काठमाडौं- एभरेष्ट कलर कम्पनीले निकट भविष्यमा ७,९०,००० कित्ता साधारण शेयर निष्काशन गर्न लागेको छ। शेयर निष्काशनको तयारीस्वरूप बुधबार कम्पनीका प्रबन्ध सञ्चालक सरोज लुइटेल र प्रत्याभूतिकर्ता लक्ष्मी सन्राइज क्यापिटल लिमिटेडका प्रमुख कार्यकारी अधिकृत विजय लाल श्रेष्ठबीच प्रत्याभूति सम्झौता सम्पन्न भएको हाे ।
एभरेष्ट कलरले नेपाल सरकार शहरी विकास तथा भवन निर्माण विभागको सूचीमा दर्ता भइसकेको छ। साथै, कम्पनीले ISO 9001:2015 प्रमाणिकरण प्रमाण पत्र प्राप्त गरिसकेको छ र नेपाल गुणस्तर चिन्ह (NS) प्राप्तिको अन्तिम चरणमा रहेको छ। कम्पनीलाई केयर रेटिंग्स नेपाल लिमिटेडले ‘डबल बी माइनस (BB-)’ को रेटिंग प्रदान गरेको छ, जसले कम्पनीको स्थायित्व र वित्तीय क्षमता प्रति सकारात्मक सन्देश दिन्छ।
अन्य रंग उद्योगहरूको तुलनामा फरक ढाँचामा अगाडि बढिरहेको एभरेष्ट कलरले स्वदेशी युवाहरूको संयुक्त लगानीमा स्थापना भई आयात प्रतिस्थापन, रोजगारी सिर्जना, र आन्तरिक राजस्व वृद्धिमा योगदान गर्ने उद्देश्य बोकेको छ। कम्पनीले नेपाल र नेपालीको भौतिक पूर्वाधारमा प्रयोगयोग्य उच्च गुणस्तरको रंग उत्पादनमार्फत स्वदेशी उत्पादन प्रवर्द्धन गर्दै आएको छ।
सार्वजनिक निष्काशनपछि पूँजी संरचना थप मजबुत हुने विश्वास कम्पनीले लिएको छ।
