काठमाडौं– सत्तारूढ गठबन्धनले आगामी राष्ट्रिय सभा निर्वाचनमा प्रमुख प्रतिपक्षी दल नेकपा एमालेसँग सहकार्य नगर्ने भएको छ । शनिबार बालुवाटारमा बसेको सत्तारूढ दलहरूको बैठकले यस्तो निर्णय गरेको हो । यो निर्णयसँगै अब गठबन्धन दलहरूसँग एमालेको सहकार्य सम्भावना सकिएको छ ।निर्वाचन ११ माघमा हुँदै छ । उक्त निर्वाचनको एक्लै सामना गर्नुपर्ने बाध्यतामा एमाले पुगेको हो ।
एमाले उपमहासचिव प्रदीप ज्ञवालीले गठबन्धनसँग चुनावी प्रतिस्पर्धा गर्न एमाले सक्षम रहेको दाबी गरे । स्थानीय, प्रदेश, संघसँगै राष्ट्रपति, उपराष्ट्रपतिसहितको चुनावमा एमालेले गठबन्धनसँग कडा प्रतिस्पर्धा गरेको स्मरण पनि गरे । उनका अनुसार एमालेले राष्ट्रिय सभा चुनाव गठबन्धनविरुद्ध एक्लै लड्छ ।
गठबन्धनसँग हामी चुनावमा डराएका छैनौं । एक्लै लडेकै हो पहिले पनि । लड्छौं । चुनावबाट भाग्दैनौं ।
प्रदीप ज्ञवाली
उपमहासचिव, नेकपा एमाले
‘गठबन्धनसँग हामी चुनावमा डराएका छैनौं । एक्लै लडेकै हो पहिले पनि । लड्छौं । चुनावबाट भाग्दैनौं,’ उनले प्रभावसँग भने ।चुनावमा एमाले शून्य हुने सम्भावना रहँदा अध्यक्ष केपी शर्मा ओलीले यसअघि प्रधानमन्त्री पुष्पकमल दाहाल र कांग्रेस सभापति शेरबहादुर देउवासँग छुट्टाछुट्टै भेटवार्ता गरेर राष्ट्रिय सभा चुनावमा सहकार्यको प्रस्ताव राखेका थिए । उनले संक्रमणकालीन न्याय प्रक्रियासँग सम्बन्धित विधेयक पारित गर्न सहयोग गर्ने भन्दै राष्ट्रिय सभा चुनावमा सहकार्य गर्नुपर्ने बताएका थिए ।
ओलीको प्रस्तावमा दाहाल र देउवा सकारात्मक पनि भए । तर गठबन्धनका दलहरू माधवकुमार नेपाल नेतृत्वको नेकपा एकीकृत समाजवादी र उपेन्द्र यादव नेतृत्वको जनता समाजवादी पार्टी (जसपा)ले विरोध गरे । गठबन्धन दलहरूबीचमात्रै सहकार्य गर्नु उचित हुने नेपाल र यादवको जोड थियो । सोहीअनुसार शनिबार गठबन्धनको बैठकले चुनावमा एमालेसँग सहकार्य नगर्ने निर्णय गरेको हो ।
कांग्रेसका प्रमुख सचेतक रमेश लेखकले सरकारमा सहभागी चार दलका नेताहरूको बीचमा छलफल भएको र छलफलले गठबन्धनभित्रकै दलहरूबीचमा सिट बाँडफाँट गर्ने निर्णय गरेको सञ्चारकर्मीहरूलाई जानकारी दिए । ‘सरकारमा सहभागी चार दलका नेताहरूको बीचमा छलफल भयो । गठबन्धन दलहरू मिलेर चुनाव लड्ने कुरा भयो । राष्ट्रिय सभा सदस्य निर्वाचनको विषयलाई लिएर थप छलफल गर्दैछौं,’ उनले भने, ‘सबैको बैठकबाट राष्ट्रिय सभा सदस्यको बारेमा टुंगो लगाउने निर्णय भएको छ ।’
सरकारमा सहभागी चार दलका नेताहरूबीचमा छलफल भयो । गठबन्धन दलहरू मिलेर चुनाव लड्ने कुरा भयो । राष्ट्रिय सभा सदस्य निर्वाचनको विषयलाई लिएर थप छलफल गर्दै छौं ।
रमेश लेखक
प्रमुख सचेतक, नेपाली कांग्रेस
आगामी फागुन २० पछि पदावधि सकेर बिदा हुने २० जना राष्ट्रिय सभा सदस्यमध्ये एमालेका आठ जना छन् । राष्ट्रिय सभा अध्यक्षसमेत रहेका गणेशप्रसाद तिमिल्सिना, प्रमुख सचेतक भैरवसुन्दर श्रेष्ठ, इन्दु कडरिया, कुमार दसौंदी, दीपा गुरुङ, दिलकुमारी रावल थापा (पार्वती), नरपति लुहार, रामचन्द्र राईको कार्यकाल सकिँदै छ ।
कांग्रेस संसदीय दलका नेता रमेशजंग रायमाझी, प्रमुख सचेतक अनिता देवकोटा, प्रकाश पन्थ र जितेन्द्रनारायण देव, माओवादीका विना पोखरेल, महेशकुमार महरा र हरिराम चौधरी, एकीकृत समाजवादीका नन्दा चपाईं, सिंहबहादुर विश्वकर्मा, जसपाकी प्रमिलाकुमारी यादव, राष्ट्रपतिबाट मनोनीत डा. विमला राई पौड्याल र स्वतन्त्र सदस्य खिमलाल देवकोटाको पनि २० फागुनमै कार्यकाल सकिने छ । चुनाव पौडेलबाहेक सांसदहरूको स्थानमा हुने छ ।
वर्तमान सत्ता गठबन्धन एकताबद्ध भएर चुनाव लडे रिक्त रहेका १९ वटै सिटमा एमाले शून्य हुने अवस्था छ । कुनै पनि प्रदेशमा एमालेले एक्लै चुनाव जित्ने अवस्था छैन । तर, गठबन्धन दलहरूबीच सिट बाँडफाँट टुंगिएको छैन । सिट बाँडफाँटको आधार भने जनमतलाई आधार मान्ने भनिएको छ ।
समाचार तयार गर्दासम्म कांग्रेसले १०, माओवादीले सात, एकीकृत समाजवादी र जसपाले कम्तीमा तीन÷तीन सिट दाबी गर्दै आएका छन् । रिक्त रहेको क्लस्टरका आधारमा दलहरूले सिट बाँडफाँट गर्ने भएका हुन् । तर कांग्रेसले नौ, माओवादीले पाँच, एकीकृत समाजवादीले तीन र जसपाले दुई सिट पाउने सम्भावना रहेको स्रोतको दाबी छ ।
कोशीमा दुई जना, मधेसमा दुई जना, बाग्मतीमा चार जना, गण्डकीमा तीन जना, लुम्बिनीमा दुई जना र कर्णालीमा तीन जना र सुदूरपश्चिममा तीन जना राष्ट्रिय सभा सदस्यका लागि चुनाव हुन लागेको हो ।यसपटक राष्ट्रिय सभा चुनावमा स्थानीय र प्रदेशका गरी दुई हजार ४७ जना मतदाता छन् । स्थानीय तहका प्रमुख÷उपप्रमुख वा अध्यक्ष/उपाध्यक्षको मतभार १९ र प्रदेश सांसदको मतभार ५३ कायम भएको छ । उनीहरूले यही १२ माघमा १९ जना राष्ट्रिय सभा सदस्य पदका लागि हुने चुनावमा मतदान गर्ने छन् ।
चुनाव ११ मा हुँदै छ । जसका लागि यही पुस २३ गते (सोमबार) मनोनयन दर्ता गर्ने निर्वाचन आयोगको तालिका छ । बिहान १० बजेदेखि दिउँसो ३ बजेसम्मका लागि मनोनयन दर्ताको समय छ । यसपछि उम्मेदवारको विरोधमा उजुरी दिने कार्य पुस २४ गते हुने कार्यतालिका छ ।मनोनयनपत्र र उजुरीउपर जाँचबुझ गरी अन्तिम नामावली पुस २६ गते प्रकाशन हुने छ । सोही दिन दिउँसो २ बजे अन्तिम नामावली प्रकाशन गर्ने काम हुने आयोगले जनाएको छ । पुस २८ गते १० बजेदेखि दिउँसो १ बजेसम्म निर्वाचन चिह्न उपलब्ध गराउने र ११ माघको बिहान ९ देखि ३ बजेसम्म मतदान हुने आयोगका सहप्रवक्ता सूर्यप्रसाद अर्यालले जानकारी दिए ।
गठबन्धनसँग सहकार्य खोज्दै राप्रपा
राष्ट्रिय प्रजातन्त्र पार्टी (राप्रपा)ले राष्ट्रिय सभा निर्वाचनमा गठबन्धन दलहरूसँग छलफल गर्ने भएको छ । छलफल गर्ने जिम्मा पार्टी उपाध्यक्ष बुद्धिमान तामाङले पाएका छन् । उनी हाल पार्टीका कार्यबाहक अध्यक्ष हुन् ।पार्टीको शनिबार बसेको कार्यसम्पादन समिति बैठकबाट चुनावी सहकार्यबारे सत्ता गठबन्धनसँग छलफल गर्ने जिम्मा तामाङले पाएका हुन् । उनले प्रधानमन्त्री दाहाल र कांग्रेस सभापति देउवासँग एक चरण छलफल गरिसकेका पनि छन् । तर, कुनै समझदारी नभएको प्रवक्ता सगुनसुन्दर लावतीले जानकारी दिए ।
उनका अनुसार पार्टीले चुनावका लागि उम्मेदवारको भने टुंगो लगाएको छ । गठबन्धनसँग सहकार्य हुने भए नेता उद्धव पौडेललाई उम्मेदवार बनाउने भएको छ । सत्तारुढ दल नेकपा एकीकृत समाजवादीले भने राष्ट्रिय सभाको निर्वाचनका लागि उम्मेदवार छान्ने जिम्मा अध्यक्ष माधवकुमार नेपाल नेतृत्वको तीन सदस्य समितिलाई दिएको छ । समितिमा उपाध्यक्ष राजेन्द्र पाण्डे र महासचिव घनश्याम भुसाल सदस्य छन् ।
शनिबार बसेको सचिवालय बैठकले समितिलाई पार्टीले कति सिट संख्या प्राप्त गर्ने, कुन प्रदेशमा प्राप्त गर्ने र कुन क्लस्टरमा प्राप्त गर्ने भन्ने सम्पूर्ण अधिकार दिएको प्रवक्ता जगन्नाथ खतिवडाले बताए ।
