काठमाडौं– इपिएस भाषा परीक्षा उत्तीर्ण गरी दक्षिण कोरिया रोजगारीमा जान रोस्टरमा परेका साढे ३५ सयभन्दा बढी रोस्टर परिवर्तन इच्छुक देखिएका छन् । कृषि तथा पशुपालन र उत्पादनमूलक क्षेत्रमा जान रोस्टरमा परेका उनीहरुले सेवा क्षेत्रमा रोस्टर परिवर्तन गर्न चाहेका हुन् ।
वैदेशिक रोजगार विभागअन्तर्गतको इपिएस कोरिया शाखाले सेवा क्षेत्रमा रोस्टर परिवर्तन गर्न आवेदन दिएकाहरुको सूची कोरियाको मानव संसाधन विकास (एचआरडी)मा पठाएको छ । शाखाले शुक्रबार एक सूचना गरी गरी उक्त जानकारी दिएको हो । शाखाको सूचनाअनुसार तीन हजार ५७६ जनाको सूची पठाइएको छ ।
कोरियामा कृषि तथा पशुपालन र उत्पादनमूलक क्षेत्रमा रोजगारीका लागि जान इपिएस भाषा परीक्षा उत्तीर्ण गरी रोस्टरमा परेकाहरुलाई सेवा क्षेत्रमा रोस्टर परिवर्तन गर्ने अवसर दिइएको हो । इपिएस कोरिया शाखाले यही वैशाख १४ गते एक सूचना जारी गर्दै कृषि तथा पशुपालन र उत्पादनमूलक क्षेत्रतर्फ रोस्टरमा रहेकाहरूले सेवा क्षेत्रमा रोस्टर परिवर्तन गर्न सक्ने जनाएको थियो । रोस्टरको अवधि २०२४ डिसेम्बर ३१ भित्र समाप्त हुने इच्छुक व्यक्तिहरूले रोस्टर परिवर्तन सक्ने जनाइएको थियो । एचआरडी कोरियाले रोस्टर परिवर्तन गर्न सक्ने नौ हजार ४२८ जनाको नामावलीसहितको सूची पठाएको थियो । तीमध्ये आधाभन्दा कमले मात्र रोस्टर परिवर्तन गर्न आवेदन दिएका हुन् ।
शाखाका अनुसार पहिले नै रोजगारदाताले करार सम्झौता गरिसकेको वा रोस्टर अवधि समाप्त भइसकेको वा कुनै कारणले अयोग्य भएकालाई भने रोस्टर परिवर्तन गर्न अवसर दिइएको छैन । सेवा क्षेत्र परिवर्तन गरिए पनि रोस्टरको अवधि भने थप नहुने शाखाले जनाएको छ । यदि आवेदकहरुको संख्या आवश्यक संख्याभन्दा बढी भएमा जसको रोस्टरमा अवधि छोटो छ त्यस्ता आवेदकहरुलाई प्राथमिकता दिइने बताइएको थियो ।
त्यसअघि भाषा परीक्षा पास गरेर कोरिया जान पर्खेर बसेका हजारौं युवाहरुले आफूहरूको समस्या समाधानका लागि पहल गर्न श्रम रोजगार तथा सामाजिक सुरक्षामन्त्री डोलप्रसाद अर्याललाई आग्रह गरेका थिए । गुनासो प्राप्त भएपछि श्रममन्त्री अर्यालले कोरियाका सम्बन्धित निकायका पदाधिकारीसँग पटक–पटक छलफल गरेका थिए ।
पछिल्लोपटक गत वैशाख १२ गते मन्त्री अर्यालले एचआरडी कोरिया मुख्यालयका प्रतिनिधि, एचआरडी कोरियाका नेपाल प्रतिनिधि, इपिएस शाखा र कोरिया रिटर्नी एवं रोस्टरमा रहेकाहरूबीच गुनासो सम्बोधनका लागि छलफल गराएका थिए । उक्त छलफलमा कोरियाली पक्षले समस्या समाधानका लागि शीघ्र निकास निकाल्ने प्रतिबद्धता व्यक्त गरेको थियो । परिणामस्वरुप त्यसको भोलिपल्ट अर्थात् वैशाख १३ मै कोरियाली पक्षले रोस्टर परिवर्तन गर्न सकिने निर्णय गरी इपिएस शाखालाई जानकारी गराएको थियो ।
