काठमाडौं -डिशहोम रिचार्ज अफरको नाममा ठगी गर्ने तीन जनालाई प्रहरीले पक्राउ गरकाे छ । डिशहोमको कर्मचारी हुँ भनी झुटो परिचय दिएर आकर्षक अफरको प्रलोभन देखाई ग्राहकहरूसँग रकम असुली ठगी गरेको आरोपमा तीन जना पक्राउ परेका हुन्।
प्राप्त निवेदनका आधारमा अनुसन्धान अघि बढाउँदै जाँदा प्रहरी टोलीले चैत २२ गते उनीहरूलाई पक्राउ गरी थप अनुसन्धान तथा आवश्यक कारबाहीका लागि जिल्ला प्रहरी परिसर भद्रकाली, काठमाडौं पठाएको जनाएको छ।
पक्राउ पर्नेहरूमा धादिङ नेत्रावती डबजोङ गाउँपालिका–५ घर भई हाल काठमाडौं टोखा नगरपालिका–३ बस्ने २२ वर्षीया आरती सिंखडा, दोलखा भीमेश्वर नगरपालिका-८ घर भई हाल सोही स्थान बस्ने २२ वर्षीय विष्णु कार्की र रामेछाप दोरम्बा शैलुङ गाउँपालिका-२ घर भई हाल काठमाडौं टोखा नगरपालिका–९ बस्ने ४७ वर्षीय असल सिंह तामाङ रहेका छन्।
प्रहरीका अनुसार उनीहरूले आफू डिशहोममा कार्यरत रहेको भन्दै नियमित ग्राहकहरूलाई फोन सम्पर्क गरी “१ वर्षको रिचार्ज गर्दा ४ महिनाको निःशुल्क रिचार्ज” अफर आएको भन्दै झुक्याउने गरेका थिए। त्यसपछि ग्राहकहरूबाट ईसेवा, खल्ती तथा बैंक खातामार्फत रकम लिने गरिएको प्रारम्भिक अनुसन्धानबाट खुलेको छ।
प्रहरीले घटनामा प्रयोग भएका डिशहोम इन्टरनेट सर्भिस ‘प्रविधि इम्पेक्स’ नामका ५ थान रसिद प्याड, ‘प्रविधि इम्पेक्स प्रा.लि.’ को १ थान छाप, आरती सिंखडाको नाममा जारी गरिएको डिशहोम फाइबरनेटको १ थान परिचयपत्र तथा विभिन्न व्यक्तिहरूको नाम, फोन नम्बर र हिसाबकिताब उल्लेख भएका २ थान कपी बरामद गरेको जनाएको छ।
अनुसन्धानका क्रममा मुख्य आरोपी आरती सिंखडाले विगत करिब ४ वर्षदेखि डिश मिडिया नेटवर्क अन्तर्गतका सब-डिलर तथा अनलाइन सेवामा काम गरेको पाइएको छ। सोही क्रममा उनले ग्राहकहरूको विवरण संकलन गरी उनीहरूसँग सम्पर्क गर्दै ठगी गर्ने गरेको खुल्न आएको छ।
प्रहरीका अनुसार, रकम लिइसकेपछि नक्कली छाप प्रयोग गरी रसिद दिने गरिएको थियो। आरती सिंखडाकै नम्बरबाट डिशहोमका ८६ वटा अकाउन्ट खोलिएको समेत फेला परेको छ। हालसम्म ३६४ जना ग्राहक ठगीमा परेको प्रारम्भिक अनुमान गरिएको छ भने २९ लाख रुपैयाँभन्दा बढी रकम ठगी भएको देखिएको छ। हालसम्म ७ जना पीडितले उजुरी दिएका छन्। घटनाबारे थप अनुसन्धान जारी रहेको प्रहरीले जनाएको छ।
