काठमाडौं– मलेसिया सरकारले अवैधरुपमा बसिरहेका आप्रवासी कामदारलाई सहज तरिकाबाट स्वदेश फिर्तीको अवसर दिएको छ । मलेसियाले विभिन्न कारणले कानुनी हैसियत गुमाएर अवैधरुपमा बसोबास गरिरहेका आप्रवासी कामदारलाई लक्षित गरी घर फिर्तीको कार्यक्रम ल्याएको हो ।
उक्त कार्यक्रमबाट लाभ लिन मलेसियास्थित नेपाली दूतावासले गैरकानुनी रुपमा बसेका नेपालीहरुलाई आग्रह गरेको छ । मलेसियाले यही २०२४ मार्चदेखि डिसेम्बरसम्मको समयावधि दिएर गैरकानुनीरुपमा बसेका आप्रवासी कामदारलाई घर फर्किन पाउने व्यवस्था गरेको दूतावासले जनाएको छ ।
नेपाली दूतावासले एउटा भिडियो सन्देश जारी गर्दै मलेसियामा विना भिसा प्रवेश गरेका वा भिसाको म्याद गुजारेर बसेका नेपालीहरुको हकमा ५०० मलेसियन रिंगिट जरिवाना तिरेर घर फर्किन सक्ने जानकारी दिएको छ । घर फर्किनका लागि पासपोर्ट नहुनेले ट्राभल डकुमेन्ट बनाउन सक्ने र हवाई टिकटको व्यवस्था गर्नुपर्ने छ । ट्राभल डकुमेन्टको लागि दूतावासमा सम्पर्क गर्न आग्रह गरिएको छ । आफूलाई पायक पर्ने अध्यागमनमा ट्राभल डकुमेन्ट वा पासपोर्टसहित निवेदन दिएपछि घर फिर्तीको मिति प्राप्त हुने छ । यसरी प्राप्त भएको मितिअनुसार १४ दिनभित्रमा घर फर्किने तयारीकासाथ हवाई टिकटको व्यवस्था मिलाउनु पर्ने दूतावासले प्रस्ट पारेको छ ।
अवैधरुपमा रहेका विदेशी कामदारलाई जुनसुकै बेला पनि पक्राउ गर्न सक्ने सम्भावना रहेको भन्दै दूतावासले यसलाई अवसरको रुपमा लिन नेपालीहरुलाई आग्रह गरेको छ । यसबारे विभिन्न माध्यमबाट जानकारी दिँदै आएको दूतावासले उल्लेख गरेको छ । यदि तोकिएको म्याद गुजारी अवैधरुपमा बसेको पाइए मलेसिया सरकारले जेल सजायसमेत तोक्न सक्ने बताइएको छ । मलेसिया सरकारले अवैध रुपमा बस्दै आएका तर घर फर्कन चाहने विदेशी नागरिकको सहजीकरणका लागि अध्यागमन विभागबाहेक कुनै निकाय वा व्यक्तिलाई जिम्मेवारी नदिएको पनि दूतावासले प्रस्ट पारेको छ ।
मलेसिया नेपालीहरुको प्रमुख श्रम गन्तव्यमध्येको एक हो । त्यहाँ चार लाखभन्दा बढी नेपाली कार्यरत हेको त्यहाँको गृह मन्त्रालयले उल्लेख गरेको छ । मलेसियामा हाल १५ हजारभन्दा बढी नेपाली अवैधरुपमा बसेको हुनसक्ने अनुमान गरिएको छ । गत आर्थिक वर्षमा नेपालीहरुको पहिलो गन्तव्य बनेको मलेसिया चालु आवमा भने चौथो स्थानमा पुगेको छ । मलेसियाले ३१ मे २०२४ देखि अर्को निर्णय नभएसम्मका लागि विदेशी कामदार भर्ना नगर्ने निर्णय गरेको छ ।
