- कर्मचारीको आचरणलाई निष्पक्ष, पारदर्शी, समन्वयात्मक तथा सेवामूलक बनाउन आचारसंहिता
- कर्मचारीले व्यक्तिगत फाइदा पुग्ने, अरुलाई बदनाम गर्ने या अरुको चरित्र हत्या गर्ने काममा संलग्न हुन नहुने
- कर्मचारीले वैदेशिक रोजगारीको कामका लागि प्रत्यक्ष तथा अप्रत्यक्षरुपमा जोडिएका सेवाग्राही, सर्वसाधारण तथा सरोकारवाला समूहसँग सहयोगीको भूमिका खेल्नुपर्ने
- माथिल्लो निकायबाट आएको आदेशलाई शीघ्र पालना गर्नुपर्ने
- सेवाग्राहीलाई झुलाउने या दुःख दिने काम गरे कारबाही
काठमाडौं- वैदेशिक रोजगार विभागले त्यहाँ कार्यरत कर्मचारीका लागि आचारसंहिता लागू गरेको छ । कर्मचारीको आचरणलाई निष्पक्ष, पारदर्शी, समन्वयात्मक तथा सेवामूलक बनाउन आचारसंहिता लागू गरिएको विभागले जनाएको छ ।
वैदेशिक रोजगारीलाई सुरक्षित, व्यवस्थित र मर्यादित बनाउने लक्ष्य राखेको विभागमा देखिएका कतिपय समस्यामा कर्मचारीको गलत आचरण जिम्मेवार रहेको आरोप लाग्दै आएको थियो । यसलाई न्यूनीकरण गर्न विभागको महानिर्देशकस्तरबाट लागू गरिएको आचारसंहिताअनुसार कर्मचारीले वैदेशिक रोजगारीको कामका लागि प्रत्यक्ष तथा अप्रत्यक्षरुपमा जोडिएका सेवाग्राही, सर्वसाधारण तथा सरोकारवाला समूहसँग सहयोगीको भूमिका खेल्नुपर्ने छ । उनीहरुले वैदेशिक रोजगारसम्बन्धी कानुनको अपव्याख्या नगरी समानरुपले कार्यान्वयन गर्नुपर्ने छ ।
कर्मचारीले झूठा विवरण संकलन गर्ने, वैदेशिक रोजगारसम्न्धी ठगी कार्यमा सहयोग गर्ने वा भ्रमपूर्ण सूचना दिने काम गर्न पाउने छैनन् । वैदेशिक रोजगारसम्बन्धी कुनै पनि तथ्य, तथ्यांक या मुद्दालाई बंग्याएर भ्रामक अर्थ दिनेगरी व्याख्या गरे आचारसंहिताविपरीत हुने उल्लेख छ । कर्मचारीले व्यक्तिगत फाइदा पुग्ने, अरुलाई बदनाम गर्ने या अरुको चरित्र हत्या गर्ने काममा संलग्न हुन नहुनेसमेत आचारसंहितामा उल्लेख छ । उनीहरुले व्यक्तिगत लाभ या कसैको प्रतिशोधका लागि उजुरी दर्ता गर्न लगाउने पाउने छैनन् ।
विभागका कर्मचारीले दिइएको काम तोकिएको समयावधिभित्रै पूरा गर्नुपर्ने छ । आफूभन्दा माथिल्लो निकायबाट आएको आदेशलाई शीघ्र पालना गर्नुका साथै सेवाग्राहीलाई झुलाउने या दुःख दिने काम गर्न पाउने छैनन् । उनीहरुले आफ्नो जिम्मेवारी अरुलाई पन्छाउन तथा आफ्नो क्षेत्राधिकार बाहिरको काम गर्न पनि नपाउने भएका छन् ।
आचारसंहिताअनुसार कर्मचारीले कुनै पनि पक्षको प्रभाव र दबाबमा नपरी पक्षपात् नगरी काम गर्नुपर्ने छ । उनीहरुले सेवाग्राही तथा सरोकारवालासँग अनधिकृत भेटघाट गर्न पाउने छैनन् भने उनीहरुबाट गैरकानुनी सुविधा पनि लिन पाउने छैनन् । सेवा प्रवाहमा बिचौलियाको प्रवेश हुन नदिन क्रियाशील रहनुपर्ने छ । प्रत्येक शाखाका कर्मचारीले आफ्नो शाखाको अभिलेख वैज्ञानिक तवरबाट राख्नुपर्ने छ । उनीहरु कार्यसम्पादनको क्रममा मर्यादित र शिष्ट हुनुपर्ने भनिएको छ । साथै, कुनै पनि कर्मचारी अनुगमनमा जाँदा आफ्नो परिचयपत्र तथा अनुगमनका लागि अख्तियार पाएको आदेश देखाउनुपर्ने व्यवस्था पनि आचारसंहितामा गरिएको छ ।
विभागको काम संवेदनशील प्रकृतिको भएकाले प्रचलित कानुनमा भएका कर्मचारीका आचरणसम्बन्धी प्रावधानबाहेक विभागमा कार्यरत कर्मचारीको पदीय तथा थप पेसागत आचरणसम्बन्धी व्यवस्था वाञ्छनीय भएकाले आचारसंहिता तयार गरेको विभागको भनाए छ । उक्त आचारसंहिता सुशासन व्यवस्थापन तथा सञ्चालन ऐन, २०६४ को दफा २३को उपदफा ३ तथा निजामती सेवाका कर्मचारीको आचरणसम्बन्धी नियमावली, २०६५ नियम २७ ले दिएको अधिकार प्रयोग गरी बनेको उल्लेख गरिएको छ ।
विभागमा वैदेशिक रोजगारीका ठगीसम्बन्धी उजुरीका चाङ भए पनि न्यून संख्यामामात्र फस्र्योट हुँदै आएको छ । म्यानपावर व्यवसायी र विभागका कर्मचारीको मिलेमतोमा ठगीका घटनामा पनि उजुरी नलिने, अनुगमनका क्रममा म्यानपावर, अभिमुखीकरण तालिम प्रदायक संस्थालगायतमा समस्या देखिए पनि आर्थिक चलखेल गरेर कारबाही नगर्ने, सेवाग्राहीलाई सम्मानजनक र शिष्ट व्यवहार नगर्नेजस्ता समस्या रहेको गुनासो थियो । विभिन्न समयमा विभागका निर्देशकदेखि महानिर्देशकसम्म पनि अनियमितताको प्रकरणमा मुछिँदै आएका थिए । आचारसंहिताले विभागका कर्मचारीलाई अनुशासित राख्ने अपेक्षा गरिएको छ ।
आचारसंहितालाई महानिर्देशकले बुधबार स्वीकृत गरेकाले कार्यान्वयनमा आइसकेको छ । यसको पालना गरे÷नगरेको भनेर विभाग, विभागीय प्रमुख र सम्बन्धित सुपरिवेक्षकबाट अनुगमन गरिने जनाइएको छ । यसको उल्लंघन गर्नेहरुलाई कानुनबमोजिम आचरणविरुद्धको कारबाही हुने उल्लेख छ । यो आचारसंहिता कारारका कर्मचारी, विभागमा दरबन्दी रही अन्य निकायमा काजमा खटिएका तथा अन्य निकायमा दरबन्दी रही विभागमा खटिएका कर्मचारीमा लागू हुने विभागले जानकारी दिएको छ ।
