काठमाडौं - चिनियाँ गायक, अभिनेता तथा मोडल यू मेङलोङ (Yu Menglong) को ३७ वर्षको उमेरमा बिहीबार बेइजिङमा भवनबाट खस्दा मृत्यु भएको छ। उनको व्यवस्थापन टोलीले सामाजिक सञ्जाल वेइबोमा उनको निधनको खबर सार्वजनिक भएपछि पुष्टि गरेको हो।
उनको व्यवस्थापन टोलीले विज्ञप्ति जारी गर्दै भनेको छ, “असह्य दुःखका साथ हामी घोषणा गर्दछौं कि हाम्रा प्रिय मेङलोङले ११ सेप्टेम्बरमा भवनबाट खस्दा ज्यान गुमाए। प्रहरी अनुसन्धानअनुसार यसमा कुनै आपराधिक गतिविधि छैन। उहाँले शान्ति पाउनुहोस् र उहाँका प्रियजनहरूले दृढ रहुन् भन्ने हाम्रो चाहना छ।”
प्रारम्भमा, एक पापारात्सीले अब हटाइएको पोस्टमार्फत खबर साझा गरेका थिए। पोस्टमा भनिएको थियो, “मलाई आज खबर प्राप्त भयो किEternal Love र Go Princess Go का मुख्य अभिनेता यू मेङलोङ बेइजिङमा भवनबाट खस्दा निधन भए। एक भित्री स्रोतले जानकारी दिँदै भनेका थिए कि ९ सेप्टेम्बरमा मेङलोङ ५-६ जना साथीहरूसँग साथीको घरमा भेटघाटमा थियाे । ११ सेप्टेम्बर राति करिब २ बजे उनी सुत्न बेडरूममा गए र भित्रैबाट ढोका बन्द गरे। बिहान ६ बजे साथीहरू बाहिर निस्कँदा उनी कतै देखिएनन् । तर तल झर्दा उनको शव भेटियो। कुकुर घुमाउँदै गरेका छिमेकीले प्रहरीलाई खबर गरे । प्रहरीले यो घटनालाई आपराधिक नभएको स्पष्ट गरिसकेको छ। घटनाको कारण अझै अनुसन्धानमा छ।”
अर्को हटाइएको पोस्टमा भनिएको थियो, “आज बिहान मलाई सूचना मिल्यो कि यू मेङलोङ बेइजिङमा भवनबाट खस्दा निधन भए। म घटनास्थलमा पुगेँ र भवनको पाँचौं तलाको झ्याल फुटेको देखेँ, जुन सूचनासँग मेल खाएको थियो। पछि त्यहाँका एक कर्मचारीसँग कुरा गर्दा उनले पनि भवनबाट खस्दा मृत्यु हुने व्यक्ति यू मेङलोङ नै भएको पुष्टि गरे। यो घटना ११ सेप्टेम्बर बिहान करिब ५ बजे भएको हो। पाँचौं तलाबाट खस्दा कङ्क्रिटमा ठोक्किएर उनको तत्काल मृत्यु भएको हो।”
यू मेङलोङले सन् २००७ माMy Show, My Style नामक रियालिटी शोमा भाग लिँदै आफ्नो करिअर सुरु गरेका थिए। उनले सन् २०११ मा he Little Princeनामक छोटो फिल्मबाट अभिनयमा डेब्यु गरेका थिए। उनले Go Princess Go, Love Game in Eastern Fantasy, Feud, Eternal Love लगायतका चर्चित चिनियाँ धारावाहिकमा अभिनय गरेका थिए। साथै उनले संगीत क्षेत्रका पनि थुप्रै प्रोजेक्ट सार्वजनिक गरेका थिए।
यू मेङलोङको असामयिक निधनले चिनियाँ मनोरञ्जन क्षेत्रमा ठूलो शोक परेको छ। व्यवस्थापन टोलीले परिवारको गोपनीयताको सम्मान गर्न आग्रह गरेको छ भने प्रहरी अझै घटनाबारे थप अनुसन्धानमा रहेको बताइएको छ।
