प्रारम्भिक अनुसन्धानका क्रममा पक्राउ परेका विनोद श्रेष्ठ मिटरब्याजी रहेको देखिएको छ । सुनको गहना धितो राखेर लेनदेन गरेको देखिन्छ ।
अपिलराज बोहरा
प्रवक्ता, जिल्ला प्रहरी परिसर काठमाडौं
काठमाडौं- प्रहरीले काठमाडौंको गोंगबुस्थित एक व्यक्तिको घरबाट चार करोड २५ लाख रुपैयाँ बरामद गरेको छ । गोरखा घर भई गोंगबु बस्दै आएका विनोदकुमार श्रेष्ठको घरमा शंकास्पद रकम भेटिएपछि मंगलबार दिउँसो प्रहरीले छापा मारी उक्त रकमसहित साढे नौ किलो सुन र तीन किलो चाँदीसमेत बरामद गरेको हो ।
जिल्ला प्रहरी परिसर काठमाडौंका प्रवक्ता प्रहरी उपरीक्षक अपिलराज बोहराका अनुसार अवैध रकम लुकाइएको सूचनाका आधारमा उपत्यका प्रहरी कार्यालय रानीपोखरी र जिल्ला प्रहरी परिसर काठमाडौंको टोलीले श्रेष्ठको घरमा छापा मारेको थियो । ‘७६ वर्षे विनोद श्रेष्ठको घरमा स्रोत नखुलेको सम्पत्ति र अवैध तरिकाबाट राखेको सुनचाँदी छ भन्ने विशेष सूचनाको आधारमा खानतलासी गर्दा चार करोड २५ लाख ५० हजार नगद भेटिएको हो,’ प्रवक्ता बोहराले भने । उक्त घरमा अनुसन्धान गर्न पुग्दा प्रहरीले पैसाका बिटा चामलको बोरामा लुकाएर राखेको भेटिएको उनले बताए ।
भारीमात्रामा हजारको नोट भेटिएपछि प्रहरीले नोट गन्ने मेसिन मगाएर पैसा गनेको थियो । उक्त रकमको स्रोत नखुलेपछि प्रहरीले श्रेष्ठलाई पनि पक्राउ गरेको छ । प्रहरीका अनुसार श्रेष्ठ मिटरब्याजी भएको खुलेको छ । उनले सुन धितो राखेर मिटरब्याजमा पैसा लगानी गर्ने गरेको खुलेको प्रहरीले दाबी गरेको छ । मंगलबार दिउँसो १ बजे प्रहरी पुग्दा छिमेकीले पनि उनी ब्याजमा पैसा लगानी गर्ने व्यक्ति भएको बताएका थिए । ‘प्रारम्भिक अनुसन्धानका क्रममा उनी मिटरब्याजी रहेको देखिन्छ । सुनको गहना धितो राखेर लेनदेन गरेको देखिन्छ,’ प्रवक्ता बोहराले भने । यसबारे विस्तृत अनुसन्धान हुन बाँकी रहेको उनले बताए ।
पक्राउ परेका श्रेष्ठले आफ्नो छोराहरुको कम्पनी रहेको र बैंकमा धेरै रकम कारोबार गर्न नपाउने भएपछि घरबाट नै कारोबार गर्ने गरेको बताएका छन् । सुन पसलमा धितो राखिएका गरगहनासमेत उनको घरमा भेटिएको प्रहरीले जनाएको छ । गर्जो टार्न सर्वसाधारणले सुन पसलमा धितो राखेका गहना, उच्च ब्याज लिएर लिएका गहना पनि उनको साथमा भेटिएको प्रहरीको अनुसन्धानमा देखिएको छ । पछिल्लो समय वैदेशिक रोजगार, शिक्षालगाय विभिन्न कामका लागि ऋण लिने क्रम बढ्दो छ । बैंकबाट सहजै ऋण नपाउने भएपछि चर्को ब्याजमा धितो पास, गहना राखेर व्यक्तिबाट ऋण लिने क्रम बढ्न थालेको व्यवसायीहरु बताउँछन् ।
ऋण लिन कडाइ गरिएसँगै कतिपयले बैंकमा रकम नराखी बढी ब्याज पाइने आशमा यस्ता व्यक्तिलाई विश्वास गर्ने गरेको पाइएको छ । श्रेष्ठलेझैं धेरै ब्याज दिने व्यक्तिहरुको खोजीमा लगानीकर्ताहरु रहेको बताइन्छ । यस विषयमा पनि अनुसन्धान गरिरहेको प्रहरीले जानकारी दिएको छ ।
