काठमाडौं (प्रस)– युरोप, अमेरिका तथा इजरायलमा बढ्दो नेपाली केयरगिभरको मागलाई मध्यनजर गर्दै केयरगिभर एकेडेमिया सञ्चालनमा आएको छ । अन्तर्राष्ट्रियस्तरको पाठ्यक्रम तथा प्रविधिसहितको तालिम प्रदान गर्ने उद्देश्यसहित एकेडेमिया सञ्चालनमा आएको हो ।
एक दशकभन्दा बढी समय इजरायलमा केयरगिभरको काम गरेका अनुभवी प्रशिक्षकहरुबाट अध्ययन अध्यापन गराउने एकेडेमियाका सञ्चालकले जानकारी दिएका छन् ।
एकेडेमियाले शनिबार एक समारोहबीच आफ्नो कक्षा सञ्चालनमा ल्याएको छ । कक्षा सुभारम्भअघि समाजवादी ट्रेड युनियन महासंघका अध्यक्ष एवं संयुक्त ट्रेड युनियन समन्वय केन्द्र (जेटियुसिसी)का महासचिव नवराज दाहाल, केयरभिगर एकेडेमियाका व्यवस्थापक हिरा लामा, नारायण निरौला, वैदेशिक रोजगार उद्धार श्रमिक संघ नेपालका अध्यक्ष पासाङ दोर्जे लामा, आइल्स प्रशिक्षक टे«नजेम्स, चादनी म्यानेजमेन्ट सर्भिसका सञ्चालक श्याम गुरुङलगायतले संयुक्त रुपमा ‘केयरगिभर एकेडेमिया’उद्घाटन गरे ।
नेपाल सरकार श्रम, रोजगार तथा सामाजिक सुरक्षा मन्त्रालय अन्तर्गतको वैदेशिक रोजगार विभागबाट अनुमति प्राप्त एवं व्यवसायिक सीप तथा तालिम परिषद् (सिटिइभिटी)को सम्बन्धन प्राप्त केयरगिभर एकेडेमियाले डाइमेन्सिया केयर, पार्किन्सन केयर, अस्टिओप्रोसिस केयर, पालियाटिभ केयर, जेरियाट्रिक केयर, हस्पिक केयर, अटिजम केयर, चाइल्ड केयर, सामान्य केयरलगायतका कोर्सहरु सञ्चालन गर्ने मुख्य प्रशिक्षक किरण लामाले बताए ।
हिबु्रलगायत विभिन्न भाषा प्रशिक्षक कमला भण्डारीले प्रशिक्षार्थीहरुलाई आफूहरुले कार्यक्षेत्रमा भोगेका भोगाइ र अनुभव तथा भाषाका कारण उत्पन्न समस्याबारे जानकारी दिइन् । लामो समय केयरगिभरको कार्यअनुभव लिएकी कमला राईले कार्यक्षेत्रमा हुने चुनौतीबारे प्रशिक्षार्थीसँग अनुभव साटिन् ।
अहिले युरोप, अमेरिकालगायत आकर्षक गतन्व्य मुलुकहरुले नेपाली केयरगिभर रुचाएका छन् भने सरकारले ती मुलुकहरुसँग धमाधम श्रम सझदारीअघि बढाएको छ । केयरगिभर एकेडेमिया नेल्स एकेडेमियाको सहायक कम्पनी रहेको व्यवस्थापक हिरा लामाले जानकारी दिए ।
