काठमाडौं - विभिन्न जिल्लाबाट अवैध लागू औषध सहित १० जना पक्राउ परेका छन् । रुपन्देही, नवलपरासी, झापा लगायतका जिल्लाबाट अवैध लागू औषधसहित १० जना पक्राउ परेका हुन् ।
रुपन्देहीको सियारी गाउँपालिका–७ कनरीबाट लागू औषध डाईजेपाम ९० एम्पुल, बुप्रेनोर्फिन ९० एम्पुल र प्रोमेथाजाइन ९० एम्पुलसहित २ जना पक्राउ परेका छन् । शनिबार दिउँसो प्रहरीले उनीहरूलाई पक्राउ गरेको छ । पक्राउ पर्नेहरूमा पर्वत धौलागिरि गाउँपालिका–३ बस्ने २४ वर्षीय युवराज पुन र पाल्पा तानसेन नगरपालिका–१४ बस्ने २१ वर्षीय विकास ज्ञवाली रहेका छन् ।
जिल्ला प्रहरी कार्यालय रुपन्देहीबाट खटिएको प्रहरीले बेथरीबाट बेलबासतर्फ जाँदै गरेको लु.६२ प. ११०९ नम्बरको मोटरसाइकलमा सवार उनीहरूलाई उक्त लागू औषध सहित पक्राउ गरेको हो । त्यस्तै नवलपरासी पश्चिमको सुनवल नगरपालिका–९ स्वाठीबाट लागू औषध स्पास्मो ४ सय ८० ट्याब्लेटसहित २ जना पक्राउ परेका छन् । उनीहरूलाई शनिबार बेलुकी प्रहरीले पक्राउ गरेको हो ।
पक्राउ पर्नेहरूमा सोही नगरपालिका–३ खैरहनी बस्ने ३३ वर्षीय लोकनाथ खवास र उनकी श्रीमती ३२ वर्षीया रिमा गुरुङ रहेका छन् । जिल्ला प्रहरी कार्यालय नवलपरासी पश्चिमबाट खटिएको प्रहरीले परासीबाट सुनवलतर्फ जाँदै गरेको लु.४ प २८४ नम्बरको मोटरसाइकलमा सवार उनीहरूलाई उक्त लागू औषध सहित पक्राउ गरेको हो ।
उता झापाको भद्रपुर नगरपालिका–५ भन्सार चोकबाट लागू औषध ब्राउन सुगर जस्तो देखिने पदार्थ ४७ ग्राम ६ सय ९० मिलिग्राम सहित २ जनालाई शनिबार दिउँसो प्रहरीले पक्राउ गरेको छ । पक्राउ पर्नेहरूमा काठमाडौँ महानगरपालिका– २६ बस्ने २४ वर्षीय निवेश कुँवर र लमजुङ क्व्होलासोथार गाउँपालिका–७ बस्ने २२ वर्षीया नोजिना रानामगर रहेका छन् । जिल्ला प्रहरी कार्यालय झापा र लागू औषध नियन्त्रण ब्युरो शाखा कार्यालय काँकडभिट्टाबाट खटिएको प्रहरीले भारतबाट नेपालतर्फ आउँदै गरेको बागमती प्रदेश ०१-०३० च ७७९३ नम्बरको कारमा सवार उनीहरूलाई उक्त पदार्थ सहित पक्राउ गरेको हो ।
