काठमाडौं– श्रम, रोजगार तथा सामाजिक सुरक्षामन्त्री डोलप्रसाद अर्यालले नेपाली कामदारको सीप विकासमा आवश्यक सहयोग गर्न कतारसमक्ष आग्रह गरेको छ । मंगलबार नेपालका लागि कतारका राजदूत मिशाल विन मोहम्मद एलएई अन्सारीसँग मन्त्रालयमा भएको भेटवार्ताका क्रममा मन्त्री अर्यालले उक्त आग्रह गरेका हुन् ।
श्रममन्त्रीको सचिवालयले दिएको जानकारीअनुसार नेपालले वैदेशिक रोजगारीका लागि सीपयुक्त कामदार पठाउन चाहेको भन्दै कतारबाट आवश्यक सहयोगको अपेक्षा गरिएको मन्त्री अर्यालले बताएका थिए । ‘हामी सीपयुक्त कामदारको विकास गर्न चाहन्छौं र गन्तव्य मुलुकको आवश्यकताअनुसार नै सीपयुक्त कामदार रोजगारीमा पठाउने पहल गर्ने छौं, त्यसैले कामदारको सीप विकासमा तपाईंहरुलाई सहयोगको लागि आग्रह गर्छौं,’ मन्त्री अर्यालले भने ।
नेपाली कामदारलाई रोजगारीका लागि अवसर दिएकोमा पनि मन्त्री अर्यालले राजदूत अन्सारीमार्फत कतार सरकारलाई धन्यवाद दिए । कतारले नेपाली कामदारलाई समान व्यवहार गरेको भन्नेमा विश्वस्त रहेको बताउँदै मन्त्री अर्यालले कतारले मर्यादित र व्यवस्थित श्रमको अभ्यास गरेको भन्दै खुसी व्यक्त गरे ।
मन्त्री अर्यालसँगको भेटमा राजदूत अन्सारीले नेपाल कतारको दोस्रो ठूलो कामदारको स्रोत मुलुक भएको बताए । उनले नेपाली कामदारको प्रशंसा गर्दै कतारको विकासमा उनीहरुको ठूलो योगदान रहेको स्मरण गरे । नेपाली श्रमिकको सीप विकासका लागि सहयोग गर्न कतार सधैं तयार रहेको उनले स्पष्ट पारे । ‘नेपाली श्रमिकको सीप विकासमा के–के गर्नुपर्छ, प्रस्ताव ल्याउनुहोस्, हामी सबै खालको सहयोग गर्न तयार छौ,’ राजदूत अन्सारीले भने ।
छलफलका क्रममा राजदूत अन्सारीले नेपालबाट घरेलु कामदार लैजाने सम्बन्धमा पनि चासो दिएको बताइएको छ । साथै भेटका क्रममा कतार सरकार प्रमुख अमिर शेख तमिम बिन हमाद अलथानीको नेपालको भ्रमण र नेपालले आयोजना गर्न लागेको लगानी सम्मेलनमा विषयमा पनि कुराकानी भएको सचिवालयले जनाएको छ ।
कतारमा हाल तीन लाख ६७ हजार ३८९ नेपाली कामदार कार्यरत रहेको मन्त्रालयले जनाएको छ । जसमा पुरुषको संख्या तीन लाख ५१ हजार ८३४ छ भने महिला श्रमिकको संख्या १५ हजार ५५५ रहेको उल्लेख गरिएको छ । चालु आर्थिक वर्षको नौ महिनामा विदेश जाने नेपाली कामदारको संख्याको आधारमा कतार तेस्रो गन्तव्य बनेको छ । साथै, कतारले लामो समयदेखि नेपालबाट घरेलु कामदार लैजान पाउनुपर्ने माग गर्दै आएको छ । यस विषयमा अबुधावी डायलगमा पनि कतारले नेपालसँग छुट्टै वार्ता गरेको थियो । कतारले आप्रवासी कामदारको सुरक्षा र न्यूनतम पारिश्रमिकको ग्यारेन्टी गर्न आफू प्रतिबद्ध रहेको बताउँदै आएको छ ।
