काठमाडौं- पश्चिम एसियाको युद्धले खाडीको रोजगारी बन्द हुँदा चैत महिनामा सबैभन्दा धेरै श्रमिक मलेसिया गएका छन् । उक्त महिना कूल ६१ हजार ८१९ जना रोजगारीमा जाँदा १८ हजार ६४९ जना मलेसिया गएको वैदेशिक रोजगार विभागको तथ्यांक छ । यो संख्या संस्थागत, व्यक्तिगत र श्रम स्वीकृति नवीकरण गरेर गएकाहरुको हो ।
मलेसियामा म्यानपावरमार्फत १० हजार २७० जना गएका छन् । जसमा नौ हजार ७८६ जना पुरुष र ४८४ जना महिला छन् । युद्धले उक्त महिना नेपाली श्रमिकको प्रमुख रोजगार गन्तव्य बन्दै आएको खाडीको संयुक्त अरब इमिरेट्स (युएई), साउदी अरेबिया, कतार, कुवेत, ओमान र बहराइनमा भने म्यानपावर तथा व्यक्तिगत श्रम स्वीकृतिमा एक जना पनि श्रमिक जान पाएका छैनन् । हाल श्रम स्वीकृति नवीकरण गरेरमात्र यी मुलुकमा श्रमिक गइरहेका छन् ।
गएको महिना श्रम स्वीकृति नवीकरण गरेर सबैभन्दा धेरै युएई गएका छन् । युएईमा नौ हजार ५१८ जना पुरुष र एक हजार ९४५ जना महिला गरी जम्मा ११ हजार ४६३ जना गएका छन् । दोस्रोमा कतारमा आठ हजार ९५९ जना गएका छन् । जसमा आठ हजार ५८२ जना पुरुष र ३७७ जना महिला छन् । त्यसपछि, साउदीमा आठ हजार ८६२ जना पुरुष र ५८ जना महिला गरी कूल आठ हजार ९२० जना गएका छन् । त्यस्तै, चार हजार ४३८ जना रोमानिया गएका छन् । जसमा तीन हजार ८४१ जना व्यक्तिगत र ५९७ जना श्रम स्वीकृति नवीकरण गरेर गएकाहरु छन् ।
गत महिना श्रमिकहरु रोजगारीको खोजीमा १०१ वटा मुलुकमा जाँदा म्यानपावर व्यवसायीले मलेसिया, जापान, साइप्रस र मरिसस गरी चार वटामात्र मुलुकमा पठाएका छन् । संस्थागत माध्यमबाट जम्मा ११ हजार ५५८ जना रोजगारीमा गएका छन् । त्यस्तै व्यक्तिगत श्रम स्वीकृति लिएर ७९ वटा मुलुकमा पुगेका छन् । व्यक्तिगत श्रम स्वीकृतिमा आठ हजार ६५२ जना गएको तथ्यांक छ ।
गत महिना सबैभन्दा धेरै धनुषाबाट तीन हजार ८२९ जना वैदेशिक रोजगारीमा गएका छन् । जसमा तीन हजार २८७ जना पुरुष र ११ जना महिला छन् । त्यसपछि सिरहाबाट दुई हजार ६९८ जना गएकामा दुई हजार ६८३ जना पुरुष र १५ जना महिला छन् । त्यस्तै, झापाबाट दुई हजार ५३३, महोत्तरीबाट दुई हजार ६२२ र मोरङबाट दुई हजार २१२ जना रोजगारीमा गएका छन् । सबैभन्दा कम भने मुस्ताङबाट नौ जना गएका छन् । जसमा सात जना पुरुष र दुई जना महिला छन् । त्यस्तै, मनाङबाट २० जना विदेशिएको तथ्यांक छ ।
विभागका अनुसार चैतमा सबैभन्दा धेरै ४२ हजार २१ जना श्रमिक सीपयुक्त भएर रोजगारीमा गएका छन् । सीपयुक्त भएर गएकामा ३७ हजार ८५४ जना पुरुष र चार हजार १६७ जना महिला छन् । १३ हजार ३६६ जना भने कुनै दक्षता हासिल नगरी गएका छन् । उक्त महिना ११ हजार ९४१ जना पुरुष र एक हजार ४२६ जना महिला सीपविनै गएका छन् । साथै, छ हजार १०९ जना अर्धदक्ष, २५३ जना व्यावसायिक तथा ७० जना उच्च दक्ष श्रमिक विदेसिएका छन् ।
