काठमाडौं- पश्चिम एसियाको द्वन्द्वले मुलुकको विप्रेषण आप्रवाह प्रभावित हुन गएको परराष्ट्र मन्त्रालयले जनाएको छ । विप्रेषण आप्रवाह प्रभावित हुँदा विदेशी मुद्रा सञ्चिति घट्न पुगेको शुक्रबार आयोजित प्रेस ब्रिफिङमा जानकारी दिइयो ।
यही अवस्थामा अति कम विकसित मुलुकबाट हुने स्तरोन्नति हुँदा थप समस्या हुने भन्दै उक्त प्रक्रिया स्थगित गर्ने तयारी गरिएको प्रवक्ता लोकबहादुर पौडेल क्षेत्रीले जानकारी दिए । ‘स्तरोन्नति प्रक्रिया आगामी नोभेम्बर २०२९ सम्मका लागि स्थगित गर्न संयुक्त राष्ट्रसंघको कमिटी फर डेभलपमेन्ट पोलिसीमा पत्राचार गरिएको छ,’ उनले भने ।
मुलुकको अर्थतन्त्रको झण्डै ३० प्रतिशत हिस्सा वैदेशिक रोजगारीबाट भित्रने विप्रेषण (रेमिट्यान्स)ले धानेको छ । विशेषगरी खाडी क्षेत्रको रोजगारीमा निर्भर भएको हाम्रो रेमिट्यान्स गत फ्रेबु्रवरीबाट जारी द्वन्द्वका कारण प्रभावित भएको मन्त्रालयको भनाइ छ । द्वन्द्वले विश्वव्यापी आपूर्ति शृंखलामा आएको अवरोध र रेमिट्यान्स आप्रवाहमा पारेको प्रभावका कारण नेपालको अर्थतन्त्रमा प्रभाव परेको परराष्ट्रले जनाएको छ । जसका कारण विश्व बैंकले सन् २०२६ मा नेपालको आर्थिक वृद्धिदर २.३ प्रतिशतमा सीमित हुने प्रक्षेपण गरेपछि उक्त प्रक्रिया स्थगित गर्न लागिएको मन्त्रालयले जानकारी दिएको छ ।
मन्त्रालयले पश्चिम एसियाको अवस्थामा सुधार हुँदै गएकाले २४ घण्टा सञ्चालन भइरहेको इमरजेन्सी कन्ट्रोल रुमलाई बिहान ९ बजेदेखि राति ९ बजेसम्म सञ्चालन गर्ने तय गरिएको प्रवक्ता क्षेत्रीले बताए । मन्त्रालयका अनुसार हालसम्म कन्सुलर सेवा विभागद्धारा सञ्चालन गरिएको अनलाइन दर्ता प्रणालीमा ८७ हजार ८६३ जनाले फाराम भरेका छन् । पछिल्लो दुई हप्तामा १२ जनालेमात्र फाराम भरेका छन् ।
कार्यक्रममा कन्सुलर सेवा विभागले ‘मोफा मित्र एप’ सञ्चालनमा ल्याउने जानकारीसमेत दिएको छ । विदेशमा रहेका नेपाली नागरिकलाई कानुनी तथा कन्सुलर परामर्श प्रदान गर्नुका साथै राहत, क्षतिपूर्ति र बिमा रकम प्राप्त गर्न सहयोग गर्नका लागि उक्त एप सञ्चालनमा ल्याइने मन्त्रालयले जनाएको छ । उक्त एप यही जेठ १३ गतेदेखि सञ्चालन हुने क्षेत्रीको भनाइ छ ।
मन्त्रालयले दक्षिण पूर्वी एसियाका अनलाइन स्क्यामिङ केन्द्रहरुबाट हालसम्म ६८७ जनाको उद्धार गरिएको जानकारी दिएको छ । जसमा कम्बोडियाबाट ५६२, म्यानमारबाट १११, थाइल्याण्डबाट छ र लाओसबाट आठ जना रहेका जानकारी दिइयो । सो क्षेत्रमा अझै पनि धेरै नेपाली फसेको हुनसक्ने अनुमान गरिएको प्रवक्ता क्षेत्रीले बताए ।
