महोत्तरी - ट्रकमा फल्स बटम बनाई लुकाई छिपाई राखेको गाँजा जस्तो देखिने वस्तुसहित दुई जनालाई प्रहरीले नियन्त्रणमा लिएकाे छ । शनिबार ट्रकमा फल्स बटम बनाई लुकाई छिपाई राखेको गाँजा जस्तो देखिने वस्तुसहित दुई जनालाई महोत्तरी जिल्लाको एकडारा गाँउपालिका-३ स्थित अजमरपट्टीबाट सशस्त्र प्रहरीले नियन्त्रणमा लिएकाे हाे ।
पक्राउ परेकाहरु मकवानपुर जिल्लाको कैलाश गाँउपालिका-१ बस्ने २३ वर्षीय साधुराम थिङ र सोही गाँउपालिका-६ बस्ने २१ वर्षीय विपस नेगी रहेका छन् । उनीहरूलाई विशेष सूचनाको आधारमा सशस्त्र प्रहरी बल नेपाल बोर्डर आउट पोष्ट बथनाहबाट खटिएको टोलीले नियन्त्रणमा लिएको हो ।
नियन्त्रणमा लिईएका उनीहरू सो ट्रकको मालिक तथा चालक रहेका छन । उक्त टोलीले धनकुटाको भेडेटारबाट महोत्तरीको जलेश्वर हुँदै पश्चिमको एकडारातर्फ जाँदै गरेको ना ३ ख ६५९२ नम्बरको ट्रकलाई रोक्न खोज्दा नरोकी तिव्र गतिमा भागेको थियो । फरार सो ट्रकलाई सशस्त्र प्रहरीले करिब २ किलोमिटर टाढाबाट नियन्त्रणमा लिएको हो ।
सो गाडीलाई नियन्त्रणमा लिएपछि सशस्त्र प्रहरीको टोलीले सोधपुछ गर्दा चालकको व्यवहार शंकास्पद देखेपछि ट्रकमा चेकजाँच गर्दा चालक बस्ने क्याविनको माथिपट्टी फल्स बटन बनाई लुकाई छिपाई राखिएको ३ बन्दल गाँजा जस्तो देखिने वस्तु फेला पारेको हो ।
साथै उनीहरुको साथबाट नेपाली रूपैयाँ, कतारी रियाल, मलेसियन रिङगेट, मोबाइल थान २ थान तथा ट्रक र मोटरसाईकलको ब्लुबुक समेत फेला परेको छ । नियन्त्रणमा लिईएका दुबैजनालाई आवश्यक कारवाहीको लागि उक्त ट्रक तथा सामानसहित सम्बन्धित निकायमा बुझाउने प्रकृयामा भईरहेको छ ।
-1769421870.jpg)
