काठमाडौं- चीनको एक्सपोर्ट एन्ड इम्पोर्ट बैंक अफ चाइना (सिईएक्सआईएम) ले नेपालका दुई ठूला जलविद्युत् आयोजनाको लागि सानिमा बैंक लिमिटेडलाई नेपालतर्फको एजेन्ट बैंक नियुक्त गरेको छ ।
यस सम्झौता अनुसार, मनाङ मस्र्याङ्दी हाइड्रोपावर प्रा.लि (१३५ मेगावाट) र लाङटाङ भोटेकोशी हाइड्रोपावर प्रा।लि (१२० मेगावाट) परियोजनाका लागि वित्तीय सहजिकरण तथा मध्यस्थकर्ताको जिम्मेवारी सानिमा बैंकले वहन गर्ने भएको छ । सम्झौतापत्रमा सानिमा बैंकका प्रमुख निक्षेप अधिकृत हेमराज सञ्ज्याल र सिईएक्सआईएम बैंकको चेंगडु शाखाकी उपाध्यक्ष मिस्टर वी एन्हुईले हस्ताक्षर गरेका थिए ।
कार्यक्रमलाई सम्बोधन गर्दै सानिमा बैंकका सीईओ पाण्डेले सानिमा बैंकलाई एजेन्ट बैंकको रुपमा विश्वास गरेर नियुक्त गरेकोमा आभार व्यक्त गर्दै, यस सहकार्यले बैंकको अन्तर्राष्ट्रिय व्यापारिक सम्बन्ध विस्तार हुने र व्यापार प्रवद्र्धनमा टेवा पुग्ने विश्वास व्यक्त गरे । उनले ऊर्जा, जलविद्युत् तथा पूर्वाधार क्षेत्रमा यस किसिमको सहकार्यले नेपालका लागि महत्वपूर्ण योगदान गर्ने अपेक्षा रहेको बताए ।
त्यसैगरी सिईएक्सआईएम बैंकका प्रतिनिधिहरुले परियोजना समयमै सम्पन्न गर्न सहज बनाउने प्रतिबद्धता व्यक्त गर्दै, सानिमा बैंकको भूमिकालाई निर्णायक रहेको बताएका थिए । उनीहरुका अनुसार यी आयोजनाबाट प्राप्त अनुभव भविष्यमा अन्य ठूला क्षेत्रमा समेत सहकार्य गर्नका लागि आधारशिला (कोशेढुंगा) सावित हुने भएको छ ।
सम्झौतासँगै सानिमा बैंकले हालसम्मकै ठूलो परिमाणको चाइनीज मुद्राको अन्तरदेशीय कारोबार नेपालमा भित्र्याउन सफल भएको छ । बैंकका अनुसार, यसले आगामी दिनमा सानिमा बैंकको क्षमता वृद्धि गर्ने, राष्ट्रिय तथा अन्तर्राष्ट्रिय स्तरमा साख बढाउने र देशको दिगो विकासमा टेवा पुग्ने अपेक्षा गरिएको छ ।
