काठमाडौं– मलेसिया सरकारले आप्रवासी श्रमिक भित्र्याउन निरुत्साहित गर्ने उद्देश्यले थप लेबी बुझाउनुपर्ने नीति अघि सारेको छ । रोजगारदाताले स्थानीयभन्दा आप्रवासी श्रमिकलाई बढी प्राथमिकता दिएर रोजगारी उपलब्ध गराउन थालेको भन्दै सरकारले यसलाई निरुत्साहित गर्न उक्त नीति अघि सारेको हो ।
स्वदेशी श्रमिकलाई नै रोजगारी उपलब्ध गराउने नीतिअनुरुप मलेसियाले निकट भविष्यमा नै विभिन्न चरणमा लेबी बढाउने तयारी गरेको त्यहाँको सरकारी सञ्चारमाध्यम बर्नमाले जनाएको छ । प्रधानमन्त्री अनवर इब्राहिमले निकट भविष्यमा उक्त नीति लागू गर्ने र मलेसियन नागरिक तथा प्रविधिको प्रयोगलाई प्राथमिकताका साथ कार्यान्वयन गर्ने बताएको बर्नमाले उल्लेख गरेको छ । मलेसियाको सरकारले श्रमबजारमा रहेको कूल जनशक्तिमध्ये आप्रवासी श्रमिकको संख्यालाई १५ प्रतिशतमा झार्ने लक्ष्य राखेको बताइएको छ । यद्यपि, मलेसियामा कति आप्रवासी श्रमिक रहेका छन् भन्ने तथ्य खुलाइएको छैन ।
मलेसियामा अदक्ष श्रमिक आपूर्ति भइरहेको भन्दै त्यहाँको आर्थिक अवस्थालाई सुधार्न उल्लेख्यरुपमा सीपयुक्त जनशक्तिको अभाव, न्यून उत्पादकत्व तथा प्रविधिको प्रयोग हुन नसकेकोले त्यसमा सुधार ल्याउन सरकार प्रयत्नशील रहेको प्रधानमन्त्री इब्राहिमले बताएको जनाइएको छ । ‘सरकारले निकट भविष्यमा नै केही महŒवपूर्ण निर्णय लिनेछ, जसले मलेसियामा कार्यरत श्रमिक र रोजगारदाता दुवै लाभान्वित हुनेछन्,’ प्रधानमन्त्री इब्राहिमको भनाइ उद्धृत गर्दै समाचार लेखिएको छ ।
प्रधानमन्त्री इब्राहिमले सरकारले लिने नीतिका कारण न्यूनतम ज्याला वृद्धि, सीप विकासबाट श्रमिक लाभान्वित हुने र उत्पादकत्वमासमेत वृद्धि हुने तथा नरम नीति तथा प्रतिस्पर्धाबाट रोजगारदाता लाभान्वित हुने विचार प्रकट गरेको बताइएको छ । मलेसियाले महिलालाई रोजगारीसँग जोड्न र उनीहरुलाई दीर्घकालसम्म टिकाइराख्न आवश्यक नीति अवलम्बन गरेको छ । यसले पछिल्लो १० वर्षमा महŒवपूर्ण परिवर्तन आएको र सरकारले यसलाई निरन्तरता दिने बताइरहेको सञ्चारमाध्यमले जनाएको छ ।
मलेसिया सरकारको यस्तो नीतिले आप्रवासी श्रमिकहरु प्रभावित हुने देखिएको छ । मलेसियामा नेपाललगायत विभिन्न मुलुकबाट वैदेशिक रोजगारीका लागि पुग्ने गरेका छन् । विदेशीहरुको महŒवपूर्ण श्रम गन्तव्य रहेको मलेसियामा आठ लाखभन्दा बढी नेपाली श्रमिक रहेको बताइन्छ । गत आर्थिक वर्षमा दुई लाख ६० हजारको हाराहारीमा नेपाली श्रमिक मलेसिया पुगेको वैदेशिक रोजगार विभागको तथ्यांकले देखाएको छ ।
मलेसियामा विभिन्न देशका बहुराष्ट्रिय कम्पनीहरुको विस्तार र त्यहाँ उत्पादित सामग्री अन्य देशमा निर्यात गर्नुपर्ने भएका कारण केही दशकयता मलेसियामा विदेशी श्रमिकको ठूलो माग रहेको छ । नेपालबाट जाने अधिकांश श्रमिक औद्योगिक तथा उत्पादन क्षेत्रमा काम गर्ने गरेको बताइन्छ । मलेसियाले आप्रवासी कामदार कटौती गर्ने नीति अघि सारेसँगै नेपालबाट जाने श्रमिकहरुको संख्या पनि घट्दै गएको विभागको तथ्यांकले पनि देखाएको छ ।
