काठमाडौं– श्रम, रोजगार तथा सामाजिक सुरक्षामन्त्री डोलप्रसाद अर्यालले वीर अस्पतालमा सञ्चालित ‘टेलिमेडिसिन’ सेवाको अवलोकन गरेका छन् । वैदेशिक रोजगारीमा रहेका कामदारहरुलाई लक्षित गरेर सञ्चालनमा ल्याइएको उक्त सेवाको मन्त्री अर्यालले बुधबार अस्पतालमा पुगेर अवलोकन गरेका हुन् ।
वैदेशिक रोजगार बोर्डले कल्याणकारी सेवाअन्तर्गत वीर अस्पतालसँगको सहकार्यमा टेलिमेडिसिन सेवा सञ्चालन गर्दै आएको छ । अवलोकनपछि मन्त्री अर्यालले उक्त सेवालाई थप चुस्त र प्रभावकारी बनाइने बताएको उनको सचिवालयले जानकारी दिएको छ । मन्त्री अर्यालले मंगलबार भएको पत्रकार भेटघाट कार्यक्रममा पनि टेलिमेडिसिन सेवालाई प्राथमिकतामा राख्दै यसको दायरा बढाउन पहल गर्ने बताएका थिए ।
अस्पतालले टेलिमेडिसिन सेवाका लागि नियमित रुपमा मेडिकल अधिकृत र हेल्थ असिस्टेन्ट खटाइएको जानकारी मन्त्री अर्याललाई दिएको थियो । प्रत्येक साताको शुक्रबार र आइतबार कामदारको स्वास्थ्य समस्याको अवस्था हेरी विशेषज्ञ चिकित्सक सेवासमेत उपलब्ध गराउँदै आइरहेको सो क्रममा जानकारी दिइयो । अस्पतालका अनुुसार हालसम्म १८ मुलुकमा रहेका नेपाली श्रमिकले टेलिमेडिसिन सेवा लिएका छन् । दैनिक औसतमा २५ देखि ३० जनाले स्वास्थ्य समस्या राख्ने गरेको अस्पतालले जानकारी दिएको छ । टेलिमेडिसिन सेवामार्फत विभिन्न ११ प्रकारका स्वास्थ्य सेवा उपलब्ध गराउँदै आएको छ ।
विभिन्न अध्ययनले वैदेशिक रोजगारीमा रहेका नेपाली श्रमिकमा स्वास्थ्य समस्या बढ्दै गएको देखाएपछि मन्त्रालयले गत वर्षको चैत १० गतेबाट बोर्डमार्फत टेलिमेडिसिन सेवा सञ्चालनमा ल्याएको थियो । अस्पतालले बिहान १० बजेदेखि बेलुका ६ बजेसम्म उक्त सेवा सञ्चालन गर्दै आएको छ । विदेशमा रहेका श्रमिकले फेसबुक, ह्वाट्सएप, भाइबर, इमोलगायतका सामाजिक सञ्जालबाट आफ्नो स्वास्थ्य समस्याबारे परामर्श लिन सक्ने अस्पतालले जनाएको छ ।
अस्पतालको तथ्यांकअनुसार चालु आर्थिक वर्षको आठ महिना (साउन–फागुन)मा एक हजार ६३२ जनाले टेलिमेडिसिन सेवा लिएका छन् । जसमा सबैभन्दा बढी मलेसियामा रहेका कामदार छन् । मलेसियाबाट ३९४ जनाले सेवा लिएका छन् । त्यस्तै साउदी अरबबाट ३१०, युएईबाट १९२, कतारबाट १७५, कुवेतबाट १७१, कोरियाबाट १५७, ओमानबाट ५७, साइप्रसबाट ५३, जापानबाट ४०, रोमानियाबाट ३५, बहराइनबाट १२, जाम्बियाबाट १०, जर्मनीबाट नौ, माल्दिभ्सबाट सात, इराकबाट चार, माल्टाबाट तीन, बेलायतबाट १० र अफ्रिकाबाट एक जनाले यो सेवा लिएको तथ्यांक छ ।
टेलिमेडिसिन सेवामार्फत ४०० जना कामदारलाई स्वास्थ्य तथा औषधिसम्बन्धी परामर्श उपलब्ध गराइएको अस्पतालले जनाएको छ । जसमध्ये २७३ जनालाई सर्जरीसम्बन्धी परामर्श, १८३ अर्थोपेडिक, २१७ जनालाई इएनटी, १२५ छालासम्बन्धी, २३५ मानसिक समस्या, १९ आँखा, ३१ दाँत, ४२ जनालाई पेट, ४४ जनालाई युरोलोजी र ६३ जनालाई अन्य विभिन्न स्वास्थ्य सेवा उपलब्ध गराइएको अस्पतालको भनाइ छ ।
-1752335779.jpg)
