काठमाडौं - यौनस्वास्थ्यको विषयमा निर्माण गरिएको चलचित्र ‘दुःखी आत्मा’ को आज काठमाडौँमा पहिलो प्रदर्शनी (प्रिमियर शो) गरिएको छ । शुक्रबारदेखि चलचित्र प्रदर्शन गरिने भएको छ ।
नेपाली सिनेमा उद्योगमा सामाजिक सन्देशलाई कलात्मक रूपमा प्रस्तुत गर्ने क्रम बढ्दो छ। यही क्रममा आएको नयाँ चलचित्रले पुरुषप्रधान समाजमा यौन स्वास्थ्यजस्तो संवेदनशील विषयलाई उत्कृष्ट ढंगले प्रस्तुत गरेको छ।
यौन स्वास्थ्यका विषयमा धेरै विदेशी चलचित्र निर्माण भएपनि नेपालमा उक्त विषयमा चलचित्र निर्माण नभएकाले आफैँले निर्देशन गरेको निर्देशक दीपेन्द्र लामाले बताए । यौनस्वास्थ्यको विषयमा बनेको चलचित्र सम्भवत यो नै पहिलो हो । उनले भने, “मैले आफ्ना चलचित्रमार्फत सामाजिक विषयलाई उठान गरिरहेको हुन्छु ।” उनले चलचित्रमा पुरुषमा ‘इरेक्टाइल डिस्फक्सन’ भएको देखाएका छन् । यस पात्रका लागि उनले कविको पृष्ठभूमि तयार गरेका छन् ।
चलचित्रमा कविको भूमिकामा अभिनेता दयाहाङ राई छन् । उनले आफ्नो पात्रलाई न्याय गर्न हरसम्भव प्रयास गरेको बताएका छन् । उनले भने, “म कवि होइन र ‘इरेक्टाइल डिस्फक्सन’ को समस्यालाई महसुस गरेको छैन । त्यसैले त्यो पात्रलाई न्याय गर्न एउटा अभिनेताका रुपमा सक्दो मेहनत गरेँ ।”
अभिनेत्री आँचल शर्माले यौनस्वास्थ्यका विषयमा खुलेर संवाद नहुँदा निम्तिने समस्याले परिवारलाई असर गर्ने गरेको बताइन्। “हामीले चलचित्रमा उठान गरेको विषय परिवारले हेर्नुपर्ने र चर्चा गर्नुपर्ने हो । नेपाली समाजमा यौन समस्यालाई डाक्टरसँग पनि भन्न लजाउने स्थिति छ । समस्या व्यक्त गर्न नसक्दा आइपर्ने जोखिम र सामाजिक भयको मिश्रणले निम्त्याउने घटनाक्रम चलचित्रमा प्रस्तुत छ ।”
सामान्यतया नेपाली चलचित्रमा महिलालाई मात्र पीडामा देखाइने चलन छ। तर, यस फिल्मले यो परम्परागत प्रवृत्तिलाई तोड्दै पुरुष पात्रको संवेदनशील पक्षलाई उजागर गरेको छ। कथाले पुरुष पात्रको भावनात्मक संघर्ष, समाजको दृष्टिकोण, र यौन स्वास्थ्यका बारेमा हुने गलत धारणाहरूलाई वास्तविक रूपमा प्रस्तुत गरेको छ।
चलचित्रमा नाम चलेका तथा थिएटरका अनुभवी कलाकारहरूको अभिनय उल्लेखनीय छ। कथावस्तु गम्भीर भए पनि संवाद र दृश्यहरू मार्फत हास्यको मिठास मिसाएर दर्शकलाई मनोरञ्जन प्रदान गर्ने प्रयास गरिएको छ। विशेषगरी, कविको जीवनीलाई समाजले कसरी हेर्ने गर्छ भन्ने सन्दर्भ पनि कथामा जोडिएको छ, जसले कथालाई अझै गहिराइ दिएको छ।
नेपाली समाजमा महिलालाई मात्र कमजोर मान्ने प्रवृत्तिलाई चुनौती दिँदै, यस चलचित्रले पुरुष पात्रको संघर्षलाई न्यायपूर्ण रूपमा प्रस्तुत गरेको छ। समग्रमा, चलचित्रले समाजमा सकारात्मक परिवर्तनको सन्देश दिने निमार्ण पक्षकाे अपेक्षा रहेकाे छ।
प्रिमियर शोमा उपस्थितले चलचित्रको विषयवस्तुको प्रसंशा गरे ।‘एडल्ट ड्रामा’ भनिएको यस चलचित्रमा अनुपविक्रम शाही, बुद्धि तामाङ, रेअर राई, पुष्कर गुरुङ, कविता आले, लोकेन्द्र लेखक, आरती आचार्य, आशान्त शर्मा, दिया मास्के, लुनिभा तुलाधर, शिशिर वाङ्देललगायतका कलाकारले अभिनय गरेका छन् । प्रणय दिवसको अवसर पारेर प्रदर्शन हुने चलचित्रलाई आलोक शुक्लाले छायांकन तथा निमेष श्रेष्ठले सम्पादन गरेका छन् ।
