- महाधिवेशनबाट नेतृत्व हस्तान्तरण गर्ने घोषणा गरिसकेको भन्दै तत्काल नेतृत्व नछाड्ने अडान
- स्वास्थ्यका कारण देखाउँदै पार्टीका उपसभापति पूर्णबहादुर खड्कालाई दिए कार्यवाहक सभापतिको जिम्मा
- देउवा दम्पती उपचारका लागि सिंगापुर जाने तयारी
- घरमा जलेका नोटहरु ‘फेक’ भएको र यसको छिट्टै छानबिन गर्न माग
- देशलाई पुनः संवैधानिक बाटोमा फर्काउने आधार निर्वाचन भएको विश्वास व्यक्त
- विशेष महाधिवशेन माग्दै हस्ताक्षर बुझाउन आएकालाई सम्हाल्न गगन विश्वलाई धौ–धौ
काठमाडौं– नेपाली कांग्रेसका सभापति शेरबहादुर देउवा जेन–जी आन्दोलनपछि पहिलोपटक मंगलबार सार्वजनिक भएका छन् । ललितपुरको सानेपास्थित पार्टी कार्यालयमा आयोजित कांग्रेस केन्द्रीय समिति बैठकमा उपस्थित भएर उनले सम्बोधन गरेका हुन् ।
उक्त बैठकलाई सम्बोधनसँगै उनले उपसभापति पूर्णबहादुर खड्कालाई कार्यवाहक सभापति तोकेका छन् । देउवाले स्वास्थ्यको कारण देखाउँदै खड्कालाई कार्यवाहकको जिम्मेवारी तोकेका हुन् । ‘मेरो स्वास्थ्यका कारणले मैले पार्टीका उपसभापति पूर्णबहादुर खड्कालाई कार्यवाहक सभापतिका रुपमा काम गर्ने गरी तोकेको छु,’ देउवाले भने ।
जेन–जी प्रदर्शनमा भदौ २४ गते आफ्नै निवासमा कुटिएका उनी ३४ दिनपछि सार्वजनिक हुँदै कांग्रेस केन्द्रीय समितिलाई सम्बोधन गरेका हुन् । आफूलाई बेलाबेला चक्कर लाग्ने भएकाले केन्द्रीय समितिमा लामो समय बस्न नसक्ने देउवाले बताउँदै केन्द्रीय समितिसमेत भोलि बिहीबार १ बजेसम्मका लागि स्थगित गरेका छन् ।
देउवासँगै उनकी पत्नी डा. आरजु राणा देउवा पनि मंगलबार बैठकमा उपस्थित भइन् । भदौ २४ गते बूढानीलकण्ठस्थित निवासमा डा. राणा पनि कुटिएकी थिइन् । देउवा दम्पती मंगलबारको बैठकमा उपस्थित भएसँगै कांग्रेस लयमा फर्किएको बताइएको छ । खड्कालाई कार्यवाहक दिएर देउवा दम्पती थप उपचारका लागि केही समय सिंगापुर जाने तयारीमा छन् ।
तोकेनन् महाधिवेशन
कांग्रेसमा अहिले नेतृत्व परिवर्तनको माग चर्किएको छ । देउवाले आफ्नो सम्बोधनमा महाधिवेशन घोषणा गर्ने अनुमानसमेत गरिएको थियो । तर देउवाले नेतृत्व छाड्ने संकेत गरे पनि घुमाउरो पारामा महाधिवेशन लम्ब्याउने संकेत गरेका छन् ।
‘पार्टीको आन्तरिक जीवन, आगामी १५औं महाधिवेशन र नेतृत्व हस्तान्तरणका सवालहरु उठेका छन् । म साथीहरुलाई के आग्रह गर्न चाहन्छु भने ‘घरमा सधैं एकै जना मुली रहँदैन’ पार्टीमा पनि हमेसा एकै जना सभापति रहिरहँदैनन् । जहाँसम्म मेरो विषय छ, मैले पहिले नै हाम्रो वैधानिक व्यवस्थाले र मेरो राजनीतिक इच्छाले १५औं महाधिवेशनबाट पार्टी नेतृत्व विधिवत्रुपमा हस्तान्तरण गर्छु भनिसकेको छु,’ नेतृत्व परिवर्तनबारे देउवाले भने । देउवाले तोकिएकै मितिमा महाधिवेशन गर्ने भनिए पनि कहिले गर्ने हो भन्ने विषयमा स्पष्ट पारेनन् ।
कांग्रेस महामन्त्री गगन थापाले भने यो देउवाको अन्तिम केन्द्रीय समिति भएको र सभापतिको सक्रिय भूमिकाबाट बिदा लिएको दाबी गरेका छन् । ‘आज पार्टी कार्यालयमा सभापतिले केही महŒवपूर्ण निर्णय गर्नुभएको र उहाँको एकप्रकारले भन्ने हो भने सभापतिको हिसाबले आज अन्तिम सम्बोधनजस्तै पनि भयो,’ महामन्त्री थापाले भने । कांग्रेसले असोज २६ गतेका लागि बोलाएको केन्द्रीय समिति अब ३० गतेका लागि धकेलेको छ । देउवाले महाधिवेशन तोक्ने जिम्मा केन्द्रीय समितिलाई तोकेका छन् ।
भदौ २४ गते डरलाग्दो दिन
कांग्रेस सभापति शेरबहादुर देउवाले भदौ २४ गतेको दिन डरलाग्दो दिनका रुपमा लिपिबद्ध हुने बताएका छन् । ‘सम्भवतः यो नेपालको इतिहासमै एउटा डरलाग्दो दिनको रुपमा लिपिबद्ध हुने छ,’ देउवाले भने । उक्त दिन देउवा कुटिएका थिए भने बूढानीलकण्ठस्थित देउवा निवासमा आगजनी भएको थियो । देउवाका गर्धनमा कुटपिटबाट गम्भीर चोट लागेका कारण १२ टाँका लगाइएको थियो । केन्द्रीय कार्यालयसहित ४८ जिल्लाका कांग्रेस पार्टी कार्यालय र करिब १२५ जना नेताको निजी घर र डेरामा आक्रमण, तोडफोड, लुटपाट र आगजनी गरिएको सभापति देउवाले उल्लेख गरे ।
देउवाले आफ्नो घरमा जलेको नोट देखाउँदै ‘फेक’ भिडियो बनाएको दाबी गर्दै यसको अनुसन्धान गर्नसमेत आग्रह गरेका छन् । ‘सामाजिक सञ्जालमा आएको अरु देशको भिडियोहरुबाट चोरेर मेरोमा देखाएछ । मेरो खिलाफमा फेक भिडियो बनाए । यसमा छिट्टै छानबिन होस्,’ देउवाले भने । देउवाको घर जलेपछि धेरैजसोले पैसा पाएको भन्दै जलेका पैसाको भिडियो र फोटो सामाजिक सञ्जालमा राखेका थिए ।
राष्ट्रपति पौडेलको प्रशंसा
देउवाले गत भदौ २४ गतेको कठिन अवस्थामा राष्ट्रपति रामचन्द्र पौडेलले परिपक्व भूमिका निभाएको भन्दै प्रशंसा गरेका छन् । ‘भदौ २४ गतेको कठिन अवस्थामा महत्वपूर्ण भूमिका खेल्नुभएकोमा म राष्ट्रपति रामचन्द्र पौडेलज्यूलाई हार्दिक धन्यवाद दिन चाहन्छु । त्यो प्रतिकूल समयमा उहाँको परिपक्व भूमिकाले मुलुकमा देखा पर्न सक्ने अर्को संकट रोकिएको छ,’ देउवाले भने ।
सभापति देउवाले विगत ८० वर्षमा कांग्रेस नेपालको सबैभन्दा विश्वसनीय, नेपाली जनताको आस्थाको केन्द्र र सबैभन्दा ठूलो र मियो पार्टीका रुपमा रहँदै आएको बताए । उनले कांग्रेसको एकता आजको आवश्यकता भएको बताउँदै देशमा संकट उत्पन्न भएको वर्तमान अवस्थामा हाम्राबीचमा विद्यमान व्यक्तिगत वा समूहगत मतभेद, द्वन्द्व, असहमति सबैलाई थाँती राखेर एकतावद्ध हुनुपर्ने बताए ।
‘निर्वाचनका लागि वातावरण बनोस्’
सरकारले आगामी फागुन २१ गते प्रतिनिधिसभाको निर्वाचन गर्ने मिति तोकेको छ । यसका लागि स्वतन्त्र, निष्पक्ष र भयरहित निर्वाचनको वातावरण तयार हुनुपर्नेमा देउवाको जोड रह्यो । ‘निर्वाचनका लागि आवश्यक शान्ति सुरक्षा सुनिश्चित गर्ने र शान्तिपूर्ण निष्पक्ष एवं भयरहित वातावरणमा निर्वाचन सम्पन्न हुन्छ र सबैले स्वतः स्फूर्तरुपमा निर्वाचनमा भाग लिने अवस्था निर्माण हुन्छ भन्ने कुराको सुनिश्चितता गराउने जिम्मा सरकारको हो,’ देउवाले भने । यसतर्फ सरकारको ध्यान जानुपर्ने बताउँदै उनले सरकारले निर्वाचनका लागि वातावरण बनाउन सकेमा देशलाई पुनः संवैधानिक बाटोमा फर्काउने आधार निर्वाचन भएको भन्ने विश्वास व्यक्त गरे ।
हस्ताक्षर नबुझेपछि लफडा
कांग्रेस केन्द्रीय समितिको मंगलबारको बैठकमा केन्द्रीय सदस्य मधु आचार्यसहितको टोलीले सभापति शेरबहादुर देउवालाई विशेष अधिवेशनको माग गर्दै संकलन गरिएको हस्ताक्षर बुझाउने तयारी गरेको थियो । तर, देउवाले उक्त हस्ताक्षर बुझेनन् । कार्यवाहक सभापति पूर्णबहादुर खड्कालाई बुझाउनू भन्दै देउवा केन्द्रीय कार्यालयबाट निस्किए ।
कार्यवाहक सभापति खड्काले साँझ हस्ताक्षर बुझ्ने भनेका थिए । उनी पनि नआएपछि हस्ताक्षर लिएर पार्टी कार्यालय आएका कार्याकर्ता महामन्त्रीद्वय गगन थापा र विश्वप्रकाश शर्मासँग झोक्किए । महामन्त्रीद्वयलाई यसबारे सम्झाउन हम्मे परेको थियो । सभापति देउवाले नियमित महाधिवेशन गर्ने वचन दिइसकेकोले विशेष महाधिवेशनको आवश्यकता अब नपर्ने महामन्त्री थापाले बताएका छन् ।
मंगलबार नबुझेको उक्त हस्ताक्षर कार्यवाहक सभापति खड्कालाई आज बुझाउने तयारी छ । विशेष महाधिवेशनको पक्षमा ५४.५८ प्रतिशत प्रतिनिधिले हस्ताक्षर गरेको गगननिकट केन्द्रीय सदस्य अजयबाबु शिवाकोटीले दाबी गरेका छन् ।
कांग्रेसको विधानअनुसार विशेष महाधिवेशन डाक्न ४० प्रतिशत प्रतिनिधिको हस्ताक्षर चाहिन्छ । कांग्रेसको १४औं महाधिवेशनमा चार हजार ७४३ महाधिवेशन प्रतिनिधि भए पनि पार्टी परित्याग गरेका र मृत्यु भएका कारणले अहिले चार हजार ५५६ प्रतिनिधि छन् । तीमध्ये दुई हजार ४८७ ले विशेष महाधिवेशनको पक्षमा हस्ताक्षर गरेका शिवाकोटीको दाबी छ ।
