शनिबार मध्यरात एकाएक विश्वभरका नेपालीहरुले प्रयोग गर्ने सामाजिक सञ्जालमा भुसको आगोजस्तै राप एकाएक सल्कियो । कति खाने तरखरमा, कति सुत्ने तरखरमा थिए । यसो मोबाइलमा खोलेर चोरी औंलारे घिसार्दै गर्दा बजारमा आगो सल्किसकेको थियो । सिंहदरबारमा आगो बल्ने भो भनेर !
स्थानीय सरकारका प्रमुख बाऽलेनको आगोले सनसनी फैलिएको थियो । ‘याद राख चोर सरकार’ सरकारमा बस्नेहरु चोरै चोर भए । कसैले सुन चोरे, कसैले धन चोरे, कसैले देशको अस्तित्व नै चोरे । गाउँ चोरे, गाउँलेका मत चोरे । त्यही भएर चोर सरकार भनेपछि चोरलाई साथ दिनेहरु त रन्थनिने नै भए ।
‘याद राख चोर सरकार’ लाई छिनभरमा लाखौंले समर्थन जनाए । किन समर्थन जनाए । सरकार चोर भएर ? सरकारको काम चोर भएर ! के भएर ? किन त्यत्ति धेरै चोर औंलाहरुले ड्याम्म–ड्याम्म लाइक ‘क्लिक’ हान्दिए ! त्यसै चोर औंलाहरु मोबाइलका स्क्रिनमा मख्ख परे । विश्व नै सामाजिक सञ्चालमा दंग छ, त्यसैले होला ‘याद राख चोर सरकार’ मा सबै दंगदास देखिए ।
स्वदेश अनि विदेशमा बास बसेका सबैले क्या वात बाऽलेन, बल्ल थाहा पाए चोरहरुले ! भन्दिए । ‘कुरा के हो पत्तै भएन पूरै धराने लिएर सिंहदरबार जलाउन आउँछु’ भनेर अर्को सरकारका प्रमुखले ठोक्दिए । धरानेसहित सिंहदरबार जल्ने डरले रातभर दमकल कुदेको कुद्यै ! सिंहदरबारमै आगो बल्ने भएपछि सिंहदरबारभित्र बस्ने चोरहरु झस्केर डरले थुरुरु ! बहत्तरको भुइँचालोले हल्लाएको जस्तो हल्लेको हल्यै । न झस्केर, नहल्लेर पनि के गर्नु, कुनबेला आगो बल्ने नै थाहा छैन । हिजो सिंहदरबार चलाएका बा र अहिले सहर हाँकेका लेनको मार्ग नै खुट्याउन गाह्रो छ । काठमाडौंको ट्राफिक बत्तीजस्तो ! कुनबेला रातो बत्ती बल्छ कुनबेला हरियो बत्ती थाहा नै नहुने !
ऊ बेला बाको कस्तो उखान आउने हो पत्तो हुँदैनथ्यो । अहिले बालेनको कस्तो टुक्का आउँछ थाहै हुँदैन । सबै तीन छक्क । बाले बोल्दा हाँसोको फोहोरा, बालेनले लेख्दा कमेण्ट र सेयरा ।नहोस् पनि किन बालेनलाई जे सुकै होस्, बालै भएन । न त पार्टी चलाउन उठाउनुछ, न त कार्यकर्ता नै पाल्नुछ । जसरी हुन्छ जनताले उहिल्यैदेखि चोर भनेकालाई चोर नै हुन् भन्ने देखाउनुछ ।
ए बाऽबाऽ होइन मान्छेले किन बुझ्दैनन हो । स्वतन्त्र भन्या निर्दलीय हो । निर्दलीय भएपछि दलीयलाई त उछितो काट्नप¥यो नि ! निरंकुश भयो भन्छन् । यत्रा पढेलेखेका मान्छे बस्ने सहराँ निरंकुश हुन सक्नु पनि ठूलै कुरा हो नि । राम्रो गर्दा नि सुख छैन नराम्रो गर्दा पनि सुख छैन, गर्नेचाहिँ के हो के ?त्यसमाथि पनि नेपालाँ त पर्चाकारिता फस्टाको छ । तँ यो दलेको म यो दलेको । त्यही दलेदले हुँदै गर्दा ट्युवेले खेला खेल्दिएको छ । भाको नभाको चौपट्टै पार्दिन्छन् । कहाँको फोटो कहाँ लगेर हुल्दिन्छन्, अनि भन्छन् हेर्नु करामत !
त्यसका बाजे लोग्नेस्वास्नीको झगडा गराएर । सडकाँ उफारेर करामत हुन्छ ? करोडौं खर्च गरेर खोलेको टिभीमा देखाएको कुरा त सत्य हुँदैन अनि फेसबुकाँ लेख्या कुरा सत्य भनेर पत्याउने ? सिंहदरबारमा आगो लगाइदिन्छु पो भनेको त, लगाइहालेको त हैन नि ! त्यसमाथि पनि सिंहदरबारमा दिनदिनै आगो लाग्या छ देख्नुपर्दैन ?
कुन सांसद र कुन मन्त्री कुनबेला जेल जाने हो पत्तै नभए मनभित्र आगो बलिरहेको छ । कर्मचारीहरुलाई रातो घरले कुनेबेला च्याप्पै समातेर अनुहार हेर्नैै नहुनेगरी ससुरालीमै पु¥याउने डरले मुटुभित्र आगो लागिरहेको छ । सिंहदरबारभित्र दिनदिनै पातपतिंगर बालेर आगो बलिरहेको छ । सिंहदरबारभित्र पहिले–पहिले रुखबाट झरेका पातहरु, फोहोरहरु त्यही बालिन्थ्यो । अब त्यो पातलाई र फोहोरलाई सिसडोलसम्म किन पु¥याउनु त्यही आगो बाल्न पो खोज्या हो कि ?
बा अर्थात् पिता लेन भनेको बाटो । अनि स्थानीय सरकारको पिताले देखाएको बाटो खुरुखुरु नहिँडेर खोल्सा–खोल्सी ताकेर हुन्छ । सही बाटो पो हिँड्नुप¥यो नि ! ऊ बेला मट्यांग्रा हजुरबाले भन्थे, ‘तँ हेर म हेर, ठाउँ हेर बेला हेर’ । त्यही हेरेर पो कुरा गर्नुपर्छ त । कस्तो ठाउँमा कुन समयमा कोसँग बोलेको छ भन्ने कुरा हेक्का त राख्नुप¥यो नि ! त्यत्तिकै थरऽर रऽररऽ काँप्नुपर्छ र ? सिंहदरबार त आफैं गर्जिने सिंह पो हो त । सयौं वर्षदेखि गर्जेको गज्र्यै छ । सिंहदरबार त गर्जिनेमात्र हो । अरु कुरा त ‘न्याय नपाए गार्खा जानु’ त्यसै भनेको छैन ।
सिंहदरबारले न्याय दिँदैन । त्यही न्याय नदिएकै भएर जनता जनार्दनले पनि निर्दलीयलाई भोट दिएका । सेना पुलिसको घेराभित्र बसेर सिंह गर्जिएजस्तै गर्जिनेमात्र हो, सिंहदरबार । त्यही भएर हजुरबाले पनि चोर बस्ने ठाउँ भन्थे, बाले पनि चोरहरु बस्ने ठाउँ भने छोराको त के कुरा गर्नु नातीले समेत चोर बस्ने ठाउँ भन्न थाल्या छ । हो गर्जिने भनेकै चोर हो । त्यही भएर एउटा सरकारले अर्को सरकारलाई चोर भन्न नपाउने ! सर्पले पो सर्पको खुट्टा देख्छ । त्यसमाथि पनि ३० सालमा आगो लगाएकै हो नि त सिंहदरबारमा ! पाल्पा दरबार पनि आगै लगाको हो ।
३० सालमा सिंहदरबारमा आगो लगाको, ६० तिर पाल्पा दरबारमा आगो लगाको । अनि पाल्पामा आगो लगाउने मान्छे नै सिंहदरबारमा गर्जेको बेला ८० सालमा फेरि सिंहदरबारमा आगो लगाउछु भन्न नपाउने ! यति भन्दा किन झस्किनु हो सिंहदरबार । कठै सिंहदरबार १६ महिनादेखि झस्केको झस्क्यै छ । अब यसरी झस्किरहेपछि त सातो गाको हुनसक्छ ! त्यो सातो हटाउनका लागि सिंहदरबारमा आगो लगाएर खली ख्वाउने पो भनेको । खरानी बनाउने कहाँ भन्या हो र !
‘कस्ता–कस्ता आए, गुलेली खेलाए, मट्यांग्रा सत्यानाश !’
