काठमाडौं - इजरायलको दीर्घकालीन स्याहार केन्द्रका लागि सहायक कामदार (केयर गिभर)को रुपमा पुगेका नेपालीहरुको भिसा नवीकरणमा ढिलाइ भएको छ । सरकारी सम्झौताअनुसार जिटुजीमार्फत इजरायल पुगेका एक हजार १४७ सहायक कामदारमध्ये झण्डै ३०० भन्दा बढीको नवीकरणमा ढिलाइ भएको हो ।
तीन सयभन्दा बढी कामदारको भिसा नवीकरणमा ढिलाइ भएको इजरायलस्थित नेपाली राजदूतावासले जनाएको छ । यसअघि नै भिसा नवीकरणको लागि छलफल भए पनि परिणाम आइनसकेको र पुनः छलफल अघि बढाइएको बताइएको छ । नेपाली कामदारहरुको भिसा नवीकरणका लागि कूटनीतिकरुपमा पहल भइरहेको भन्दै यस विषयमा इजरायलको पपुलेसन तथा इमिग्रेसन अथोरिटी (पिवा) सँग पनि संवाद भइरहेको दूतावासका प्रथम सचिव अर्जुन घिमिरेले जानकारी दिएका छन् ।
यद्यपि, भिसा नवीकरण हुन बाँकी कामदारलाई कुनै समस्या नहुने इजरायली पक्षले आश्वासन दिएको बताइन्छ । पछिल्लो समय इजरायलको राजनीतिक तथा सरकारी संयन्त्रमा केही समस्या देखिएका कारण कामदारको भिसा नवीकरणमा ढिलाइ हुन पुगेको बुझिएको छ । इजरायलमा नेपालसहित विभिन्न मुलुकबाट केयर गिभरका लागि कामदार पुग्ने गरेका छन् ।
आकर्षक गन्तव्य मानिएको इजरायल जाने नेपाली कामदारले मासिक एक हजार ६०० डलर अर्थात् हालको विनिमयअनुसार दुई लाख १० हजार रुपैयाँभन्दा बढी पारिश्रमिक पाउने गर्छन् । रोजगारीका लागि इजरायल जाने कामदारको करार सम्झौता एक वर्षको हुने भए पनि पाँच वर्षसम्म भिसा नवीकरण हुने व्यवस्था छ ।
