काठमाडौं- ललितपुरको सुनाकोठीमा विश्वकै सम्भवतः सबैभन्दा अग्लो आराध्यदेव भीमसेनको आठौं स्थापना दिवस भव्यताका साथ मनाउने भएको छ । आयोजक सुनाकोठी समाजले सांस्कृतिक, धार्मिक र पर्यटकीय महत्व बोकेको यस समारोह आयोजना भदौ १ गते गर्ने भएको छ।
सुनाकोठी क्षेत्रको समग्र विकास तथा ललितपुरलाई अन्तर्राष्ट्रिय स्तरमा सांस्कृतिक र धार्मिक स्थलको रूपमा चिनाउने उद्देश्यले स्थापना दिवसलाई विशेष महत्वका साथ मनाउने तयारी अन्तिम चरणमा पुगेको छ। आयोजक संस्था सुनाकोठी समाजका अध्यक्ष विनोद डङ्गोलले भीमसेन जात्रालाई समाजले वार्षिक रूपमा आयोजना गर्दै आएको र भविष्यमा पनि निरन्तरता दिइने जानकारी दिए। उनका अनुसार मच्छेगाउँको एक खोंचबाट ल्याइएको ६० टन तौलको एकै ढुङ्गाबाट भीमसेनको मूर्ति निर्माण गरिएको हो, जुन निकै मेहनतपूर्ण प्रक्रिया थियो।
समारोहको तयारीबारे जानकारी दिँदै आयोजक समिति सदस्य तथा गायक रुपेश डङ्गोलले यस वर्षको स्थापना दिवसलाई अझ भव्य र व्यवस्थित बनाउन विशेष कार्यक्रम तय गरिएको बताए । दर्जनौं गीतमा स्वर दिइसकेका गायक डङ्गोलले स्थानीय सांस्कृतिक चेतना अभिवृद्धिका लागि आफू जस्ता कलाकारहरूको भूमिका पनि महत्त्वपूर्ण हुने उल्लेख गरे । स्थानीय समुदायको सक्रिय सहभागिता र श्रद्धाका साथ मनाइने यस कार्यक्रममा पूजाआजा, सांस्कृतिक झाँकी, भजनकीर्तन, र विभिन्न धार्मिक विधिहरू समेत समावेश गरिने आयोजकले जनाएको छ ।
