काठमाडौं - काठमाडौं मा चार देशका कलाकारहरुको सहभागितामा अन्तरराष्ट्रिय कला शिविर (इन्टरनेशनल आर्ट क्याम्प) तथा कला प्रर्दशनी सुरु भएको छ । नेपाल ललितकला प्रज्ञा प्रतिष्ठानमा कला प्रदर्शनी र कलाकारलाई अवार्ड वितरण गरेर सुरु भएको प्रदर्शनी तथा आर्ट क्याम्पअन्तर्गत आज कलाकारहरुले वसन्तपुर दरबार स्क्वायरमा कला कार्यशाला आयोजना गरेका छन् ।
भारतको राष्ट्रिय कलाकार सङ्घको आयोजना तथा नेपाली कलाकारहरुसँगको सहकार्यमा भएको उक्त प्रदर्शनीमा भारतका १३, नेपालका १४, बङ्गलादेशका दुई र श्रीलङ्काका नौ जना कलाकार सहभागी छन् । उक्त प्रदर्शनीको नेपाल ललितकला प्रज्ञा प्रतिष्ठानमा मङ्गलबार उद्घाटन गरिएको थियो । उक्त कार्यक्रमका संयोजक तथा राष्ट्रिय कलाकार सङ्घ भारतका अध्यक्ष विश्वाजीत दामले पहिलो पटक नेपाल आएर कला प्रदर्शनी तथा कला क्याम्प गर्न पाएकोमा खुसी व्यक्त गरे ।
उनले भने, “वसन्तपुर निकै अनौठो र उत्कृष्ट पर्यटकीय क्षेत्र लाग्यो, यहाँका सम्पदाको कलाले आफूलाई तान्यो ।” उहाँले यसरी विभिन्न देशमा गएर आर्ट क्याम्प गर्ने गरेको पनि सुनाए ।कार्यक्रम आयोजना गर्नुको उद्देश्यबारे उहाँले भन्नुभयो, “हरेक देशका कलाकारका अलगअलग सीप हुन्छन् । ती सीपको विकास तथा सीप आदानप्रदान गर्न आपसमा सहकार्य गरी भाइचारा बढाउन यो कार्यक्रम गरिरहेका छौँ ।”
भारतबाट आउनुभएका अर्का कलाकार तथा क्यूरेटर हेमन कालिताले काठमाडौँमा पहिलो पटक आएर कलाको कार्यक्रम आयोजना हुँदा खुसी लागेको बताउँदै काठमाडौँका कलात्मक दृश्यले आफूलाई खुसी बनाएको बताए ।कार्यक्रममा सहभागी नेपाली कलाकार दिपेन्द्रमान बनेपालीले भारतीय कलाकारहरुको संस्थाबाटै आयोजना भएको यो कार्यक्रमले आपसीसम्बन्ध विस्तारमा सहयोग गर्ने बताए ।
आज आर्ट क्याम्पमा सङ्घले यहाँ सहभागी कलाकारलाई क्यानभाससहित रङसमेत वितरण गरेको थियो । कलाकारहरुले वसन्तपुर दरबार क्षेत्रका सम्पदालाई क्यान्भासमा उतारेका छन् । आजको क्याम्पमा अङ्ग्रज कलाकार तथा अन्तरराष्ट्रिय जलरङ समाज नेपालका अध्यक्ष एनबि गुरुङले कलाको ‘लाइभ डेमोस्ट्रेसन’ गरेका थिए ।
