हामीले सरकारसमक्ष पटक–पटक हाम्रो माग राख्यौं । तर, सुनुवाइ भएन । त्यसपछि हामीले आन्दोलन सुरु ग¥यौं । तैपनि बेवास्ता गरियो । त्यसैले बाध्य भएर अनसन थालेका हौं ।
कृतु भण्डारी
अभियन्ता
काठमाडौं– रुसी सेनामा कार्यरत नेपालीको जीवनरक्षाको माग गर्दै सिंहदरबार अगाडि दिनहुँ प्रदर्शन भइरहन्छ । प्रदर्शनकारीहरूले रुसी सेनामा रहेका आफन्तहरूको जीवनरक्षा र पीडितलाई क्षतिपूर्ति उपलब्ध गराउन कूटनीतिक पहल गर्नुपर्ने माग अघि सारेका छन् । घाइतेको उपचार गर्नुपर्ने र बेपत्ताको स्थिति सार्वजनिक गर्नुपर्नेलगायतका माग पनि उनीहरूको छ । तर, प्रदर्शनकारीहरूको यी माग नसुन्ने अवस्थामा सरकार छ । बरू, उल्टै प्रदर्शनकारीहरूमाथि सरकारको दमन भइरहेको छ । दमनका बाबजुद पनि पछि नहटेका प्रदर्शनकारीहरू शनिबारदेखि भने अनसनमा छन् । माइतीघर मण्डलमा उनीहरु अनसनमा बसेका हुन् ।
‘रुसी सेनामा आबद्ध नेपालीको जीवनरक्षार्थ अभियान’की संयोजक कृतु भण्डारीका अनुसार रुसी सेनामा रहेका नेपालीको उद्धारका लागि पटक–पटक रकारको ध्यानाकर्षण गराए पनि सुनुवाइ नभएकाले बाध्य भएर अनसन बस्नुपरेको हो ।‘हामीले सरकारसमक्ष पटक–पटक हाम्रो माग राख्यौं । तर, सुनुवाइ भएन । त्यसपछि हामीले आन्दोलन सुरु ग¥यौं । तैपनि बेवास्ता गरियो । त्यसैले बाध्य भएर अनसन थालेका हौं,’ भण्डारीले प्रभावसँग भनिन् ।
प्रदर्शनकारीहरूको १३ बुँदे माग छन् । ती मागहरू सम्बोधन नहुञ्जेलसम्म अनसन जारी रहने पनि भण्डारीले बताइन् । ‘हामीले १३ बुँदै माग राखेर अनसन थालेका हौं । यी मागहरू नेपाली सपुतहरूको जीवनरक्षार्थ हो । यहाँ केही पनि स्वार्थ छैन र माग सम्बोधन नहुञ्जेल हामी अनसन तोड्दैनौं,’ उनले भनिन्, ‘अनसनमा ४० जनाभन्दा बढी छौं ।’
युक्रेनको कब्जामा रहेका पाँचजना युद्धबन्दीको उद्धार गर्न, मृतकको शव स्वेदश ल्याउन, बेपत्ताको खोजी गर्न, रुसी सेनामा कार्यरत नेपाली नागरिकको तथ्यांक सार्वजनिक गर्न पनि प्रदर्शनकारीहरूले माग गरेका छन् । यसअघि २३ चैतमा भण्डारीसहित रुसी सेनामा रहेका आफन्तहरूले गृहमन्त्री रवि लामिछानेको ध्यानाकर्षण गराएका थिए । त्यसबेला भण्डारीले गृहमन्त्री लामिछानेलाई रुसी सेनामा भएका ६२० जना नागरिकको विवरणसमेत उपलब्ध गराएकी थिइन् । तीमध्ये ३९ जनाले ज्यान गुमाएको अभियानको दाबी छ । प्रदर्शनकारीहरूले गृहमन्त्री लामिछानेलाई ज्ञापनपत्र पनि बुझाएका थिए ।
ज्ञापनपत्र बुझेपछि लामिछानेले रुसी सेनामा गएका नेपालीको समस्याबारे आफू पूर्ण जानकार रहेको भन्दै अन्तरदेशीय समन्वय प्रभावकारी नहुँदा जटिलता देखिएको तर नेपालीहरूलाई रुसदेखि फर्काइदिने आश्वासन दिएका थिए । ‘यो समस्याबारे प्रधानमन्त्रीसँग पनि तत्काल समन्वय गर्छु, कसरी समस्या समाधान गर्न सकिन्छ, त्यो विषयमा छलफल गर्छौं,’ गृहमन्त्री लामिछानेले भनेका थिए, ‘रुसी सेनामा रहेका नेपालीहरूलाई फर्काइदिने भन्दै असुली गर्नेलाई पनि कानुनी दायरामा ल्याउँछौं ।’
तर, लामिछानेले हालसम्म परिणाम देखिनेगरी केही पनि कदम नचालेपछि प्रदर्शनकारीहरू अनसनमा बस्न थालेका हुन् । यसअघि गत चैत ८ गते अर्थमन्त्री वर्षमान पुनले नेपालको परराष्ट्र नीतिविपरीत रुसी सेनाले नेपालीको भर्ती गरेको भन्दै उनीहरूलाई स्वदेश फिर्ता गर्न रुसलाई आग्रह गरेका थिए । रुसी राजदूत अलेक्सेई ए नोभिकोभलाई उनले भर्ती भएकालाई नेपाल फिर्ता, घाइतेको उपचार, मृत्यु भएका नेपालीको शव नेपाल फिर्ता ल्याउन आग्रह गरेका थिए ।
त्यसबेला रुसी राजदूतले रुस सरकारले आह्वान गरेर नेपालीको भर्ती नभएको जिकिर गर्दै सेनामा रहेका नेपाली स्वदेश फिर्ता आउन नचाहेको जवाफ दिएका थिए । अहिलेसम्म केही जोखिम मोलेर भाग्दै नेपाल आएकाबाहेक सरकारी तहबाट एकजना पनि नेपालीको उद्धार भएको छैन । यसप्रति रुसी सेनामा रहेका नेपालीका आफन्तहरू आक्रोशित छन् ।
