काठमाडौं- नेपाल लाइफ इन्स्योरेन्स कम्पनी लिमिटेडले राउन्ड टेबल नेपालसँग सहकार्य गर्दै सगरमाथा क्षेत्रमा थुप्रिएका ५,००० किलोग्राम फोहोर संकलन गरेको छ ।
‘प्रोजेक्ट केयर’ अभियानअन्तर्गत संकलित फोहोरबारेको प्रतिवेदन राउन्ड टेबल नेपालका अध्यक्ष प्रवेश अग्रवालले नेपाल लाइफका प्रमुख कार्यकारी अधिकृत (सीईओ) प्रवीण रमण पराजुलीलाई शुक्रबार एक विशेष समारोहबीच हस्तान्तरण गरेका छन् । कार्यक्रममा नेपाल लाइफका सीईओ पराजुलीले संस्थागत सामाजिक उत्तरदायित्वअन्तर्गत वातावरण संरक्षणलाई प्राथमिकतामा राख्दै सगरमाथा सफाइ अभियानमा सहकार्य गरिएको बताए । ‘पहिलो चरणमै ५,००० किलो फोहोर संकलन गर्न सफल भएकोमा सबै सरोकारवालाप्रति धन्यवाद ज्ञापन गर्दै आगामी दिनमा पनि नेपालको धरोहर सगरमाथाको सौन्दर्य कायम राख्न नेपाल लाइफ सदैव तत्पर रहने प्रतिबद्धता छु’,उनले भने,‘सगरमाथा केवल नेपालको मात्र होइन, विश्वकै गहना हो, त्यसैले यसको संरक्षण हाम्रै जिम्मेवारी हो ।’
राउन्ड टेबल नेपालका अध्यक्ष अग्रवालले यस अभियानमार्फत आगामी दिनमा २५ हजार किलो फोहोर व्यवस्थापन गर्ने लक्ष्य राखिएको जानकारी दिए । उनले शिक्षा, स्वास्थ्य र वातावरणका क्षेत्रमा निरन्तर काम गर्दै आएको राउन्ड टेबल नेपालले यो अभियानलाई दीर्घकालीन बनाउन प्रतिबद्ध रहेको उल्लेख गरे ।
‘संकलन गरिएको फोहोरमध्ये कुहिने पदार्थलाई आधार शिविरभन्दा तल पुरिएको छ भने नकुहिने फोहोरलाई ३० किलोको झोलामा हालेर काठमाडौं ल्याइएको छ । ल्याइएका फोहोरलाई खालिसीसीको सहकार्यमा रिसाइकलिङ गर्ने तयारी गरिएको छ ।
सगरमाथा हरेक वर्ष हजारौँ आरोहीहरूको आकर्षणको केन्द्र बने पनि त्यहाँ छाडिएका टेन्ट, अक्सिजन सिलिन्डर, खानेकुरा प्याकेजिङ, पर्वतारोहण उपकरण र मानव फोहोरका कारण प्रदूषण बढ्दै गएको छ । विश्वकै ‘सबैभन्दा अग्लो फोहोर थलो’बन्न नदिने उद्देश्यका साथ नेपाल लाइफले राउन्ड टेबल नेपालसँग सहकार्यमा प्रोजेक्ट केयर अभियानलाई सहयोग गरेको जनाएको छ ।
