- युएईमा नक्कली कार्यालय देखाउँदै लाखौं रकम असुली
- नेपालबाट रोजगारीका लागि लैजाने प्रलोभनमा पारेर ठगी
- युएईमा रहेका नेपालीहरु पनि पेरिसाको फन्दामा
- लाखौं पैसा असुलेकी पेरिसाले आफूविरुद्ध मुद्दा हाले पनि नडराउने धम्की
काठमाडौं- हिमादेवी चापागाइँले आफ्ना श्रीमान् संयुक्त अरब इमिरेट्स (युएई)मा भएकाले रोजगारीका लागि त्यहीँ जाने निर्णय गरिन् । झापाको दमक-४ की २५ वर्षीया हिमादेवी आफन्तमार्फत पेरिसा बराल नाम गरेकी युवतीको सम्पर्कमा पुगिन् ।
युएईमा अफिस खोलेको बताउने पेरिसाले हिमादेवीलाई वैदेशिक रोजगारीमा पठाउने भन्दै प्रलोभनमा पारिन् । हिमादेवीले तुरुन्तै विश्वास गरिन् पेरिसामार्फत नै वैदेशिक रोजगारीमा जाने प्रक्रिया थालिन् । ‘मैले नयाँ अफिस खोलेको हो । मलाई मेरो परिवारले राम्रो व्यवहार गर्नुहुन्न, मलाई काम गर्न दिनुहोस् भनेपछि अरूले खाने पैसा उसैले खाओस् भनेर दिएको हो,’ चापागाइँले भनिन् ।
आफ्नो अफिसमा जागिर लगाइदिने भनेपछि हिमाको दिदीको छोरा पनि युएई जाने निर्णय गरे । त्यसका लागि हिमाले एक लाख रुपैयाँ र उनका भाइले २५ सय दिराम बुझाए । त्यसपछि ‘अफर लेटर’, मोफाजस्ता कागजात पठाएपछि थप एक हजार दिराम बुझाए । पेरिसाले सबै पैसा आफ्नो अफिसको कर्मचारी भन्दै विभिन्न व्यक्तिको खातामा जम्मा गर्न लगाएकी थिइन् । त्यसपछि काम नहुने भएपछि पैसा माग्दा बल्लतल्ल ५० हजार फिर्ता दिएको हिमाको भनाइ छ ।
‘मैले जनवरी २० मा पैसा बुझाएको हो । भिसामा समस्या आयो भनेपछि पैसा फिर्ता माग्दा दिइन्,’ उनले भनिन्, ‘अनि टिकटकमा अर्को मान्छेले त्यो दलाल हो भनेर भिडियो हालेको देखेपछि मैले पनि हालेँ । त्यसपछि ५० हजार फिर्ता दिई । बाँकी पैसा माग्दा जे गर्नु छ गर भन्छे ।’ हिमादेवीकले झापाबाट आएर दुई महिना अगाडि वैदेशिक रोजगार विभागमा उजुरी दिएकी छन् । तर विभागबाट कुनै प्रक्रिया अगाडि नबढेको बताइन् । पेरिसाले ललितपुर-१२ की रीतिका शाक्यलाई पनि आफ्नै कम्पनीमा काम लगाइदिने भनेपछि पैसा बुझाइन् । तर काम गर्न नसकेपछि सम्पर्कविहीन भएको शाक्यको भनाइ छ ।
‘मलाई आफ्नै कम्पनीमा डकुमेन्ट अफिसरमा काममा लगाइदिन्छु भनेपछि एक लाख ९० हजार दिएको हो । त्यसपछि बाहानाहरु बनाउन थाल्यो,’ रितिकाले भनिन्, ‘युएईमा छ भनेको अफिस पनि फेक रहेछ । अफिसको लोकेसन चेञ्ज गरिरहने रहेछ ।’ पेरिसाले नेपालमामात्र नभई युएईमा कार्यरत धेरै नेपाली युवाहरुबाट लाखौं असुलेको पाइएको छ । ह्वाट्एप ग्रुपमा जोडिएका पीडित युवाहरुले आफूले दुःख गरेर कमाएको पैसा ठगेर हैरान पारेको बताएका छन् । त्यहाँ भिसाको म्याद सकिएर ‘ओभर स्टे’ गरिरहेका युवाहरुको भिसा थप गरिदिन्छु भन्दै पाँच हजार दिरामसम्म लिएको बताएका छन् । त्यस्तै, छुट्टीमा नेपाल आएकाहरुको टिकट काटिदिने नाममा नक्कली टिकट बनाएर पैसा असुलेको पनि पाइएको छ ।
को हुन् पेरिसा ?
१९ वर्षीया पेरिसा दोलखाको शैलुङ गाउँपालिका-५ की बासिन्दा हुन् । उनले प्रिसा डक्युमेन्ट्री सर्भिस नामको आफ्नो कार्यालय दुबईको अल नाहदा मेट्रो स्टेसनमा रहेको बताउने गरेको पीडितहरु बताउँछन् । पेरिसाले सन् २०२५ अगस्ट १३ मा युएईको रेसिडेन्सी कार्ड लिएको देखिन्छ । नेपालीहरुबाट लाखौं पैसा असुलेकी उनले आफूमाथि मुद्दा हाले पनि नडराउने भन्दै धम्की दिँदै म्यासेज पठाउने गरेकी छन् ।
पेरिसाको विषयमा काठमाडौंमा बस्दै आएका उनका बुबासँग कुरा गर्दा उक्त कुरा गरे नराम्रो हुने धम्की दिने गरेको पीडितको भनाइ छ । पेरिसाकी आमा र बुबा सँगै बस्दैनन् । आमासँग कुरा गर्दा सो विषय बुबामार्फत मिलाउन भन्ने गरेको जनाइएको छ । पछिल्लो समय वैदेशिक रोजगारीको नाममा हुने व्यक्तिगत ठगीको घटनामा कमी आएको छैन । चालु आर्थिक २०८२/८३ को ११ महिनामा चार हजार ९७३ वटा व्यक्तिगत ठगीको उजुरी दर्ता भएको विभागको तथ्यांक छ ।
चिनजानको व्यक्ति र सामाजिक सञ्जालका आकर्षक विज्ञापनको विश्वास गर्दा बेरोजगार युवाहरु ठगिँदै आएका छन् । ठगीमा संलग्न व्यक्तिले पैसा असुल्न धेरै वटा खाता प्रयोग गर्ने, विदेशमा लुकेर बस्ने आदि गर्नाले कारबाहीको दायरामा ल्याउन कठिन हुने गरेको विभागले बताउँदै आएको छ ।
