अस्ट्रेलिया- तामाङ सोसाइटी अफ न्यु साउथ वेल्स सिड्नीले ‘तामाङ ज्ञान पहिचान’ विषयक एकदिने सेमिनार सम्पन्न गरेको छ । ९३औं तामाङ पहिचान दिवसको सन्दर्भ पारेर उक्त सेमिनार आयोजना गरिएको हो ।
सिड्नीमा आयोजित कार्यक्रममा राजनीतिक विश्लेषक विश्वभक्त दुलाल ‘आहुति’ले प्रमुख वक्ताको रुपमा आफ्नो विचार राखेका थिए । उनले तामाङ पहिचान र तामाङ जातिले इतिहासका विभिन्न कालखण्डमा राज्यसत्ताबाट भोगेका दमनबारे जानकारी दिएका थिए । लामो समय दमनमा परे पनि तामाङ जातिले आफ्नो पहिचान जोगाइराखेको भन्दै उनले प्रशंसा गरे ।
नेपालबाट ‘भर्चुअल’ माध्यमबाट सम्बोधन गर्दै भाषाविद् अमृत योञ्जन तामाङले विगत साढे चार दशकको अवधिमा तामाङ भाषाको क्षेत्रमा काम गर्दाको अनुभव राखेका थिए । उनले अहिले बागमती प्रदेशको कामकाजी भाषाको रुपमा तामाङ भाषा कार्यान्वयनमा आएको जानकारी दिँदै यो निरन्तरको भाषिक आन्दोलनको उपलब्धि भएको उल्लेख गरे ।
नेपालबाटै ‘भर्चुअल’ रुपमा सम्बोधन गर्दै मानवशास्त्री डा. मुक्तसिं लामाले तामाङ जातिको धार्मिक, सांस्कृतिक पहिचानको विषयमा कार्यपत्र प्रस्तुत गरेका थिए । यसैगरी, ललितकला क्याम्पसका लालकाजी तामाङले ललितकलाको विषयमा चर्चा गरेका थिए ।
संस्थाका पूर्वअध्यक्ष एवं सल्लाहकार अरुण तामाङले संस्थाको प्रयासमा तामाङ समाजका विद्वान व्यक्तित्वहरुको सहभागी र अन्य संघ संस्थाको व्यक्तिहरुको उपस्थितिले कार्यक्रम सफल भएको बताए ।
राज पाख्रिनको सभापतित्वमा भएको कार्यक्रममा संस्थाका उपाध्यक्ष ग्यानक वाइबा तामाङले स्वागत मन्तव्य राखेका थिए ।
