काठमाडौं- नेपाली कांग्रेसको १५औँ महाधिवेशनअन्तर्गतको निर्वाचनका लागि सभापति पदमा उम्मेदवारी दिएका किशोरसिंह राठौरले उम्मेदवारी फिर्ता लिएका छन्।
उनले आज पत्रकार सम्मेलन गरी आफ्नो उम्मेदवारी फिर्ता लिएका हुन्।
“विशेष परिस्थितिमा महाधिवेशन हुन लागेको, पार्टी संकटमा रहेको अवस्थामा वर्तमान सभापति गगनकुमार थापाले सहयोग गर्नुपर्यो भनेका कारण पार्टीको बृहत्तर एकताका लागि उम्मेदवारी फिर्ता गरेको छु,” नेता राठौरले पत्रकार सम्मेलनमा भने।
यसअघि मंगलबार अन्तिम उम्मेदवारी दर्ताको अन्तिम समयमा राठौरले सभापति पदमा उम्मेदवारी दर्ता गराएका थिए। उनले कांग्रेस लोकतान्त्रिक पार्टी भएकाले कुनै पनि नेतालाई निर्विरोध निर्वाचित हुनेगरी चुनावमा जान नहुने उल्लेख गरे।
नेता राठौरले उम्मेदवारी फिर्ता लिएसँगै सभापतिका लागि थापा र श्यामकृष्ण खड्कीबीच प्रतिस्पर्धा हुने भएको छ।
