काठमाडौं– निकै महत्वकासाथ हेरिएको कतारका अमिर (राजा) शेख तमिम बिन हमाद अल थानी नेपालको दुईदिने भ्रमण सकेर फर्र्किएका छन् । ठूलो तामझामका साथ नेपाल आएका उनको स्वागतमा नेपाल सरकारले कुनै कसर बाँकी राखेन । दुई देशबीच केही समझदारीपत्रमा भएका हस्ताक्षरको साक्षी बनेर उनी फर्किसकेका छन् । तर नेपालले अपेक्षा गरेको खास क्षेत्र अर्थात् श्रमसम्बन्धी हुने भनिएको सम्झौता भने हुन सकेन ।
यद्यपि, नेपालीहरुको प्रमुख श्रम गन्तव्यमध्येको एक कतारका अमिर नेपाल आउनुले नेपाली श्रमिकमा उत्साह जगाएको छ । श्रमसम्बन्धी सम्झौता नभएपछि सरोकारवाला र श्रम, रोजगार तथा सामाजिक सुरक्षा मन्त्रालयका अधिकारीहरु भने खिन्न भएका छन् ।
अमिर थानीको नेपाल भ्रमणका क्रममा कतारसँग सन् २००५ मा भएको श्रम सम्झौताको पुनरावलोकन तथा परिमार्जनसहित पुनः श्रम सम्झौता हुने मन्त्रालयले बताउँदै आएको थियो । ठूलो तयारीका साथ श्रम सम्झौताका लागि बसेको नेपाली पक्ष कतारले कुनै प्रतिक्रिया नजनाउँदा निराश भएको मन्त्रालयका एक उच्च अधिकारीले बताए । उनका अनुसार श्रम सम्झौता हुनेमा श्रममन्त्री डोलप्रसाद अर्यालसमेत ढुक्क थिए ।
एक साताअघि अर्यालसँगको भेटमा नेपालका लागि कतारका राजदूत मिसाल बिन मोहम्मद अलिले अमिर थानीको भ्रमणका क्रममा श्रम सम्झौता पुनरावलोकन हुनसक्ने बताएका थिए । ‘सोहीअनुरुप तयारी गरेर परराष्ट्र मन्त्रालयमार्फत सम्झौता पुनरावलोकनका लागि प्रस्ताव गरिएको थियो,’ ती अधिकारीले भने, ‘हुन्छ, हुन्छ भने पनि अमिरको भ्रमणको अन्तिम समयसम्म कुनै प्रतिक्रिया आएन र श्रम सम्झौताको विषय उठाउने कुरै भएन ।’
नेपालले विभिन्न फोरममा पनि कतारसँग श्रम समझदारी पुनरावलोकन तथा परिमार्जनका लागि आवश्यक सम्झौता गर्ने सम्बन्धमा प्रस्ताव राख्दै आएको छ । यसअघि संयुक्त अरब इमिरेट्स (युएई)मा भएको अबुधाबी डाइलगमा सहभागी नेपालले साइडलाइन वार्ताका क्रममा कतारसँग श्रम सम्झौताको प्रस्ताव राखेको थियो । त्यसबेला पनि कतारले सहमति जनाउँदै अमिर थानीको नेपाल भ्रमणका क्रममा हस्ताक्षर हुने आश्वासन दिएको मन्त्रालयकै अधिकारीहरु बताउँछन् ।
नेपाल भ्रमणका क्रममा अमिर थानीले कतारको विकासमा नेपाली श्रमिकको भूमिका उच्च रहेको भन्दै प्रशंसा गरेको प्रधानमन्त्री पुष्पकमल दाहालको सचिवालयले जनाएको छ । प्रधानमन्त्री दाहालसँग बुधबार भएको द्विपक्षीय भेटवार्तामा कतारका अमिर थानीले नेपालको प्रशंसा गर्दै आगामी दिनमा थप रोजगारी उपलब्ध गराउने प्रतिबद्धतासमेत जनाएको बताइएको छ । साथै उनले नेपाली श्रमिकको सीप विकास तथा क्षमता अभिवृद्धि गर्न पनि सहयोग गर्ने प्रतिबद्धता जनाएका छन् । यसअघि मंगलबार राष्ट्रपति राचन्द्र पौडेलसँगको भेटमा पनि अमिर थानीले नेपाली श्रमिकका लागि अझ राम्रो क्षेत्रमा रोजगारी खुला गर्ने बताएका थिए ।
