काठमाडौं- सरकारले पश्चिम एसियाका थप चारवटा मुलुकका लागि पुनः श्रम स्वीकृति खुलाएको छ । वैदेशिक रोजगार विभागले बुधबार सूचना जारी गर्दै इजरायल, कुवेत, बहराइन र लेबनानका लागि श्रम स्वीकृति नवीकरण खुलाएको जानकारी दिएको हो ।
योसँगै उक्त क्षेत्रका ११ वटा मुलुकमा श्रम स्वीकृति नवीकरण (पुनः श्रम स्वीकृति) खुलेको छ । इराकको हकमा भने गत पुस ११ गतेको निर्णयले निरन्तरता पाउने जनाइएको छ । पुस ११ को मन्त्रिपरिषद् बैठकले वैदेशिक रोजगारीको सिलसिलामा आधिकारिक भिसा प्राप्त गरेका नेपालीले नेपाल आएको बखत आवेदन दिए श्रम स्वीकृति पाउने निर्णय गरेको थियो ।
इजरायल, इरान र अमेरिका सम्मिलित युद्धका कारण पश्चिम एसियाका देशहरुमा गत फागुन १७ गतेदेखि सबै प्रकारका श्रम स्वीकृति स्थगित गरिएको थियो । छुट्टीमा आएका श्रमिकको रोजगारी गुम्ने अवस्थालाई मध्यनजर गर्दै गत चैत ३ गते साउदी अरेबिया, संयुक्त अरब इमिरेट्स (युएई), कतार, ओमान, यमन, जोर्डन र टर्कीको श्रम स्वीकृति नवीकरण गर्ने निर्णय गरिएको थियो । श्रम, रोजगार तथा सामाजिक सुरक्षा मन्त्रालयको गत चैत ३० गतेको निर्णयअनुसार थप चार वटा मुलुकमा पुनः श्रम स्वीकृति खुलाइएको जनाइएको छ । गत हप्ता परराष्ट्र मन्त्रालयको इमरजेन्सी रेस्पोन्स टिमले बाँकी देशमा श्रम स्वीकृति नवीकरण खुलाउन सकिने भनेर श्रम मन्त्रालयलाई पत्राचार गरेको थियो ।
गत फागुन १६ गते शनिबारदेखि इजरायल-अमेरिका र इरानबीच युद्ध सुरु भएपछि श्रम मन्त्रालयले फागुन १७ गते सुरक्षा संवेदनशीलताका कारण भन्दै पश्चिम एसियाका १२ मुलुकमा व्यक्तिगत र संस्थागत श्रम स्वीकृति दिने कार्य स्थगित गरेको थियो । पश्चिम एसिया नेपालीहरुको प्रमुख श्रम गन्तव्य हो । हाल त्यस क्षेत्रमा १७ लाख २९ हजारभन्दा बढी नेपाली कार्यरत रहेको परराष्ट्रको तथ्यांक छ । जसमध्ये युएईमा सबैभन्दा धेरै सात लाख नेपाली छन् । त्यस्तै, साउदीमा तीन लाख ८४ हजार, कतारमा तीन लाख ५७ हजार, कुवेतमा एक लाख ७५ हजार, ओमानमा २५ हजार, बहराइनमा २८ हजार, इराकमा ३० हजार, साइप्रसमा १७ हजार, इजरायलमा छ हजार ५००, लेबनानमा एक हजार ५००, इजिप्टमा ५०० तथा इरानमा छ जना छन् ।
-1787143572.jpg)
