काठमाडौं - निर्माणाधीन शीतभण्डार (कोल्ड स्टोर) परियोजनामा ७१ लाख भ्रष्टाचार प्रकरणमा मुद्दा दायर भएकाे छ । रुपन्देहीमा परियोजनामा शीतभण्डार अनियमितता भएको भन्दै पूर्व सचिवसहित २० भन्दा बढी व्यक्तिविरुद्ध विशेष अदालतमा अख्तियार दुरुपयोग अनुसन्धान आयोगले मुद्दा दायर गरेको हाे ।
आयोगका अनुसार रुपन्देहीको सम्मरीमाई गाउँपालिका–५ मा निर्माणाधीन ५०० मेट्रिक टन क्षमताको शीतभण्डार परियोजनामा गलत कार्यसम्पादन प्रतिवेदन, नापजाँचमा त्रुटि तथा झुट्टा बिलका आधारमा ७१ लाख ९७ हजार ९८० रुपैयाँभन्दा बढी रकम भुक्तानी गरिएको पाइएको छ।
उक्त परियोजना भूमि व्यवस्था, कृषि तथा सहकारी मन्त्रालय को आर्थिक वर्ष २०७६/७७ को कार्यक्रम अन्तर्गत सञ्चालन भएको थियो। कुल ५ करोड ४३ लाख रुपैयाँ लागत अनुमान गरिएको परियोजनामा मन्त्रालयले ७५ प्रतिशत र सहकारी संस्थाहरूले २५ प्रतिशत लगानी गर्ने सम्झौता गरिएको थियो।
अनुसन्धानका क्रममा परामर्शदाता कम्पनी Mega Minds Architects and Structure Pvt. Ltd. ले डीपीआर तयार गर्ने र मूल्याङ्कन गर्ने दुवै काम गरी लागत अस्वाभाविक रूपमा बढाएको तथा प्रतिस्पर्धा बिना सोझै खरिद प्रक्रिया अपनाइएको भेटिएको आयोगले जनाएको छ।
आयोगले तत्कालीन सचिव बैकुण्ठ अधिकारी, कृषि तथा लेखा सम्बन्धी अधिकारीहरू, परामर्शदाता कम्पनीका सञ्चालक तथा विभिन्न सहकारी संस्थाका पदाधिकारीहरूसहितका व्यक्तिविरुद्ध भ्रष्टाचार निवारण ऐन, २०५९ अनुसार कैद र जरिवानाको माग गर्दै विशेष अदालत काठमाडौंमा आरोपपत्र दायर गरेको हो।
अनियमितताका कारण निर्माण गरिएको संरचना अपूर्ण, जीर्ण र प्रयोगविहीन अवस्थामा रहेको समेत आयोगले जनाएको छ।
