काठमाडौं– दक्षिण कोरिया उत्पादनमूलक क्षेत्रका लागि नेपाली कामदार लैजान लिइएको इपिएस कोरियन भाषा परीक्षामा साढे १५ प्रतिशत परीक्षार्थीमात्र उत्तीर्ण भएका छन् । वैदेशिक रोजगार विभागअन्तर्गतको इपिएस कोरिया शाखाका अनुसार एचआरडी कोरिया शाखाले सार्वजनिक गरेको पहिलो चरणको नतिजामा छ हजार ३२१ जनामात्र उत्तीर्ण भएका छन् ।
एचआरडी कोरिया शाखाले गएको फागुन ७ गतेदेखि चैत २४ गतेसम्म लिएको परीक्षामा ४० हजार ५८० जना सहभागी भएका थिए । जसअनुसार परीक्षामा सहभागीमध्ये १५.५७ प्रतिशतमात्र उत्तीर्ण भएका छन् । इपिएस कोरिया शाखाले एक सूचना जारी गरी पहिलो चरणको परीक्षामा उत्तीण भएकाहरुलाई दोस्रो चरणको परीक्षामा सहभागी हुने आग्रह गरेको छ । दोस्रो चरणमा स्किल टेस्ट र कम्पिटेन्सी टेस्ट गरिन्छ । शाखाले पहिलो चरणको परीक्षामा पास भएकाहरूको हकमा २०८१ वैशाख ९ गतेदेखि १५ गतेसम्म दोस्रो चरणको परीक्षा हुने जानकारी दिएको छ ।
दोस्रो चरणको परीक्षा ललितपुरको जावलाखेलस्थित नेपाल प्रशासनिक प्रशिक्षण प्रतिष्ठानमा हुने शाखाले जनाएको छ । शाखाले परीक्षार्थीहरूलाई आफ्नो तोकिएको परीक्षा मिति, समय, र स्थान परिवर्तन गर्न नसक्ने जनाउँदै तोकिएको समयमा उपस्थित हुन आग्रह गरेको छ । तोकिएको मिति र समयभन्दा पछि आएमा प्रवेश नदिइने पनि शाखाले प्रस्ट पारेको छ ।
दोस्रो चरणको परीक्षामा सहभागी हुने परीक्षार्थीले आफ्नो सक्कल पासपोर्ट र प्रवेशपत्र अनिवार्य रूपमा लिनुपर्ने पनि सूचनामा उल्लेख गरिएको छ । अन्यथा परीक्षा स्थलमा प्रवेश नगराइने कोरिया शाखाले जनाएको छ ।दोस्रो चरणको स्किल टेस्ट र कम्पिटेन्सी टेस्टमा सहभागी नहुने परीक्षार्थीको नाम उत्पादनमूलक क्षेत्रको भाषा परीक्षाको उत्तीर्ण सूचनीमा समावेश नगराइने पनि शाखाले जनाएको छ ।
उत्पादनमूलक क्षेत्रमा जानका लागि एक लाख ६३ हजार ६३५ जनाले आवेदन फाराम भरेका थिए । जसमध्ये पहिलोचरणको परीक्षामा ४० हजार ५८० जनालाई सहभागी गराइएको थियो ।अब दोस्रो चरणमा ७९ हजार ९३७ जनाको परीक्षा लिइने शाखाले जनाएको छ । उक्त परीक्षा आगामी वैशाख ३१ गतेदेखि साउन १६ गतेसम्म चल्ने छ । यसैगरी आगामी कात्तिक २६ गतेदेखि पुस २ गतेसम्म लिइने तेस्रो चरणको परीक्षामा ३६ हजार १७९ जना परीक्षार्थी सहभागी हुने जनाइएको छ ।
रोजगारीको आकर्षक गन्तव्य दक्षिण कोरियामा जिटुजी सम्झौताअनुसार इपिएस प्रणालीमार्फत नेपाली कामदार पठाउने व्यवस्था छ । त्यसका लागि भाषा परीक्षा अनिवार्य उत्तीर्ण भएको हुनुपर्छ । भाषा परीक्षापछि लिइने स्किल टेस्टमा उत्तीर्ण भएकालाई मात्र रोजगारीमा लैजाने सूचीमा राखी प्रक्रिया अगाडि बढाउने गरिएको छ ।
