत्र परिवर्तनका लागि इच्छुक तीन हजार ५७६ जनाले आवेदन दिएका थिए । जसमध्ये एचआरडी कोरियाले ६९१ जनामात्रै छनोटमा परेको सूची पठाएको शाखाले जनाएको छ । एचआरडी कोरियाले नौ हजार ४२८ जनाले सेवा क्षेत्र परिवर्तन गर्न सक्ने जानकारीसहित इपिएस शाखालाई पत्राचार गरेकोमा तीन हजार ५७६ जनाले मात्रै आवेदन दिएका थिए । एचआरडी कोरियाले कृषि तथा पशुपालन र उत्पादनमूलक क्षेत्रमा जान भाषा परीक्षा उत्तीर्ण गरी रोस्टरमा रहेका तर, हालसम्म जान नपाएकाहरूलाई क्षेत्र परिवर्तनको अवसर दिएको थियो ।
