हेमराज भट्ट
नेपालगञ्ज/बिमानस्थल अति सम्बेदनशिल क्षेत्र हो, जहाँ सुरक्षा देखि अग्नी नियन्त्रण सम्मका लागि दक्षजनशक्ति अहरोत्र खटिनुपर्दछ । कुनै पनि बेला बिमानस्थलमा घटना, दुर्घटनाहरु हुनसक्दछन् । सम्भावित दुर्घटना हुन नदिन उच्च सर्तकता जरुरी हुन्छ । तर नेपालगञ्ज बिमानस्थलमा रहेको अग्नी निवारण तथा जीवन उद्धार शाखा जनशक्तिको अभावमा कार्यगरिरहेकोछ । लामो समय देखि कर्मचारी दरबन्दी रिक्त हुँदा उक्त शाखा जेनतेन चलिरहेकोछ ।
२४ सै घण्टा सतर्क अवस्थामा रहनु पर्ने शाखामा लामो समय देखि कर्मचारी दरबन्दी पूर्ण नहुँदा भएका कर्मचारीहरुले सास्ति भोगेर काम गर्नु परिरहेकोछ । बिमान स्थलमा आवागमन गर्ने विमानहरुको सुरक्षा तथा सम्भावित जोखिम न्यूनिकरणका लागि खटिनुपर्ने उक्त संबेदनशिल शाखामा दरबन्दि अनुसारको जनशक्ति नपठाउनु नागरिक उड्ययन बिभागको चरम लापरवाही र बेवास्ता हो ।
पदपूर्तीका लागि पटक—पटक बिभाग, केन्द्रसँग माग गर्दा पनि सम्बन्धित निकायले चासो नदेखाएको श्रोत बताउँछ । जानकारी अनुसार, सो शाखामा १७ जना कर्मचारीहरुको दरबन्दि रहेको छ तर हाल ११ जना कर्मचारीहरु मात्रै कार्यरत छन् जसमा २ जना काजमा अन्यत्रै खटाईएपछि ९ जना कर्मचारीहरुले सो भार थेगिरहेका छन् । कर्मचारी कम हुँदा हाजिर भएका कर्मचारीहरुले बढि समय खटिनुपर्ने बाध्यता रहेको एक कर्मचारीले बताए ।
दोहोरो ड्युटीको मारमा परेपछि कर्मचारीहरुले समेत थप कर्मचारी माग गर्दै कार्यालय तथा युनियनहरुसँग पटक—पटक हार गुहार गर्दापनि समस्या समाधानकोे पहल नभएपछि खाए खा, नखाए घिच् भनेझैं जवरजस्ति काम गर्न बाध्य भईरहेको कर्मचारीहरुको भनाईछ । हप्तामा एक दिन कर्मचारीले बिदा लिन पाउने प्रावधान भएपनि सो शाखाका कर्मचारीहरुले बिदा नपाउने गरेको बताईन्छ । बढि समय काम गरेमा थप पारिश्रमिक पाउने प्रावधान भएपनि सो पारिश्रमिकबाट बञ्चित भईरहेको श्रोतले बतायो । जोखिमको आधारमा कर्मचारी सँख्या बढ्दै जानुपर्नेमा बर्षेनी कर्मचारीको संख्या घट्दै गएको बताईन्छ । १७ जनाकै दरबन्दि पूर्ण हुन नसकेपनि १२ जना सम्म नियमित कर्मचारी पुर्ती गरी ६ जनाको दुई सिफ्ट बनाएमा कर्मचारी मारमा नपर्ने एक कर्मचारीले बताए ।
बिमानस्थलको अग्नी निवारण तथा जीवन उद्धार शाखाले शहरमा हुने आगलागीमा समेत सहयोग गर्ने भनिएपनि बिमान स्थलकै सुरक्षाका लागि खट्नुपर्ने जनशक्ति अभाव भएपछि बाहिर हुने आगलागिमा बिमान स्थलको फायर फाईट टिम जाने कार्य असम्भवप्रायः बन्दै गएको बताईन्छ । बिमान स्थलको फायर फाईट टिम आगलागि नियन्त्रणमा जान नसकेपछि बाहिर हुने आगलागि नियन्त्रणका लागि नेपाली सेना र प्रहरी खटिदै आएको छ । बिमानस्थलको अग्नी निवारण शाखाका कर्मचारीहरुलाई गाडी अपरेट गर्ने, पाईप समात्ने, बिशेष प्रकारको सुट सहित अग्नी नियन्त्रणको बिशेष प्रकारको तालिम प्रदान गरिएको हुन्छ ।
यस बारेमा नागरिक उड्ययन कार्यालय नेपालगञ्ज बिमानस्थलका अग्नी निवारण तथा जीवन उद्धार शाखाका प्रमुख प्रेम बहादुर चन्दलाई सोध्दा उनले जवाफ दिन चाहेनन् । कर्मचारी समस्याका बारेमा कार्यालय प्रमुख प्रताप बाबु तिवारीले भने बर्षैनि माग गर्दा समेत केन्द्रले कर्मचारी नपठाउँदा पूर्ण हुन नसकेको बताए । दोहोरा ड्युटी गरेको कर्मचारीलाई थप सुविधाको ब्यवस्था गरेको भन्दै दुर्घटना भईहाले पछि १७ जनाले समेत नपुग्ने भन्दै सेनाको सहयोग लिनै पर्ने प्रतिक्रिया दिए । बिमानस्थल बाहिरको अग्नी नियन्त्रणको सवालमा उडान नभएको अवस्थामा मात्रै सहयोग गर्न सक्ने अवस्था रहेको उनले बताए । नेपालको हवाई सेवा जोखिमपूर्ण रहेको समाचारहरु आईरहेको बेला बिमान स्थलमा रहेको रेस्क्यु टिम पूर्ण नहुनु सामान्य होईन । यसतर्फ सम्बन्धित निकायको ध्यान जान जरुरीछ ।
