काठमाडौं- आगामी श्रीकृष्ण जन्माष्टमी महोत्सवको पूर्वपूर्वसन्ध्यामा, श्री राधा माधव समिति नेपालको आयोजनामा शनिबार बिहान भक्तपुर ठिमीमा भव्य नगर संकीर्तन सम्पन्न भएको छ ।
कार्यक्रम बिहान ठीक ९ बजे श्री श्यामा श्याम धाम, भक्ति मन्दिरबाट सुरु भई भाटभटेनी, मध्यपुर अस्पताल, उत्तर बाराही, ठिमी चोक, बालकुमारी मन्दिर, बाहाका बजार हुँदै निकोसेरा पुगेर पुनः मन्दिरमै सम्पन्न भएको हो । मार्गभरि राधाकृष्णको आकर्षक झाँकी र श्री कृपालुजी महाराजका सयौँ कृपालु अनुगत साधकहरूले हरिनाम संकीर्तनको मधुर स्वर गुन्जाउँदै सम्पूर्ण वातावरणलाई भक्तिभावले रंगिन बनाएको थियो ।
स्थानीय बासिन्दाहरूले फूलमाला, प्रसाद र ताजा पानीसहित स्वागत गर्दै हर्ष भाव प्रकट गरेका थिए । यस नगर यात्रामा निस्किएको भव्य रथयात्रा, झाँकी र संकीर्तनले वातावरणलाई झन् अद्भुत भक्तिमय बनाएको थियो । साधकदेखि श्रद्धालु भक्तजनसम्म सबैजना गाइँदै, नाच्दै, हर्ष-उल्लासका साथ सहभागी भइरहेका दृश्यहरूले भक्तपुरलाई श्रीकृष्णमय बनाइएको देखिन्थ्यो ।
विगत बिसौं वर्षदेखि पवित्र हनुमन्ते नदी किनारमा अवस्थित श्यामा श्याम धाममा जगद्गुरुत्तम श्री कृपालुजी महाराजले प्रतिपादन गरेकाे भक्ति मार्गको साधना निरन्तर भइरहेको छ । साथै यहाँ नित्य भजन-कीर्तन, दर्शन र साधनामा सहभागी भई असीम कृपाको अनुभव गर्न सकिन्छ ।समितिले प्रत्येक शनिबार हुने सत्सङ्ग, भजन-कीर्तन तथा विशेष पर्व-उत्सवहरूमा सम्पूर्ण श्रद्धालुहरूलाई सहभागी हुन आग्रह गरेको छ । विशेषतः श्रीकृष्ण जन्माष्टमी, राधाष्टमी, झूलन उत्सव, रथयात्रा तथा अन्य प्रमुख वैदिक पर्वका अवसरमा श्री राधा माधव समिति नेपालले उपस्थित हुन निमन्त्रणा गरेकाे छ ।
-1752335779.jpg)
