आजबाट नयाँ वर्ष २०८३ को शुभारम्भ भएको छ । नयाँ वर्ष लाग्दै गर्दा देशमा नयाँ अनुहार पनि आएको छ । नयाँ अनुहारसँगै नयाँ-नयाँ कुरा पनि आएका छन् । त्यसैले नयाँ वर्ष सबैका लागि शुभ होस् । यो शुभको पहिलो साइतमै सुनपानी छर्कनुपर्ने छैन । किनकि अहिले सत्तामा पुगेका मन्त्रीहरुसँग बोकी नसक्नुको सुन छ । पहिले भए पनि देखाउँदैनथे । अहिले नभएपछि भविष्यमा हुने सम्भावित कमाईसमेतलाई देखाइदिए । पालो जो नयाँको छ ।
नौ दिनमा नौलो २० दिनमा बिर्षो भन्ने नेपाली उखान देश हाँक्नेहरुमा लागू गर्दा ठीक होला । जनताको नाममा मन्त्री पदको शपथ खाएकै १३ दिनमा मन्त्रीको जागिर चेट हुन्छ, यो पनि नयाँ नै हो । सय दिनको हनिमुन न सनिमुन... विवाद आयो, पत्ता साफ ।
कसैले भन्लान् भएको देखाउन नपाउने ? कसैले भन्लान् हिजोकाले पनि भाइछोरा राखेका थिए । अहिले श्रीमती राखे के बिगारे त झोले हो ! झोले न पुरानाका पनि थिए । नयाँका पनि छन् । झोला कसै न कसैको बोकेकै छन् । अरुलाई झोले भन्नेले आपूmले के बोकेको छु भन्ने हेर्दा ठीकै हुन्थ्यो होला ।
अरुको आङमा जुम्रा देख्नेले आफ्नो आङमा भैँसी कुदेको नदेख्ने यहाको चलन नै हो । जान्नेलाई छान्ने नीति भनेकै जस्तो कुरा पनि जान्नुप¥यो । नातावाद कृपावाद, नगदवाद, सुनवाद चाँदीवाद सबै जान्नुप¥यो । अनि त्यही जान्नेलाई नै छान्ने हो नि ! तेरीमा तोरीको फूल ! गर्न पनि कति सकेको ! कहिले सम्पत्ति देखाए भन्ने कहिले यत्रो किन देखाको भन्ने ? यसो गरे पनि सुख छैन उसो गरे पनि सुखो छैन ? बाले कमाको भए पनि छोराले कमाएको भए पनि, पैतृक सम्पत्ति भए पनि, ससुरालीले पठाएको दाइजो भए पनि, नभए पनि सम्पत्ति त देखाकै हो नि !
जसरी भए पनि देखाउने हो, देखाएको छ त ! ऊ बेला चुनाउताका नै जुम्लाकी नानीले भनेको बिर्सेऊ झोले हो ? सम्पत्ति नहुनेले किन राजनीति गर्नु ? राजनीति गर्न त सम्पत्ति चाहिन्छ । धन चाहिन्छ । धनसम्पत्ति नहुनेले राजनीति नगर्नु भनेर नानीले भनेको एकपटक सम्झ त ! हो त्यही भएर अहिले मन्त्री बन्दा भए भरको सबै देखाको । धनी नेता भए पो खुस खाँदैनन् । घुस खाने धन सम्पत्ति नभएकाले नेता हो । त्यही भएर पनि चुनाउदेखि नै धन सम्पत्ति भएका मान्छे खोजी-खोजी रोजी-रोजी उठाको । अनि टिङरिङ ट्वाङ भन्दै जिताको !
गरिबलाई उठाएको घुस खान्थ्यो । घर जोड्थ्यो । धनीले त धन जोड्ने हो घुस खाने होइन । अब यी सयौं तोला सुन भएकाहरुले दुई-चार लाख घुस खाँदैनन् । किनकि, करोडौंको सुन नै छ । घरमै सुख खानी भएपछि किन घुस खानी ! घुस नखानी । सम्पत्ति जोड्ने चारवटा घरबाट ४० वटा घर बनाउने, दुई करोडको सेयरबाट २० करोडको सेयर बनाउने । चार रोपनी जग्गालाई ४०० रोपनी जग्गा बनाउने । नयाँ भनेकै नयाँ हो ! गर्ने भनेकै नयाँले हो । आधुनिक संसारमा प्रविधिको प्रयोग गर्ने हो प्रविधिबाट हान्ने हो गर्ने भनेकै नयाँले हो !
पोहोरताका आओ-आओ भनेर कराको होइन ? ३५ वर्षसम्म खाओ-खाओ भनेको होइन ? कति पुरानोलेमात्र खाने ? कति पुरानाको मात्र हेर्ने ? अब पालो नयाँको ! नयाँले देखाइदिए त । लौ हेर, के हामीलाई माग्ने सोच्या छौं ? अरुलाई पनि नेपोबेबीका कुरा गर्ने हो त । हामी त कहाँ नेपोबेबी हो र ? बाउले कमाइदिएको ! सन्तानका लागि सम्पत्ति जोडिदिएको ! घुस खाएकै छैन । घुस खाको भए यत्रो सम्पत्ति हुन्छ ?
कसैका बाउले सरकारीमा जागिर खाका । कसैका बाउले सरकारी नियुक्ति खाका । उनै पुरानाले नै ख्वाका ! अहिले पो नयाँ भनेको छ ? फेरि नयाँ भनेको के भनेर सोध्ने होला ? नयाँ भनेको सबै किसिमको नयाँ ! विदेशीसँग बिहे गरेको नयाँ । डिभोर्स गरेको नयाँ । छोराछोरी उतै छाडेको नयाँ । काम नयाँ । दाम नयाँ । त्यस्तै परे भोलि भाग्नै परे पनि भाग्न तयार भएर बसेका नयाँ ? पुराना त खालि कमिसन खाका छन् । बैंक र सहकारीमा पैसा लुकाका छन् । छोराछोरी विदेशमा पठाका छन् । त्यस्तो पनि हुन्छ ? हामी त नयाँ उतै स्वास्नी छोराछोरी पहिले नै राखेर आका छौं । यो पो हो त तरिका !
खाए ए खाऊ, नखाए नखाऊ । हिजो पो तिम्रा लागि हो त अब त आफ्ना लागि । ‘आफू भलो त जगतै भलो’ भन्ने त्यसै भनेको छ ? हामी भलो गर्ने छौं । पहिले आफ्नो भलो । त्यसपछि आफन्तको भलो त्यसपछि समाजको भलो । भए भलो नभए चलो ! यो हो नि नयाँको पालो ।
नुन देखाएर सुन लुकाको पनि होइन । भएको पनि देखाएको होइन । भविष्यमा हुन सक्ने पो देखाएको त ! विचरा बाले कति सारो मिहेनत गरेर कमाको पो हो त ! नत्र २८ वर्षमा २८ करोड हुन्छ ? बाले आफ्नो छोराछोरीको भविष्यलाई बुझेर सम्पत्ति जोडिदिएको । अनि बेलैमा नामसारी गरिदिएको, अनि पो देखाको त !
ती झोलेजस्तो अरुकै नाममा राखेको भए पनि रिसाउनु । बाको सम्पत्ति खोजे कि हजुरबाको ? आफ्ना जे छन् त्यही देखाको । ‘झूठ बोले कौवा काटे’ भनेको त छैन । स्पष्ट, पारदर्शिता, सुन, सेयर, सम्पत्ति । तीन ‘स’ विशेष पारदर्शिता । त्यही भएर पो भनेको । अब पालो नयाँको ! नयाँ वर्षको सबैलाई शुभकामना तीन ‘स’ सहित सुनपानीको !
