काठमाडौं- पश्चिम एसियामा जारी द्वन्द्वकाबीच पनि वैदेशिक रोजगारीमा जानेहरुको संख्यामा भने ठूलो गिरावट नआएको पाइएको छ । चालु आर्थिक वर्षको नौ महिनामा रोजगारीको खोजीमा पाँच लाख ८७ हजार ३३२ जना विभिन्न मुलुकमा गएको तथ्यांक वैदेशिक रोजगार विभागले सार्वजनिक गरेको छ । यो संख्या संस्थागत, व्यक्तिगत र श्रम स्वीकृति नवीकरण (पुनः श्रम स्वीकृति) गरेर गएकाहरुको हो ।
विभागको चालु आर्थिक वर्षको तथ्यांक हेर्दा प्रत्येक महिना औसतमा ६५ हजार ६०० जनाभन्दा बढी कामदार रोजगारीमा गएको पाइन्छ । पछिल्लो महिना चैतमामात्र ६१ हजार ८१९ जना रोजगारीमा गएका छन् । साउदी अरब, युनाइटेड अरब इमिरेट्स (युएई), कतार लगायतका प्रमुख रोजगार गन्तव्य बन्द हुँदा विदेसिनेको संख्या न्यून हुने आकलन गरिएको थियो । यद्यपि, यस अवधिमा श्रम स्वीकृति नवीकरण गरेर जानेहरुको संख्यामा उल्लेख्य वृद्धि हुँदा विदेसिनेको समग्र संख्यामा भने भारी गिरावट नआएको देखिन्छ । पहिलोपटक रोजगारीमा जानेको संख्या भने घटेको छ । चैतमा जम्मा २० हजार २१० जनामात्र पहिलोपटक रोजगारीमा गएका छन् । पुनः श्रम स्वीकृति लिएर ४१ हजार २७४ जना गएको विभागको तथ्यांक छ । रोजगारीको अवस्था सामान्य हुँदा हरेक महिना २० देखि २५ हजारको हाराहारीमा श्रम स्वीकृति नवीकरण गरेर जाँदा ४० देखि ४५ हजार युवा पहिलोपटक रोजगारीमा जाने गरेका थिए ।
विभागको तथ्यांकअनुसार म्यानपावरमार्फत जाने श्रमिकको संख्यामा भने ठूलो गिरावट आएको छ । रोजगारीको अवस्था राम्रो हुँदा म्यानपावरमार्फत मासिक ३० हजारभन्दा बढी श्रमिक रोजगारीमा जान्थे । जेन-जी आन्दोलनपछि घट्न थालेको यस्तो संख्या चैतमा सबैभन्दा न्यून देखिएको छ । उक्त महिनामा ११ हजार ५५ जनामात्र संस्थागत माध्यमबाट रोजगारीमा गएका छन् । जसमा १० हजार ५२१ जना पुरुष र एक हजार ३७ जना महिला छन् । यसअघि गत फागुनमा २० हजार १३० जना संस्थागतरुपमा परदेसिएका थिए । हालसम्म नयाँ श्रम स्वीकृति नखुलाउँदा भिसा लागेका सात हजारभन्दा बढी श्रमिक रोजगारी गुमाउने अवस्थामा पुगेका व्यवसायीहरुले बताउँदै आएका छन् ।
त्यस्तै, छ हजार ८८३ जना पुरुष र एक हजार ७८९ जना महिला गरी कूल आठ हजार ६५२ जना व्यक्तिगत श्रम स्वीकृति लिएर गएका छन् । सो अवधिमा ३३५ जना जिटुजीमार्फत इजरायल र दक्षिण कोरिया गएका छन् । यो नौ महिनामा इजाजतप्राप्त संस्थाले एक लाख ९६ हजार ७७८ जना कामदार पठाउँदा ८११ वटा उजुरी परेका छन् । पीडितले चार करोड ८० लाख भन्दा बढि रकम क्षतिपूर्तिबापत पाएका छन् । चैत महिनामामात्रै ८१ वटा उजुरी परेका छन् भने ३६ लाखभन्दा धेरै क्षतिपूर्ति दिइएको छ ।
रोजगारीमा जानेहरुमाथि हुने व्यक्तिगत ठगीको घटना पनि नियन्त्रण हुन सकेको छैन । चालु आ.व.को नौ महिनामा तीन हजार ८८३ वटा उजुरी दर्ता भएका छन् । जसमा ४४१ वटा मिलापत्र भएको छ भने ३२८ वटा मुद्दा अदालतमा दायर भएको छ । पीडितलाई सात करोड ८७ लाखभन्दा बढि क्षतिपूर्ति दिइएको जनाइएको छ । गत चैतमामात्रै ५८६ वटा यस्ता उजुरी परेकोमा १०१ वटा मिलापत्र र ५५ वटा अदालतसम्म पुगेको छ ।
विभागले सार्वजनिक गरेअनुसार यस अवधिमा जम्मा ४२६ वटा इजाजतप्राप्त संस्थाको अनुुगमन गरिएको छ । त्यस्तै, दुई वटा म्यानपावर संस्था र दुई वटा अभिमुखीकरण तालिम दिने संस्थाको कारोबार रोक्का गरिएको छ । हालसम्म विभागमा दर्ता भएका संस्थाको धरौटीबापतको तीन अर्ब ९६ करोड २५ लाख रकम ब्याजमा लगाएको जनाइएको छ । व्यवसायीहरुले लामो समयदेखि आफूहरुले राखेको धरौटीबापत प्राप्त हुने ब्याजको रकम केमा खर्च हुँदै आएको भनेर पारदर्शी बनाउन माग गर्दै आएका छन् ।
-1787143572.jpg)
