काठमाडाैं - सुनको भाउ उच्च भएको अवस्थामा सुनचाँदी लुटपाटका घटना दिनहुँ बढेकाे भन्दै सुनचाँदी व्यवसायीहरूले सरकारसँग सुरक्षा मागेका छन् । सर्वसाधारण मात्र नभई सुनचाँदी पसलहरूमा समेत लुटपाट बढेको भन्दै सुनचाँदी व्यवसायीहरूले सरकारसँग सुरक्षा माग गरेका हुन्।
नेपाल सुनचाँदी व्यवसायी महासंघले आइतबार एक विज्ञप्ति जारी गर्दै व्यवसायीहरु आर्थिक मन्दी समस्याबाट गुज्रिरहेको अवस्थामा चोरी र लुटपाटका घटना बढेको भन्दै शान्ति सुरक्षाको प्रतयाभूति दिलाउन सरकारसँग माग गरेको हो ।
असार १० गते अर्थात् आइतबार बिहान २ बजे महोत्तरीका न्यू साई ज्वेलर्सका संचालक कृण्ण देवी र श्रीहरी ज्वेलर्सका संचालक चन्दा कुमार साहको पसलको ताला तोडेर गरगहना चोरी भएको महासंघले जानकारी दिएको छ ।
यसैगरी, सो पसलबाट लकर र गरगहना सहित ठुलो रकम पनि चोरी भएको भन्दै महासंघले चोरी गरी फरार रहेका व्यक्तिको खोजी गरी कारवाही गर्न माग समेत गरेको विज्ञप्तीमा उल्लेख गरेको छ ।
लुटपाटको क्रममा अज्ञात समूह संलग्न भएको पाइएको र सो समूहको तत्काल पहिचान गरी आवश्यक कारबाही गर्ने माग रहेको समेत महासंघका प्रवक्ता मनोजकुमार साहले बताएका छन् ।
यसकासाथै हाल व्यवसायीहरू आर्थिक समस्याबाट गुज्रिरहेको साथै सुनको दरभाउ उच्च भएको बेलामा चोरी र लुटपाटका घटनाहरू झनै बढ्न सक्ने भएकोले यसमा सचेत रहन महासंघले आग्रह गरेको छ। त्यस्तै सरकारलाई शान्ति सुरक्षाको प्रत्याभूति दिलाउन महासंघले माग गरेको छ।
