काठमाडौं- भगवान श्रीकृष्णको प्राकट्य दिवस श्रीकृष्ण जन्माष्टमीको अवसरमा श्री श्यामा श्याम धाम, भक्ति मन्दिर परिसर, थिमीमा सोमबार चित्रकला प्रतियोगिता सम्पन्न भएको छ । श्री राधा माधब समिति नेपालको सहयोगी संस्था-विद्वत समाज नेपालको आयोजनामा भएको हो ।
प्रतियोगितामा बिभिन्न कलेजमा अध्ययनरत तथा चित्रकलामा अभ्यासरत १७ जना कलाकार तथा विद्यार्थीहरु सहभागि थिए । सहभागी कलाकारहरुले भगवान श्रीकृष्णको लीलामा आधारित आफ्ना मौलिक सिर्जनाहरु प्रस्तुत गरेका थिए ।
कार्यक्रममा विद्वत समाज नेपालका संयोजक महेन्द्र बहादुर गुरुङ्गको अध्यक्षतामा भएको थियो । चित्रकला मूल्यांकन समितिका संयोजक एवं अन्तर्राष्ट्रिय जलरंग समाज नेपालका अध्यक्ष चित्रकार नारायण बहादुर गुरुङ्ग, फाइन आट्र्स कलेजका एसोसिएट प्रोफेसर एवं मूल्यांकन समितिका सदस्य राधेश्याम मुल्मी, तथा समितिका सदस्य दीपक प्रसाद चालिसेले कार्यक्रमको संचालनमा सहयोग गरेका थिए ।
प्रतियोगिताको आरम्भअघि साधना हलमा जगद्गुरुत्तम श्री कृपालुजी महाराजको श्रीकृष्ण लीला सम्बन्धी छोटो प्रवचन प्रस्तुत गरिएको थियो । एनबी गुरुङ्गले चित्र निर्माणका क्रममा कलाकारहरुले ध्यान दिनुपर्ने विषय, मौलिक सिर्जनशीलता र क्याफ्टम्यानसिपका मापदण्डबारे सुझाव दिएका थिए । बिहान ११: ०० बजे सुरु भएको चित्रकला सिर्जना अपरान्ह ४:०० बजे सम्पन्न भएको थियो। आयोजकले प्रथम पटक आयोजित यस प्रतियोगितामा सहभागीहरुले अत्यन्त सुन्दर र भावनापूर्ण चित्रहरु सिर्जना गरेको जनाएको छ ।
प्रतियोगितामा प्राप्त सबै चित्रहरुको मूल्यांकन गरी विजेताहरुको घोषणा आगामी साउन ३१ गते श्रीकृष्ण जन्माष्टमीका दिन विशेष साधना कार्यक्रमका अवसरमा गरिने भएको छ । विजेताहरुलाई नगद पुरस्कार र प्रमाणपत्र वितरण गरिने पनि आयोजकले जनाएको छ ।
-1752335779.jpg)
