- रोजगारदाताले हातमा टोकेर रगतै निकालिदिएको फोटो पठाएपछि एक महिलालाई नेपाल झिकाउने पहल थालेका उनका आफन्त रत्न सुनुवारले बताए
- कुवेतस्थित नेपाली दूतावासले भने दूतावास आफैँले उद्धार गर्न नमिल्ने तर दूतावाससम्म आए नेपाल पठाउन सकिने जनाएको छ
काठमाडौं- रोजगारीको लागि कुवेत गएकी २७ वर्षीया महिला घरेलु हिंसाको शिकार भएकी छन् । घरेलु कामदारका रुपमा गत चैत २७ गते कुवेत गएकी सुर्खेत लेकबेँसी नगरपालिका-१ की ती महिला कुवेतको अल जाहरा भन्ने स्थानमा रहेको बताइएको छ ।
पीडित महिलाका भेना रत्न सुनुवारका अनुसार कुवेतमै कार्यरत उनकी साथीले फ्रि-भिजा फि-भिजा टिकटमा कुवेत आउन मिल्छ भनेपछि उनी त्यता पुगेकी थिइन् । उनीसँगै अर्की एक जना महिला पनि साथमै पुगेकी थिइन् । ‘उनीहरु फ्रि-भिजा, फ्रि-टिकटमा गएका हुन् । सबै कुरा फ्रि भनेपछि त्यसकै प्रलोभनमा परे । त्यहाँ दुबैजना छुट्टाछुट्टै ठाउँमा छन्,’ सुनुवारले भने । महिनामा ४०-४५ हजार कमाइ हुन्छ भनेर बोलाइपछि उनीहरु कुवेत पुगेका थिए ।
पीडितले त्यहाँ धेरै यातना खेप्नुपरेको गुनासो सुनाएको सुनुवारले बताए । ‘मालिक्नीले खाना नदिई भोकभोकै राख्ने, हातमा टोकिदिने, कुटपिट गर्ने गर्दो रहेछ । एक दिनमा तीनदेखि चार घण्टामात्र सुत्न दिने रहेछ,’ सुनुवारले भने, ‘हातमा टोकेर रगतै निकालिदिएको फोटो पठाएपछि हामीले नेपाल झिकाउने पहल थालेका छौं ।’ पीडितले गएको एक महिनापछि हिंसामा परेको सुनाएको उनले बताए ।
उनका अनुसार त्यहाँ रहेको नेपाली दूतावासमा सम्पर्क गर्दा दूतावास आफैँले उद्धार गर्न नमिल्ने तर दूतावाससम्म आए नेपाल पठाउन सकिने जनाएको छ । त्यसपछि उनीहरुले सामाजिक सञ्जालमार्फत राष्ट्रिय टे«ड युनियन महासंघ नेपालले उद्धार गर्ने थाहा पाए । उद्धारका नाममा त्यहाँ पनि उनीहरुको ५० हजारभन्दा बढी खर्च भइसकेको छ । ‘२५ सय रजिस्टे«सन शुल्क र १० हजार ट्याक्सी भाडा लाग्छ भनिएको थियो । तर महासंघमा हालसम्म ३७ हजार बुझाइसक्यौँ । कुवेतमा रहेका प्रतिनिधिलाई ट्याक्सी भाडा वापत २० हजार पनि पठाइसक्यौँ,’ सुनुवारले भने, ‘अहिले के भइरहेको छ भनेर हामीलाई कुनै जानकारी दिइएको छैन ।’
महासंघका सचिव धनबहादुर राईले भने सेवावापत कुनै शुल्क अनिवार्य नगरेको बताए । ‘शुल्क खासै लिएको छैन । दिनेले खुसीले दिए भने हो । नत्र शुल्क लिने भन्ने छैन,’ राईले भने । दूतावासले गाडी नपठाउने भएकाले त्यहाँसम्म पु¥याउन ट्याक्सी भाडा चाहिँ पीडितले दिनुपर्ने उनले बताए । कुवेतमा रहेका आफ्ना प्रतिनिधिले पीडितको ठेगाना थाहा पाइसकेकाले उद्धारका लागि उनी त्यो घरबाट बाहिर निस्कनुपर्ने हुन्छ । ती महिलालाई बुधवार दूतावासमा पुर्याउने कुरा भएपनि त्यहाँ रहेका प्रतिनिधिबाट जानकारी लिएपछि मात्र पछिल्लो अवस्थाबारे थाहा हुने राईले बताए ।
कुवेतको श्रम बजारमा घरेलु कामदारको हिस्सा ठूलो छ । त्यहाँको केन्द्रीय तथ्यांक प्रशासनका अनुसार हाल विभिन्न मुलुकका सात लाख ३६ हजार घरेलु श्रमिक कार्यरत छन् । जसमध्ये ६.८ प्रतिशत अर्थात ५० हजारभन्दा बढी नेपाली रहेको पाइएको छ । यस्ता श्रमिकमा सबैभन्दा बढी दुई लाख १२ हजार जना घरेलु श्रमिक छिमेकी मुलुक भारतबाट छन् ।
पछिल्लो समय कुवेतमा ४५ हजारभन्दा बढी महिला गैरकानूनी रुपमा रहेको बताइने गरिएको छ । भिजिट भिजा, फ्रि-भिजा जस्ता बाहानामा अवैधानिक तवरबाट श्रमिक ओसारपसार गरेको खबरहरु बाहिरिसकेका छन् । नेपाल सरकारले त्यहाँ अवैधानिक रुपमा बसेकाहरुलाई पनि हेर्ने बताउँदै आएको छ । तर कानूनी जटिलताका कारण यस्ता श्रमिकको उद्धार कठिन हुँदै आएको छ ।
