काठमाडाैं - वरिष्ठ बालसाहित्यकार शान्तदास मानन्धरमा समर्पित बालगीत सार्वजनिक भएकाे छ । शान्तदास नामक बालागीतमा रामबाबु सुवेदीले शान्तदास मानन्धरको जीवनीको सारलाई गीतको माध्यमबाट व्यक्त गरेका हुन् ।
शान्तदासले बालसाहित्यमा पुर्याएको योगदानको कदर र सम्मानभाव प्रस्तुत गीतमा रहेको छ।गीत रोचक र मिठो छ । कथानक अभिव्यक्ति र भावनृत्य शैलीमा निर्माण गरिएको यस गीतमा राराहिल मेमोरियल स्कूल कीर्तिपुरका विद्यार्थीहरूले नृत्य प्रस्तुत गरेका छन् ।
स्कूलमै भएको एक औपचारिक कार्यक्रममा उक्त गीतको भिडियो रिलिज गरिएको छ।कार्यक्रममा नेपाल बालसाहित्य समाजका सल्लाहकार इन्दिरा दली, अध्यक्ष प्रमोद प्रधान, उपाध्यक्ष डा.यादेवी ढकाल, महासचिव बिजयराज आचार्यलगायत बालसाहित्यकारहरूको बाक्लो उपस्थिति थियो ।
अध्यक्ष प्रमोद प्रधानले गीतको माध्यमबाट शान्तदासलाई सम्झन पाउनु एकदमै गर्व रहेको बताए। एभरेस्ट इङ्गलिस स्कूल भक्तपुरका प्रिन्सिपल भक्तराज भण्डारीले पनि शान्तादासले बालबालिकालाई सारै आदर गर्ने कुरा व्यक्त गरे । गीतकार रामबाबु सुवेदीले बताए कि शान्तदास मानन्धर सबैलाई बालसाहित्यमा डोर्याउने एक सवल पथप्रदर्शक, गुरु हुन् त्यसैले समर्पण भावस्वरूप प्रतुत गीत रचिएको हो, उनले भने।
यस्तै भिडियो निर्देशक आचार्य गोपालले बालबालिकाले शान्तदास मानन्धरलाई चिनुन्, बुझुन् भन्ने चाहनाले यो भिडियो निर्माण गरिएको कुरा बताए। यस गीतका प्रायोजक थानेश्वर गिरी र पार्वती क्षेत्री हुन् । गीतका संगीतकार सुविन सेन्चुरी, गायक सुप्रिम मल्ल हुन् भने दिवस धितालको धितिलो छायाँकन र सम्पादन छ।साथै गीतमा सृष्टीकला बज्राचार्यको कोरियोग्राफी रहेको छ।
बालसाहित्यमा विगत ५० वर्षदेखि कलम चलाउदै आएका सुवेदीका आइताबार बिहानै, मेरो गाउँ ज्यामिरे, आमाजस्ती गुरुमा लगायत थुप्रै बालगीतहरु चर्चित छन्। जीवनको ७७ वर्षमा पनि बालसाहित्य र बालगीत लेखनमा उनी सक्रिय रहेका छन् । उनले बालगीतको प्रवर्द्धन गर्न आफ्नै नामको युटुब च्यानल खोलेका छन्, जहाँ बालबालिकाहरूका लागि आजसम्म ६० भन्दा बढी बालागेतका भिडियो निर्माण गरी राखिएका छन्।
