काठमाडौं - वैदेशिक रोजगार विभागले वैदेशिक रोजगारीमा पठाउने नाममा ठगी गरेको आरोपमा विस एचआर सोलुसन नामको म्यानपावर कम्पनीका सञ्चालकसहित पाँच जनाविरुद्ध मुद्दा दायर गरेको छ । विभागले बिहीबार तीन करोड ८२ लाख २८ हजार ४९८ रुपैयाँ बिगो मागदाबीसहित वैदेशिक रोजगार न्यायाधिकरणमा मुद्दा दायर गरेको हो ।
मुद्दामा विभागले विस एचआर सोलुसन, उक्त कम्पनीका सञ्चालक तुलसीप्रसाद श्रेष्ठ, अमृत श्रेष्ठ, लालबहादुर पुलामी र कर्मचारी फडिन्द्र कोइरालालाई प्रतिवादी बनाएको छ । उनीहरुले सरिता भुजेललगायत ४३ जनालाई पोल्याण्ड, क्रोएसिया, जापान, कतार तथा अमेरिकालगायतका मुलुकमा वैदेशिक रोजगारीका लागि पठाइदिन्छु भनी रकम लिएर विदेश नपठाई ठगी गरेको विभागले उल्लेख गरेको छ ।
विभागका निर्देशक कविराज उप्रेतीले उक्त म्यानपावरका सञ्चालक र कर्मचारीले विदेश पठाइदिन्छु भनेर विभिन्न व्यक्तिसँग एक लाखदेखि ४० लाख रुपैयाँसम्म ठगी गरेको पाइएको बताए । विभागले म्यानपावर कम्पनीको इजाजतपत्र खारेजसहित पीडितबाट लिएको रकम र उक्त रकमको ५० प्रतिशत हर्जना रकम थप गरेर फिर्ता गर्न मागदाबी गरेको छ । त्यस्तै प्रतिवादीहरुलाई तीन लाख रुपैयाँदेखि पाँच लाख रुपैयाँसम्म जरिवाना र तीन वर्षदेखि सात वर्षसम्म कैद सजाय पनि मागदाबी गरेको छ ।