काठमाडौं- मध्यपुर थिमी नगरपालिका स्थित श्री श्यामा श्याम धाम ‘राधे राधे’ मा आयोजित श्री कृष्णजन्माष्टमी महोत्सव सम्पन्न भएको छ । भगवान श्रीकृष्णको प्राकट्य दिवसको अवसरमा २५ हजारभन्दा बढी श्रद्धालु भक्तजनको सहभागिता रहेको आयोजक समितिले जनाएको छ।
कार्यक्रम शनिबार बिहान ५:०० बजेबाट सुरू भई राति १२:३० बजेसम्म विविध आध्यात्मिक र सांस्कृतिक कार्यक्रमसहित मनाइएको थियो । श्रद्धालु भक्तजनहरूका लागि मन्दिर दर्शन, पूजन तथा विशेष आध्यात्मिक साधना कार्यक्रमको व्यवस्था गरिएको थियो । भक्तजनहरूको अत्यधिक चापलाई ध्यानमा राख्दै मन्दिर प्रवेशका लागि दक्षिण द्वार र बाहिर निस्कन पश्चिम द्वार प्रयोग गर्ने व्यवस्था मिलाइएको थियो । अशक्त, जेष्ठ नागरिक, बालबालिका तथा विशेष सहयोग आवश्यक पर्ने श्रद्धालुहरूको लागि सहज दर्शनको व्यवस्था स्वयंसेवकहरूको सहायतामा गरिएको थियो । मन्दिर परिसरमा रहेको विशेष कार्यक्रमहरूमा श्रीकृष्णको लीलासँग सम्बन्धित चित्रकला र कलात्मक वस्तुहरूको प्रदर्शनी, झुला दर्शन, राधे राधे अनुहार छाप तथा धार्मिक मेकअप सेवा, शाकाहारी जलपान स्टल, चिया(कफी वितरण लगायत विविध सेवा उपलब्ध गराइएको थियो ।
कार्यक्रममा नियमित संकीर्तनसँगै भगवान श्रीकृष्णको प्राकट्य लीला, अभिषेक, महाभोग, माखन अर्पण, महाआरती तथा विविध सांस्कृतिक कार्यक्रमहरू प्रस्तुत गरिएको थियो । साँझ ६:३० बजे बालगोपालको भव्य रथयात्रा श्री भक्ति मन्दिरबाट सुरू भई निकोसेरा चोकसम्म पुगी पुनः मन्दिर फर्किएको थियो । रथयात्रामा सयौं भक्तजन सहभागी भएका थिए र यात्रा मार्गभर श्रद्धालुहरूले पूजा अर्चना गरेका थिए । महोत्सवको सफल सञ्चालनमा जनपद तथा ट्राफिक प्रहरी, स्थानीय विद्यालयका विद्यार्थी, नेपाल स्काउट, डिभाइन युथ क्लब तथा अन्य सत्संगी स्वयंसेवकहरूको सक्रिय सहयोग रहेको थियो। सयभन्दा बढी स्वयंसेवक परिचालित भई भक्तजनहरूको व्यवस्थापन, सुरक्षामा सहजीकरण गरेका थिए । श्री श्यामा श्याम धामको स्थापना ३० वर्षअघि पञ्चम मूलजगद्गुरु श्री कृपालुजी महाराजको कृपाबाट भएको हो। यहाँ सनातन वैदिक अध्यात्म दर्शनअनुसार भक्ति साधना पद्धति अनुसरण गर्दै नियमित आराधना, साधना तथा सत्संग कार्यक्रमहरू सञ्चालन हुँदै आएका छन् ।
भक्तपुर जिल्ला कै एक प्रमुख आध्यात्मिक गन्तव्यस्थलको रूपमा परिचित श्री भक्ति मन्दिरमा सम्पन्न यस वर्षको श्री कृष्णाष्टमी महोत्सव श्रद्धा, भक्ति र सांस्कृतिक भावनाले परिपूर्ण रह्यो।
