काठमाडौं– इजरायलको दीर्घकालीन स्याहार केन्द्रमा सहायक कामदार (केयर गिभर)को रुपमा जाने सूचीमा रहेका नेपालीहरुको धमाधम करार सम्झौताका लागि माग आउन थालेको छ । युद्धका कारण लामो समयदेखि प्रभावित भएको इजरायलयले पुनः रोजगारीको क्षेत्र खुला गरेपछि नेपालबाट केयर गिभरको रुपमा नेपालीहरुलाई लैजान करार सम्झौता पठाउन थालेको हो ।
युद्ध कम हुँदै गएपछि सुरक्षित स्थानहरुमा रोजगारी दिने प्रतिबद्धता जनाउँदै इजरायलले कामदारहरुलाई करार सम्झौता पठाउन थालेको वैदेशिक रोजगार विभागले जनाएको छ । इजरायलसँग भएको जिटुजी सम्झौताअनुसार छनोटमा परेका एक हजार ६०० केयर गिभरमध्ये बाँकी ४२५ जनालाई इजरायलले लैजान लागेको विभागको भनाइ छ । यसअघि एक हजार १७५ जना केयर गिभर इजरायल गइसकेका छन् ।
युद्धपश्चात् इजरायलमा रोजगारीको अवसरसहित मार्च ३१ अर्थात् चैत १८ गतेसम्म विभिन्न मितिमा ३६ जनाको नाममा करार सम्झौता आएको विभागका निर्देशक एवं सूचना अधिकारी कविराज उप्रेतीले बताए । ‘विभागमा नियमित रुपमा आउने करार सम्झौताअनुसार केयर गिभरलाई पठाउने प्रक्रिया बढिरहेको छ,’ उनले भने, ‘करार सम्झौता आउने क्रम जारी छ, सँगसँगै कतिपय भिसा जारी भएर रोजगारीका लागि इजरायल पुगिसकेका छन् ।’
पछिल्लो समय दीर्घकालीन स्याहार केन्द्रहरुमा कामदारको अभाव बढ्दै गएपछि इजरायलले थप कामदार लैजाने तयारी गरिरहेको बताइएको छ । विभागका अनुसार इजरायलले थप ५०० जना केयर गिभरको माग गरेको छ । इजरायलले युद्ध हुनुअघि नेपालबाट दुई चरणमा एक हजार केयर गिभर लैजाने आवश्वासन दिएको थियो ।इजरायलले स्याहार केन्द्रहरुमा काम गर्न ७० प्रतिशत महिला र ३० प्रतिशत पुरुष माग गर्ने गरेको छ । सोहीअनुरुप छनोटमा परेकाहरुलाई लैजाने गरिएको छ । इजरायल जाने केयर गिभरको रोजगार करार अवधि एक वर्षको हुने भए पनि पाँच वर्षसम्म करार थप गरी बस्न पाइने व्यवस्था छ । केयर गिभरमा इजरायल जाने नेपाली कामदारले मासिक एक हजार ६०० अमेरिकी डलर अर्थात् दुई लाख १० हजार रुपैयाँभन्दा बढी तलब पाउँछन् ।
जिटुजी सम्झौताअनुसार इजरायल जाने नेपाली कामदारको अधिकतम ९० हजार रुपैयाँ खर्च हुने बताइन्छ । सरकारी प्रक्रियाबाट जाँदा लाग्ने लागतको अनुपातमा आकर्षक आम्दानी हुने भएपछि धेरै नेपालीहरु इजरायल जान चाहेको विभागले जनाएको छ । यद्यपि इजरायलले निश्चित कोटामात्रै उपलब्ध गराएका कारण इच्छुक नेपालीहरुलाई पठाउन कठिन भएकाले थप कोटा दिन माग गरिएको निर्देशक उप्रेतीले बताए । सरकारले जिटुजी प्रणालीमार्फत ‘लर्न एण्ड अर्न’ र केयर गिभरमा मात्रै नेपालीलाई इजरायल पठाउँदै आए पनि अन्य क्षेत्रमासमेत पठाउन आवश्यक गृहकार्य गरिरहेको विभागका एक अधिकारीले बताए ।
-1752335779.jpg)
